Out of the box (Sinhala)

අමාත්‍ය වෛද්‍ය නලින්ද ජයතිස්ස මහතා අද (23) පාර්ලිමේන්තුව අමතමින් කියා සිටියේ කෙතරම් උත්සාහ දැරුවත් ජනතාව මත පටවා ඇති හිටපු ජනාධිපතිවරුන්, ආර්යාවන් හා ඇමතිවරුන් නඩත්තු කිරීමේ බරෙන් ජනතාව නියත වශයෙන් නිදහස් කිරීමට කටයුතු කරනා බවයි.

අමාත්‍යවරයා වැඩිදුරටත් කියා සිටියේ “මහින්ද රාජපක්ෂගේ මන්දිරය බේරා ගැනීමේ සංසදය” මැයෙන් පක්ෂ භේදයකින් තොරව විපක්ෂ මන්ත්‍රීවරුන් විසින් සංසදයක් නිර්මාණය කරගෙන ඇති බවයි.

මාසික කුලිය රුපියල් ලක්ෂ 46 ක් පමණ වන වර්ග අඩි 30,554 ක පිහිටි මහින්ද රාජපක්ෂ මහතාගේ මෙම නිවස අතීතයේදී කුඩා එකක් බවත් පසුව විවිධ ඉඩම් කොටස් එකතු කර මේ වනවිට අක්කරයක පමණ ඉඩමක මෙම නිවස ගොඩ නගා ඇති බවද අමාත්‍යවරයා සඳහන් කළේය.

අමාත්‍යවරයා පෙන්වා දුන්නේ පසුගිය වසර කිහිපය තුළ පමණක් මෙම නිවස අලුත්වැඩියාවට රුපියල් ලක්ෂ 430 කට වඩා අධික මුදලක් වැය කර ඇති බවත් එහි අලුතින් විදුලි සෝපාන යන්ත්‍ර පවා සවිකර ඇති බවත් ය.

නිවසින් ඉවත්වන ලෙස පවසනකම් නොසිට ඉවත්ව යන ලෙසත් අමාත්‍ය වෛද්‍ය නලින්ද ජයතිස්ස මහතා සඳහන් කළේය.

ඊයේ (22) පාර්ලිමේන්තුවේදී සජබ මන්ත්‍රී චමින්ද විජේසිරි විසින් ආණ්ඩු පක්ෂයේ මන්ත්‍රීවරු විසින් පාර්ලිමේන්තුවේ කැන්ටිම ක්ලීන් කරනා බවත්, ප්‍රමාද වුවහොත් කෑමට ඉතිරිවන්නේ දංකුඩ පමණක් බවත් යැයි කියමින් සිදුකළ අපහාසාත්මක ප්‍රකාශය සම්බන්ධයෙන් ආන්ඩු පාර්ශවය විසින් තීරණයක් ගෙන තිබේ.

එම චෝදනාවට පිළිතුරු ලබාදෙමින් සභානායක අමාත්‍ය බිමල් රත්නායක මහතා පැවසූවේ පාර්ලිමේන්තුවේ ආහාර වේලක මිල වැඩි කිරීමට අදාළ යෝජනාව ළඟදීම කැබිනට් මණ්ඩලයට යොමු කර අනුමැතිය ලබා ගන්නා බවයි.

ඔහු කියා සිටියේ අදාළ යෝජනාවට අද (23) දිනයේ පාර්ලිමේන්තු ගෘහ කාරක සභාවේ අනුමැතිය ලැබෙනු ඇතැයි අපේක්‍ෂාවෙන් පසුවන බවයි. 

ඒ අනුව පාර්ලිමේන්තු ආපන ශාලාවෙන් ලබාගන්නා සියළුම ආහාර පාන සඳහා ඊට අදාළ වෙළඳපොල මිල ප්‍රමාණයන් අයකිරීමට කටයුතු කරනා බවද ඒ අනුව ආහාර වේලක් සඳහා රුපියල් 2000-3000ක් අතර මිලක් අයවිය යුතු බවද අමාත්‍යවරයා වැඩිදුරටත් පැවසීය.

මේ වනවිට පාර්ලිමේන්තු ආහාර වේලක් සඳහා අයකරන මුදල රුපියල් 300ක් වන අතර එය 2022 වසරේ සිට ක්‍රියාත්මකයි.

කොළඹ අපරාධ කොට්ඨාසය පවසන්නේ එල් ටි ටි ඊ සාමාජිකයන් සමඟ සම්බන්ධතා පවත්වමින් ගිණි අවි ජාවාරම් කරන ලදැයි යන චෝදනාව මත රැඳවුම් නියෝග මත ප්‍රශ්න කරන සිවිල් ආරක්ෂක නියාමකවරයාගෙන් අනාවරණය වූ තොරතුරු අනුව තවත් ගිනි අවියක් හා ජීව උණ්ඩ තොගයක් සොයා ගැනීමට හැකිවූ බවයි.

