රටේ ජනතාව බංකොලොත්භාවයට පත් කිරීමට වගකිව යුතු පුද්ගලයින්ට එරෙහිව විමර්ශනයක් පවත්වන ලෙස නියෝගයක් නිකුත් කරන්නැයි ඉල්ලා ගොනුකර ඇති මූලික අයිතිවාසිකම් පෙත්සම් විභාගයේදී වත්මන් ජනාධිපති රනිල් වික්‍රමසිංහට එරෙහිව කරුණු විභාග කිරීම අත්හිටුවීමට හා එම පෙත්සම් විභාගයෙන් රනිල් වික්‍රමසිංහ සම්පූර්ණයෙන් නිදහස් කිරීමට ශ්‍රේෂ්ඨාධිකරණය (27) තීරණය කළේය.
මෙරට හිටපු ජනාධිපති ගෝඨාභය රාජපක්ෂ මෙම පෙත්සම්වල වගඋත්තරකරුවකු ලෙස පුද්ගලිකව නම් කිරීමට පංච පුද්ගල ශ්‍රේෂ්ඨාධිකරණ විනිසුරු මඩුල්ල තීරණය කළේය.ලබන අගෝස්තු මස 01 වැනිදා අධිකරණයේ කරුණු දක්වන ලෙස දන්වා වගඋත්තරකාර ගෝඨාභය රාජපක්ෂට ඔහු අවසානයට පදිංචිව සිටි ලිපිනයට නොතීසි යවන ලෙස ශ්‍රේෂ්ඨාධිකරණය රෙජිස්ට්‍රාර්වරයාට නියම කරයි.
මෙරට අගවිනිසුරු ජයන්ත ජයසූරිය, බුවනෙක අලුවිහාරේ, ප්‍රියන්ත ජයවර්ධන, විජිත් මලල්ගොඩ සහ එල්.ටී.බී.දෙහිදෙනිය යන පංච පුද්ගල ශ්‍රේෂ්ඨාධිකරණ විනිසුරු මඩුල්ල හමුවේ මෙම පෙත්සම් කැඳවනු ලැබුවේය.
