ඊයේ (03) දිනයේ පැෆරල් සංවිධානය ජාතික ජන බලවේගය පක්ෂයේ ප්‍රබලයෙන් පිරිසක් සමග හදිසි සාකච්ඡාවක් කැඳවා තිබූ බව වාර්තාවේ.
එම සාකච්ඡාවෙන් අනතුරුව මාධ්‍ය අමතමින් ජනතා විමුක්ති පෙරමුණේ මහලේකම් ටිල්වින් සිල්වා එහි අරමුණ පිළිබඳ අදහස් දැක්වීය.
ඔහු පවසා සිටියේ පැෆරල් සංවිධානය විසින් සිදු කළ යෝජනාවකට අනුව එම සාකච්ඡාව පැවැත්වූ බවත් එහිදී දේශපාලන පක්ෂ විසින් ජනතාව වෙත ලබාදෙන මැතිවරණ ප්‍රකාශනයන් සම්බන්ධ දීර්ඝව කරුණු සාකච්ඡා කළ බවයි.
ටිල්වින් සිල්වා මහතා වැඩිදුරටත් සඳහන් කළේ, මැතිවරණයට පෙර එක් එක් අපේක්ෂකයන් විසින් ලබාදෙන මැතිවරණ පොරොන්දු මැතිවරණයෙන් පසුව ක්‍රියාවට නැංවීම පිළිබඳව යාන්ත්‍රණයක් සකස් කිරීම සඳහා එම සාකච්ඡාවේදී යෝජනාව වූ බවයි.
එම සාකච්ඡාවේදී ජාතික ජන බලවේගයේ ස්ථාවරය ප්‍රකාශ කළ අතර මැතිවරණ පොරොන්දු ක්‍රියාවට නැංවීම සඳහා යම් නෛතික යාන්ත්‍රණයක් සකස් කිරීම වඩා සුදුසු බව ජන බලවේගය විසින් යෝජනා කළ බව එහිදී මහ ලේකම්වරයා වැඩිදුරටත් අදහස් දැක්වීය.