මෙලෙස සොයාගෙන ඇත්තේ, ටි 56 ජීව උණ්ඩ 220 ක්, GPMG වර්ගේ ගිණි අවි සඳහා යොදන ජීව උණ්ඩ 01ක්, ගුවන් යානා නාශක අධි සඳහා යොදන ජීව උණ්ඩ 01 ක් හා මෙරට නිෂ්පාදිත බෝර 12 වර්ගයේ ගිනි අවියකි.

සැකකරු සේවය කර ඇත්තේ, පොළොන්නරුව කඳවුරට අනුයුක්ත වැලිකන්ද පොලිස් ස්ථානයේ බව සඳහන් වේ.

සැකකරු අනාවරණය කළ තොරතුරු අනුව ඔහු පදිංචි වැලිකන්ද, රුහුණු කෙත නිවස ආසන්නයේ සුභ සාධක සමිතියට අයත් අත්හැර දැමූ ගොඩනැගිල්ලක් තුළ සඟවා තිබියදී මෙම ගිනි අවිය සහ ජීව උණ්ඩ තොගය සොයා ගැනීමට හැකි වී ඇත.

පසුගිය දිනක හිටපු ජනපතිවරුන්ට ලබාදී ඇති නිල නිවාස සම්බන්ධයෙන් ජනපති අනුර කුමාර දිසානායක මහතා සිදු කළ ප්‍රකාශය සම්බන්ධයෙන් හිටපු ජනපති මහින්ද රාජපක්ෂ මහතා පිළිතුරු ලබා දුන් අතර ඊයේ (21) පැවැති කැබිනට් තීරණ දැනුම්දීමේ මාධ්‍ය සාකච්ඡාවේදීද මේ පිළිබඳව අවධානය යොමුවිය.

එහිදී කැබිනට් ප්‍රකාශක අමාත්‍ය නලින්ද ජයතිස්ස මහතා පැවසූවේ රජය දැනුම් දෙන තෙක් නොසිට හිටපු ජනපති මහින්ද රාජපක්ෂ මහතාට දැන්ම නිවසින් ඉවත්විය හැකි බවයි.

එහිදී වැඩිදුරටත් අදහස් දැක්වූ නලින්ද ජයතිස්ස මහතා,

“1986 ජනාධිපතිවරයන්ගේ හිමිකම් පනත සම්මත කරපු පාර්ලිමේන්තුවේ මහින්ද රාජපක්ෂ මන්ත්‍රීවරයා හිටියේ නැති වුණාට ඊට පස්සේ පාර්ලිමේන්තු ගණනාවක් නියොජනය කළා.

මේ පනතේ ක්‍රියාත්මක කරපු ලංකාවේ ජනාධිපතිවරයා ලෙස හිටියා. හිටපු ජනාධිපතිවරයාගේ හෝ හිටපු ජනපතිවරයාගේ වැන්දඹුව වෙනුවෙන් වාසය සඳහා උචිත නිවසක් නොසපයන අවස්ථාවක හිටපු ජනාධිපතිවරයාට හෝ හිටපු ජනාධිපතිවරයාගේ වැන්දඹුවට හෝ ගෙවිය යුතු මාසික විශ්‍රාම වැටුපෙන් තුනෙන් එකක දීමනාවක් හිටපු ජනපතිවරයාට හෝ වැන්දඹුවට ගෙවිය යුතුයි පනතේ තියෙනවා.

මම හිතනවා මහින්ද රාජපක්ෂ හිටපු ජනපතිවරයාට මේක තේරුම් ගන්න පුළුවන් ඇති කියලා. කියනකම් ඉන්න දෙයක් නෑ යන්නයි තියෙන්නේ. එක්කෝ ඒක ගෙවාගෙන ඉන්න පුළුවන්. එතුමාට කරදඩු උස්වුණ දරුවන් තිදෙනෙක් ඉන්නවා. එයාලට තමන්ගේ අම්මා තාත්තා බලාගන්න පුළුවන්. මේක සියලුම හිටපු ජනපතිවරුන්ට අදාළයි”

ශ්‍රී ලංකා පොලිසිය මගින් CCTV කැමරා ඔස්සේ රථවාහන වැරදි සම්බන්ධයෙන් නිරීක්‍ෂණය කර එම රථවාහන රියදුරන් සදහා නීතිය ක්‍රියාත්මක කිරීමේ ක්‍රියාවලිය කාර්යක්ෂමව හා නව තාක්ෂණය ඔස්සේ පවත්වාගෙන යාම සදහා නව මෘදුකාංගයක් Prima Management Services (pvt) Ltd ආයතනයේ දායකත්වයෙන් ශ්‍රී ලංකා පොලිසිය වෙත පිරිනැමීම අද (21) සිදු විය.

