ඉරාන ජනාධිපති ඉබ්‍රහිම් රයිසි ගමන් ගත් හෙලිකොප්ටරය අතුරුදන් වීමත් සමග එරට ජනතාව දැඩි ලෙස කලබල වී ඇති බව විදෙස් මාධ්‍ය වාර්තා කරයි.
ඉරාන ජනාධිපතිවරයා, විදේශ අමාත්‍යවරයා ඇතුළු ඉහළ පෙළේ නිලධාරීන් පිරිසක් ගමන්කරමින් සිටියදී අනතුරට ලක්වූ හෙලිකොප්ටර් යානය සොයා එරට ආරක්ෂක අංශ මෙහෙයුමක් ආරම්භ කර ඇත.
එම හෙලිකොප්ටර් යානය අධික මීදුම සහිත අයහපත් කාලගුණය හේතුවෙන් කඳුකර ප්‍රදේශයකට ගොඩබා ඇති අතර ජනාධිපතිවරයා ඇතුළු පිරිස සිටින ස්ථානයට මෙතෙක් කිසිවෙකුට ළඟාවීමට නොහැකිවී ඇත.
මේ වනවිට ජනාධිපතිවරයා ඇතුළු පිරිස බේරා ගැනීමේ මෙහෙයුම් සඳහා ඉරාන සන්නද්ධ හමුදා, කමාන්ඩෝ ඒකක ඇතුළු කණ්ඩායම් 40ක් ක්‍රියාන්විතයට එක්ව සිටින බවද විදෙස් මාධ්‍ය වාර්තා කරයි.
ඉරාන ජනාධිපතිවරයා ඇතුළු එරට ඉහළ නිලධාරීන් පිරිසක් ඉරාන – අසර්බයිජාන දේශසීමාවේ වේල්ලක් විවෘත කිරීමට එක්ව ඇති අතර එම උත්සවයෙන් පසු ඉරාන ජනාධිපතිවරයා ඇතුළු පිරිස හෙලිකොප්ටර් යානය යළි පැමිණෙමින් තිබියදී අනතුරට මුහුණ දී ඇත.
කෙසේ වෙතත් මේ වනවිට ඉරාන ජනතාව සිය ජනාධිපතිවරයා වෙනුවෙන් යාඥා කිරීමද ආරම්භ කර ඇති බව විදෙස් මාධ්‍ය වාර්තා කරයි.
