By unusuma.lk on (LK time)
අද (09) දිනයේ ශ්‍රී ලංකාවට එරෙහිව තරග බිමට පිවිසෙන ඉන්දීය තුන් ඉරියව් ක්‍රීඩිකා අරුන්දතී රෙඩ්ඩිට ජාත්‍යන්තර ක්‍රිකට් කවුන්සිලය විසින් ඊයේ තරඟ ගාස්තුවෙන් 50% ක දඩ මුදලක් හා අසාදු ලකුණක් දඬුවම් ලෙස නියම කළේය.
ඒ පාකිස්තානය සමඟ පැවති තරගයේදී ඇය විසින් පාකිස්තාන ක්‍රීඩිකාවකට ඇඟිල්ල දිගු කොට තර්ජනය කළ බවට චෝදනා කිරීම හේතුවෙනි.
වේග පන්දු යවනා දකුණත් ක්‍රීඩිකා රෙඩ්ඩිට එරෙහිව ජාත්‍යන්තර ක්‍රිකට් කවුන්සිලය විසින් අසාදු ලකුණක් ලබාදුන් පළමු අවස්ථාව මෙයවූ අතර, වසර දෙකක කාලය තුළ ඇයගේ පළමු වරද මෙය විය.
ඇය ඉදිරියේදී තවත් අසාදු ලකුණු හතරක් එක් කර ගතහොත් තරග තහනමකට ලක්වනු ඇත.
ජාත්‍යන්තර ක්‍රිකට් කවුන්සිලයේ චර්යාධර්ම සංග්‍රහය අනුව භාෂාව, ක්‍රියාව හෝ අභිනය භාවිත කොට අපහාස කිරීම දඬුවම් ලැබිය හැකි වරදක් වන අතර ඇයට එරෙහි මේ දඬුවම තරග තීරක දකුණු අප්‍රිකානු ජාතික ෂැන්ඩ්‍රි ෆ්‍රිට්ස් මහත්මිය විසින් යෝජනා කළ අතර, එයට රෙඩ්ඩි අවනත විය.
කෙසේවෙතත් කඩුලු තුනක් දවාගැනීම හේතුවෙන් දක්ෂතම ක්‍රීඩිකාවට හිමි සම්මානය දිනා ගත්තාය.