වැඩබලන පොලිස්පති නීතිඥ ප්‍රියන්ත වීරසූරිය මහතා සහ CCTV දිසාව භාර නියෝජ්‍ය පොලිස්පති ටී. පී. ගමලත් මහතාගේ ප්‍රධානත්වයෙන් එහි කටයුතු සිදු විය.

කොළඹ නගරය ප්‍රධානව තදාසන්න නගර ආශ්‍රිතව ස්ථාපිත කර ඇති පොලිස් CCTV කැමරා පද්ධතීන් මගින් ලබාගන්නා රථ වාහන වැරදි ඇතුලත් වීඩියෝ දර්ශන ඇසුරින් යම් මාර්ග නීති කඩකිරීමක් සිදුකරන රියදුරෙකුට එරෙහිව සිදුකළ වැරැද්දට අදාළ දඩ පත්‍රිකාව රථය හිමිකරුගේ නිවසටම යොමුකරන ක්‍රමවේදය ශ්‍රී ලංකා පොලිසිය විසින් 2024 වසරේ පෙබරවාරි මස ආරම්භ කළේය.

එම ක්‍රියාවලිය සඳහා මේ දක්වා යොදාගත් මෘදුකාංගයේ සංකීර්ණත්වය හේතුවෙන් අදාළ රාජකාරිය සිදුකරන පොලිස් නිලධාරීන්ට දැඩි වෙහෙසක් දැරීමට සිදුවූ අතර මෙම නව මෘදුකාංගය හරහා එම කටයුතු කාර්‍යක්ෂම කිරීම පොලීසියේ අරමුණයි.

පසුගියදා මහත් ආන්දෝලනයට තුඩු දුන් පුවතක් වූ දවුලගල පොලිස් වසමේ හපුගහයට තැන්න ප්‍රදේශයේදී 18 හැවිරිදි පාසල් සිසුවියක පුද්ගලයෙකු විසින් පැහැරගෙන යාමේ සිද්ධිය වූ පොලිස් වසමේ සිටි ඉහළ නිලධාරීන් සම්බන්ධයෙන් පොලිසියේ අභ්‍යන්තර විමර්ශනයක් සිදුකිරීමෙන් අනතුරුව විනය පියවර ගැනීමට කටයුතු කර ඇත.

අදාළ දිනයේ පොලිසිය නිසි ලෙස රාජකාරී නොකිරීමේ චෝදනා මත එම පොලිස් ස්ථානයේ එදින වැඩ බලන ස්ථානාධිපතිවරයා වශයෙන් කටයුතු කළ නිලධාරියාගේ වැඩ තහනම් කර කාන්තා ප්‍රධාන පොලිස් පරීක්ෂකවරියක සහ උප පොලිස් පරීක්ෂකවරයෙකු ස්ථාන මාරු කිරීමටත් පියවර ගෙන තිබේ.

ඉකුත් ජනවාරි මස19 වැනි දින පෙරවරු 7.30 ට පමණ දවුලගල පොලිස් වසමේ හපුගහයට තැන්න ප්‍රදේශයේදී මෙම පැහැර ගැනීම සිදුවන අවස්ථාවේදී එම ස්ථානයෙන් ගමන් කළ බව කියන ගම්පොළ පොලිසියේ රාජකාරියේ නියුතු නිලධාරියකු සිද්ධිය සම්බන්ධයෙන් දවුලගල පොලීසියේ මෙහෙයුම් මැදිරියට දැනුම් දී ඇතත් ඒ සම්බන්ධයෙන් දවුලගල පොලිසිය ක්‍රියාත්මක නොවීමේ චෝදනාමත මෙම විනය පියවර ගෙන ඇති බව වාර්තා වේ.

එසේ වැඩ තහනම් කර ඇත්තේ, සිද්ධිය වූ දිනයේ දී දවුලගල පොලිස් ස්ථානයේ වැඩ බලන ස්ථානාධිපතිවරයා වශයෙන් සිටි ප්‍රධාන පොලිස් පරීක්ෂක ආර්.ඒ.එස්.එස්. රණසිංහ මහතාගේ වන අතර එම පොලිස් ස්ථානයේ රාජකාරියේ නියුතුව සිටි කාන්තා ප්‍රධාන පොලිස් පරීක්ෂක ජී.ජී. කුසුම් ගමගේ මහත්මියට කඩුගන්නාව පොලිසියටද උප පොලිස් පරීක්ෂක ජී.ඒ.එස්. නිමල්සිරි (අපරාධ අංශයේ ස්ථානාධිපති) වෙලම්බොඩ පොලිසියටද ස්ථාන මාරු ලබා දී තිබේ.

මධ්‍යම පළාත භාර ජ්‍යෙෂ්ඨ නියෝජ්‍ය පොලිස්පති ලලිත් පතිනායක මහතාගේ නියෝග මත සිදුකළ විමර්ශනයක් මත මෙම විනය පියවර ගෙන තිබේ.