Unusuma Writer

රටේ ජනතාව තුළ තවදුරටත් භීතියත්, මිථ්‍යාවත් වැපිරීමට ජාතික ජන බලවේග පාලන කාලය තුළ ඉඩ දෙන්නේ නැතැයි කම්කරු අමාත්‍ය අනිල් ජයන්ත පාර්ලිමේන්තුවේදී සදහන් කරයි.

අමාත්‍ය අනිල් ජයන්ත සදහන් කළේ,

“එම භීතිය සමාජය තුළත්, ආර්ථිකය තුළත් පසුගිය කාලය තුළ දකින්න ලැබුණා. ඉදිරියටත් අපි මිථ්‍යාවන් සමාජගත කරන්න දෙන්නේ නැහැ. ඒ නිසා අපේ ක්‍රමවේදය සාර්ථකව ඉදිරියට ගෙන යනවා.

අපේ නිවැරදි ක්‍රම වේදය තුළ සෝඩා බෝතලය කැඩුවා වගේ මැජික්, මිථ්‍යාවන් දකින්න බැරි වෙනවා. සීනි බදු වලට රුපියල් 50ක් තිබූ එක රුපියල් 25ට බැස්සුවා. එහිදී වංචා පිළිබඳ චෝදනා එල්ල වුණා.

වෙළෙඳපොළේ කරන පුංචි විජ්ජාවන් තුළින් ආර්ථිකය හසුරුන්න නොවෙයි, අපි ක්‍රම වේදයකට අනුව ආර්ථිකය හසුරුවන්න කටයුතු කරනවා. ඒ නිසා ආර්ථිකයක සැබෑ ප්‍රතිඵලය දවසින් දෙකෙන් දකින්න බැහැ. අපේ ආණ්ඩුවට තවම මාස කිහිපයයි.

ඒක කවුරුත් දන්නවා. පිළිගන්නවා. මේ ටික කාලයේදී ගත්ත ක්‍රියාමාර්ගවල මහා විශාල ආර්ථික පුනරුදයක් වෙන්න බැහැ. එහෙම වෙලා නැහැ. අවුරුදු 70 ගණනක බිඳ දමපු ආර්ථිකයක් මාස 2 කින් පුනරුදයක් වුණා කියලා අපි කියන්නේ නැහැ.”

නියෝජ්‍ය ආරක්ෂක අමාත්‍ය මේජර් ජෙනරල් අරුණ ජයසේකර (විශ්‍රාමික) සහ ඉන්දීය මහ කොමසාරිස් කාර්යාලයේ ආරක්‍ෂක උපදේශක කපිතාන් ආනන්ද් මුකුන්දන් සහ සහකාර ආරක්ෂක උපදේශක ලුතිනන් කර්නල් මන්දීප් සිං නේගි අතර හමුවක් කොළඹ නියෝජ්‍ය අමාත්‍යවරයාගේ කාර්යාලයේදී පැවැත්විණ.

මෙම සුහද හමුව අතරතුර ජනවාරි (26) වන දින ඉන්දියාවේ 76 වන ජන රජ දින සැමරුම් උත්සවයට සහභාගී වන ලෙස කපිතාන් මුකුන්දන් නියෝජ්‍ය අමාත්‍යවරයාට නිල ආරාධනයක් කළ අතර ද්විපාර්ශ්වික ආරක්ෂක සහයෝගීතාව තවදුරටත් වැඩිදියුණු කිරීම සඳහා ඇති අවස්ථා පිලිබඳවද දෙපාර්ශ්වයම මෙහිදී සාකච්ඡා කළහ.

තවද ශ්‍රී ලංකාව සහ ඉන්දියාව අතර පවතින දිගුකාලීන හා ශක්තිමත් ආරක්‍ෂක සහයෝගීතාව පිළිබඳව මෙම හමුවේදී සාකච්ඡා වූ අතර දෙරට අතර ශක්තිමත් පුද්ගලාන්තර සම්බන්ධතා වර්ධනය කිරීමේ වැදගත්කම නියෝජ්‍ය අමාත්‍යවරයා මෙම අවස්ථාවේ අවධාරණය කළ අතර ඉන්දියාවෙන් අඛණ්ඩව ලැබෙන හමුදා සහාය පිළිබඳ සිය කෘතඥතාව පළ කළේය.

