මීට පෙර මිනිසුන් තුළ තහවුරු නොවූ කුරුළු උණ රෝගයක් වැළඳීමෙන් මෙක්සිකෝවේ පුද්ගලයෙකු මිය ගිය බව ලෝක සෞඛ්‍ය සංවිධානය බදාදා (05) ප්‍රකාශ කළේය.
මෙක්සිකෝ නගරයේ රෝහල් ගත කර සිටි 59 හැවිරිදි රෝගියෙකුගෙන් මෙසේ වෛරසය පිළිබඳ අනාවරණය වී ඇත.
එම රෝගියා තුල උණ, හුස්ම හිරවීම සහ පාචනය වැනි සංකූළතා ඇතිවී සතියක පමණ කාලයක් ප්‍රතිකාර ලබමින් සිටියදී ඔහු මියගොස් ඇති බව පැවසේ. එය H5N2 ලෙස හැඳින්වෙන කුරුළු උණ වයිරස ප්‍රභේදය මිනිසෙකුට වැළඳීමේ පළමු අවස්ථාව ලෙස රසායනාගාර පරීක්ෂණ වලින් අනාවරණය වී ඇති ඇත.
මධ්‍යම මෙක්සිකෝවේ ජීවත් වූ මියගිය රෝගියා සතුන්ට නිරාවරණය වී ඇති බවක්ද තහවුරු වී නොමැති බවද පැවසේ. එම පුද්ගලයා ජීවත් වූ මෙක්සිකානු ප්‍රාන්තයේ කුකුළු මස් වල කුරුළු උණ වාර්තා වී ඇතත් ඔහු වෛරසයට නිරාවරණය වූයේ කෙසේදැයි මෙතෙක් ස්ථිරව හඳුනාගෙන නැත.
