මෙටා සමාගමේ ෆේස්බුක් (Facebook) සහ ඉන්ස්ටග්‍රෑම් (Instagram) සමාජ මාධ්‍ය ජාල සම්බන්ධයෙන් යුරෝපා සංගමය විමර්ශනයක් ආරම්භ කර ඇත.
එම සමාජ මාධ්‍ය ජාලවල ළමා ආරක්ෂාව සම්බන්ධයෙන් යුරෝපා සංගමය පනවා ඇති නීති උල්ලංඝනය කර ඇති බවට මෙටා සමාගමට එල්ලවී ඇති චෝදනා මත එම විමර්ශනය ආරම්භ කර ඇත.
සමාජ මාධ්‍ය හරහා දරුවන් තුළ විවිධ ඇබ්බැහිවීම් නිර්මාණය වන බවත් ඒ හේතුවෙන් දරුවන්ගේ මානසික සෞඛ්‍යයට හානිවන බවද යුරෝපා සංගමය සදහන් කරයි.
කෙසේ හෝ මෙටා සමාගම දරුවන්ගේ ආරක්ෂාව පිළිබඳ නීති උල්ලංඝනය කර ඇති බවට අනාවරණ වුවහොත් මෙටා සමාගමට එහි ගෝලීය පිරිවැටුමෙන් 6%ක දඩයක් පැනවිය හැකි බවද සදහන් කරයි.
සමාජ මාධ්‍ය භාවිතයේදී පරිශීලිකයින්ට ස්වයංක්‍රීයව වීඩියෝ සහ ඡායාරූප නිර්දේශ කෙරෙන ඇල්ගොරිදමය පිළිබඳව විමර්ශනය කෙරෙන අතර ෆේස්බුක් ගිණුමක් සැකසීමේදී වයස සත්‍යාපනය කිරීමේ ක්‍රමය පිළිබඳවද එම සංගමයේ අවධානය යොමු කර ඇත.
