මාතර මහාධිකරණ විනිසුරු චාමර තෙන්නකෝන් මහතා තීන්දුවක් ලබාදෙමින් නියෝග කරන ලද්දේ තිස්සමහාරාම පොලිසයේ හිටපු ස්ථානාධිපතිවරයා ඇතුළු පෙලිස් නිලධාරීන් තිදෙනකුට වසර 07 බැගින් බරපතල වැඩ සහිත සිරදඬුවම් නියම කිරීමටයි.
ඒ හෝටල් හිමියකු ඇතුළු එහි සේවකයන් පස් දෙනකු පැහැරගෙන ගෙස් කෲරත්වයට පත් කිරීමේ චෝදනාවන්ට වරදකරුවන් වීම හේතුවෙනි.
එහිදී විනිසුරුවරයා කෲරත්වයට පත්වු පුද්ගලයන් පස්දෙනාට රුපිල් ලක්‍ෂ 05 බැගින් වන්දි ගෙවීමටද නියම කළේය.
එමෙන්ම විත්තිකරුවන්ට රුපියල් 10,000/- බැගින් දඩ මුදල්ද නියම කළේ විනිසුරුවරයා ප්‍රකාශයක් කරමින් පවසා සිටියේ විත්තිකරුවන්ට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇති බවයි.
මෙලෙස දඬුවම් නියම වුයේ තිස්සමහාරාම පොලිසයේ ස්ථානාධිපතිවරයාව සිට දැනට කොස්ගොඩ පොලිසියේ ස්ථානාධිපතිවයා ලෙස කටයුතු කරනා ප්‍රභාත් දේශබන්ධු, තිස්සමහාරාම පොලිසයේ උප පොලිස් පරීක්‍ෂවරයකු වශයෙන් කටයුතු කළ දැනට වැල්ලවත්ත පොලිසියේ උප පොලිස් පරීක්‍ෂවරයකු ලෙස කටයුතු කරනා සන්නස්ගල සහ තිස්සමහාරාම පොලිසයේ සැරයන්වරයකු වශයෙන් කටයුතු කර මේ වන විට වැඩ තහනමකට ලක්ව සිටින කුලතුංග නමැති නිලධාරීන් හටයි.
මෙම නඩුවේදී විත්තිකරුවන්ට එරෙහිව නීතීපතිවරයා විසින් ගොනුකර තිබූ චෝදනාව වූයේ 2003 වර්ෂයේදී තිස්සමහාරාම ප්‍රදේශයේදී හෝටලයක හිමිකරු සහ එහි සේවකයන් වශයෙන් කටයුතු කළ සිව්දෙනකු පැහැරගෙන ඔවුන් රඳවාගෙන කෲරත්වයට පත් කිරීමයි.
තිස්සමහාරාම ප්‍රදේශයේ ‘තිස්ස විලේජ්’ නමැති හෝටලයේ හිමිකරු වන උදය ශාන්ත දිසානායක කොඩිතුවක්කු එහි සේවකයන් වශයෙන් කටයුතු කළ සමන්ත, අජන්ත, රුවන් සහ එවකට විශ්ව විද්‍යාල සිසුවකු වශයෙන් සිටි සුජීව දිසානායක නමැත්තන් මෙසේ අගතියට පත්වූ පිරිසට අයත්.
මෙම නඩු විභාගයේදී අනාවරණය වූයේ ‘තිස්ස විලේජ්’ නමැති හෝටලය සම්බන්ධයෙන් එහි හිමිකරු සහ තවත් පිරිසක් අතර ඇති වු ආරඅවුලක් හේතූවෙන් විත්තිකාර පොලිස් නිලධාරීන් හෝටලයේ හිමිකරු සහ එහි සේවකයන් පැහැරගෙන ගොස් ඔවුන් රඳවාගෙන කෲරත්වයට පත් කර ගිනි අවි, බෝම්බ ලඟ තබාගත් බවට ව්‍යාජව චෝදනා කරමින් ඔවුන් අධිකරණයට ඉදිරිපත් කර රිමාන්ඩ් බාරයට පත් කර ඇති බවයි.
සිදුවීමෙන් පසු හෝටලයේ හිමිකරු ඇතුළු සේවකයන් විසින් ශ්‍රේෂ්ඨාධිකරණයේ මුලික අයිතිවාසිකම් නඩුවක් පැවරීමෙන් අනතුරුව වගඋත්තරකාර පොලිස් නිලධාරීන් විසින් පෙත්සම්කාර හෝටලයේ හිමිකරු ඇතුළු සේවකයින්ගේ මුලික අයිතිවාසිකම් කඩ කර ඇති බවට තීන්දු වූ අතර ඉන් පසුව පොලිස මුලස්ථානයේ විශේෂ විමර්ශන ඒකකය විසින් කරන ලද විමර්ශනයකින් අනතුරුව විත්තිකාර පොලිස් නිලධාරීන්ට එරෙහිව නීතීපතිවරයා මඟින් මාතර මහාධිකරණයේ නඩු පවරන ලදී.
සිදුවීම සම්බන්ධයෙන් වසර 19ක කාලයක් පුරා පැවැති දීර්ඝ නඩු විභාගයේදී විත්තිකරුවන්ට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කළ අතර එම සියලුම චෝදනාවන්ට විත්තිකරුවන් වරදකරුවන් බව විනිසුරුවරයා තීරණය කළේය.
