ඉන්දියාවේ මුම්බායි නගරයේ හදිසි කුණාටු තත්වයක් අතරතුර යෝධ දැන්වීම් පුවරුවක් කඩා වැටීමෙන් මේ වනවිට පුද්ගලයින් 8 දෙනෙකු මියගොස් 60 දෙනෙකු පමණ තුවාල ලබා ඇති බව ඉන්දීය බලධාරීහු පවසති.
පොලිසිය සඳහන් කළේ මීටර් 70 ත් 50 ත් ප්‍රමාණයේ දැන්වීම් පුවරුවක් මෙසේ නිවාසකිහිපයක් සහ ඉන්ධන පිරවුම්හලක් මතට කඩා වැටී ඇති බවයි.
ගලවා ගැනීමේ මෙහෙයුම් තවදුරටත් ක්‍රියාත්මක අතර තවමත් පුද්ගලයන් 20 ත් 30 ත් අතර ප්‍රමාණයක් සිරවී සිටින බවට සැකයක් පවතින බව ගලවා ගැනීම් අංශ පවසයි.
කුණාටු තත්ත්වයක් හේතුවෙන් මුම්බායි නගරයට වර්ෂාවෙන්, ගස් කඩා වැටීම් වලින් සහ විදුලිය විසන්ධි වීමෙන් ආදී කාරණා වලින් දැඩිව බලපෑම් එල්ලවී ඇති පසුබිමක මෙම ඛේදජනක සිදුවීම වාර්තා වේ.
ඉන්දීය ප්‍රවෘත්ති නාලිකාවල දර්ශනවල දැක්වෙන්නේ නගරයේ නැඟෙනහිර තදාසන්න ප්‍රදේශයක් වන ඝට්කෝපාර් හි කාර්යබහුල මාර්ගයක් අසල ඇති විශාල දැන්වීම් පුවරුව සුළඟට පැද්දෙමින් ගොඩනැගිලි මතට කඩා වැටෙන ආකාරයයි.
සමාජ මාධ්‍යවල ඔස්සේ සංසරණය වන වීඩියෝ වල එම දැන්වීම් පුවරුවට යට වූ වාහන රැසක් විනාශ වී ඇති අයුරුද දැක්වේ
සිද්ධිය වූ ස්ථානයේ හදිසි කණ්ඩායම් සුන්බුන් ඉවත්කරනා ආකාරයද එම වීඩියෝ දර්ශන වල දැකගත හැකියි, ගලවාගැනීමේ කණ්ඩායම් විසින් වැටී ඇති දැන්වීම් පුවරුවේ ලෝහ බාල්ක කපා දමමින් මිනිසුන් මුදාගැනීමට උත්සාහ කරනා ආකාරය පෙනේ,
ඉන්දීය බලධාරීන් පවසන්නේ මරණ ප්‍රමාණය තවදුරටත් ඉහළ යා හැකි බවයි.