මත්ද්‍රව්‍ය විරෝධී මෙහෙයුම් සදහා ඉන්දියාව දක්වන සහයෝගය මේජර් ජෙනරල් ජයසේකර අගය කළ අතර මෙම දැවෙන ගැටලුවට එරෙහිව සටන් කිරීම සදහා අන්‍යෝන්‍ය කැපවීම මෙහිදී අවධාරණය කළේය.

මෙම හමුව ශ්‍රී ලංකාව සහ ඉන්දියාව අතර කල් පවතින මිත්‍රත්වය සහ සහයෝගීතා තවදුරටත් ශක්තිමත් කළේය.

මීගමුව බන්ධනාගාරයේ දූෂණ, වංචා, අක්‍රමිකතා නතර කර රජයේ ඒකාබද්ධ අරමුදලට පසුගිය වසරේ රුපියල් කෝටි 4ක මුදලක් ඉතිරි කර දුන් බව එහි සහකාර අධිකාරි ජීවක ඉන්ද්‍රජිත් ප්‍රනාන්දු සදහන් කරයි.

මේ හේතුවෙන් සිරකරුවන්ගේ ආහාර වේලට සෑම ඉරිදා දිනයකදීම ෆ්‍රයිඩ් රයිස් ආහාර වට්ටෝරුවක් සකස් කර ඇති බවද එහි සහකාර අධිකාරි ජීවක ඉන්ද්‍රජිත් ප්‍රනාන්දු සදහන් කරයි.

රිමාන්ඩ් සිරකරුවන් 1700ක් පමණ සිටින අතර සෑම රාජකාරියක්ම කිරීම සදහා යෙදවිය හැකි නිලධාරීන් සිටිනුයේ 150ක් තරම් සුළු සංඛ්‍යාවක් බවත් දෛනික සලාකය, පොල්කටු, ගෑස්, දර, ඉන්ධන ඇතුළු දේ තුළින් මෙම මුදල ඉතිරිකර ගත් බවද සදහන් කරයි.

නීති විරෝධී ජංගම දුරකථන ඇතුළු මත්ද්‍රව්‍ය නොමැති එකම බන්ධනාගාරය මෙය වීම විශේෂත්වයක් බවද සහකාර අධිකාරි ජීවක ඉන්ද්‍රජිත් ප්‍රනාන්දු සදහන් කරයි.

ඉන්දියානු ධීවරයන් උතුරු මුහුදු සීමාවට අනවසරයෙන් ඇතුළු වී ට්‍රෝලර් යාත්‍රා මගින් මසුන් ඇල්ලීමේදී දැල්වලට පැටලෙන සහ ට්‍රෝලර් යාත්‍රාවල ගැටීමෙන් අනතුරට ලක්වන කැස්බෑවුන් විශාල ප්‍රමාණයක් මේ වනවිට උතුරු මුහුදට ගොඩගසන බව උතුරේ ධීවර සංගම් සදහන් කරයි.

ගෙවී ගිය මාසයක පමණ කාලය තුළදී යාපනය කෂුරිනා, කෝවලන් සහ කරෙයිනගර් මුහුදු තීරවලට මියගිය කැස් බෑවුන් 100කට අධික ප්‍රමාණයක් ගොඩ ගසා ඇති අතර තුවාල ලැබූ කැස්බෑවුන්ද විශාල ප්‍රමාණයක් ගොඩගසා තිබූ බව යාපනයේ ධීවරයෝ සදහන් කරයි.

ඉන්දියානු ධීවරයන්ගේ ට්‍රෝලර් යාත්‍රාවල දැල් ආම්පන්න විශාල බැවින් එම යාත්‍රාවල ගැටෙන කැස්බෑවුන් දෛනිකව මුහුදු තීරයන්ට ගොඩ ගැසීම වැඩි වී ඇති අතර මේ පිළිබඳව කිසිදු බලධාරියකු පියවර ගෙන නොමැති බවද යාපනයේ ධීවරයෝ සදහන් කරයි.

මේ අතර මුහුදු තීරවලට ගොඩගසා සිටින කැස්බෑවුන් විශාල ප්‍රමාණයක් නාවික හමුදා සෙබළුන් මෙන්ම ධීවරයන් විසින් බේරාගෙන මුහුදට මුදාහරිනු ලබයි.