රනිල් වික්‍රමසිංහ වත්මන් ජනාධිපති “අලියා” ලකුණින් ජනාධිපතිවරණය සඳහා ඉදිරිපත් වුවහොත් තමන් ඔහුට සහයෝගය නොදක්වන බව ආණ්ඩු පක්ෂ ප්‍රධාන සංවිධායක, අමාත්‍ය ප්‍රසන්න රණතුංග ගම්පහ දිස්ත්‍රික්කයේ හිටපු පළාත් පාලන ප්‍රධානීන් සමඟ, උඩුගම්පළ, සිය දේශපාලන කාර්යාලයේදී අද (2) පැවැති සාකච්ඡාවකට එක්වෙමින් පැවසීය.
“සියලුම දෙනාට එකඟවිය හැකි පොදු ලකුණකින් අපේක්ෂකයකු ලෙස රනිල් වික්‍රමසිංහ ජනාධිපතිවරණය වෙනුවෙන් ඉදිරිපත්විය යුතු බවත්, විරුද්ධවාදීන් කුමක් පැවසූවද එක්සත් ජාතික පක්ෂයට සම්බන්ධවීමට තමන්ගේ කිසිඳු සූදානමක් නැති බවත් අමාත්‍යවරයා පැවසීය.
වත්මන් ජනාධිපති රනිල් වික්‍රමසිංහට නැවත වරක් ජනාධිපතිධූරයට පත්වීමටනම් ශ්‍රී ලංකා පොදුජන පෙරමුණේ සහයෝග අත්‍යාවශ්‍ය වන බව අමාත්‍යවරයා වැඩිදුරටත් සඳහන් කළේය.
මගේ දැනුමට අනුව නාමල් රාජපක්ෂ මහතා ජනාධිපති අපේක්ෂකයා ලෙස නම් කිරීම සම්බන්ධයෙන් මේ වන විට පක්ෂය තුළ කිසිදු සාකච්ඡාවක් නැහැ.
එවැනි තනතුරක් ලබා ගැනීමට හොඳ පළපුරුද්දක් අවශ්‍ය බව පැහැදිලියි. නාමල් රාජපක්ෂගේ වයස සලකා බලන විට ඔහුට ජනාධිපති අපේක්ෂකයා වීමට ඕනෑ තරම් කාලය තිබෙනවා, පෞද්ගලිකව ඔහු ඉදිරි ජනාධිපතිවරණයේ අපේක්ෂකයෙකු ලෙස යෝජනා කළහොත් මම මගේ සහයෝගය ලබා දෙන්නේ නැහැ.
දේශපාලනය සම්බන්ධයෙන් මගේ ස්ථාවරය මධ්‍යස්ථයි. මේ වන විට පක්ෂයෙන් සියයට 80ක් පමණ රනිල් වික්‍රමසිංහ ජනාධිපති අපේක්ෂකයා ලෙස අනුමත කිරීමට එකඟයි.
එපමණක් නොව අපේ පක්ෂයේ ජ්‍යෙෂ්ඨ නායකයන් වත්මන් ජනාධිපතිවරයා සමඟ ජනාධිපතිවරණය සහ අපේක්ෂකත්වය සම්බන්ධයෙන් සාකච්ඡා කරමින් සිටිනවා. මෙම සාකච්ඡාවල ප්‍රතිඵල මත පක්ෂයේ අවසන් තීරණය ගන්නවා.
අපේ අතීතය ආවර්ජනය කරන විට අපේ දේශපාලන කණ්ඩායම අවස්ථා 27කදී රනිල් වික්‍රමසිංහ පරාජය කළා. කෙසේ වෙතත්, තීරණාත්මක කාලවලදී, ඔහු තම හැකියාවන් ප්‍රදර්ශනය කළා.
ඊට විරුද්ධව, අනුර කුමාර, සජිත් ප්‍රේමදාස වැනි පුද්ගලයන් හුදෙක් දේශපාලන ආකර්ෂණය ලබාගැනීම සඳහා පුරසාරම් දෙඩුවා විතරයි. “
