By unusuma.lk on (LK time)
වසර දහයක් පුරා රුපියල් තුන් කෝටි විසිපන් ලක්ෂයක (32,512,815.56) වැටි බදු මුදලක් රජයට නොගෙවා පැහැර හැරියේ යැයි චෝදනා ලබා සිටි පාදුක්ක ප්‍රදේශයේ පුද්ගලික සමාගමක අධ්‍යක්ෂවරුන් වන අඹු සැමි යුවලකට කොළඹ අතිරේක මහේස්ත්‍රාත් බණ්ඩාර ඊළංඟසිංහ මහතා විසින් මාස හයක ලිහිල් වැඩ සහිත සිරදඬුවමක් අද (07) නියම කළේය.
බදු මුදල ගෙවීම සඳහා වසර 5ක සහන කාලයක් ලබා දෙන ලෙස වග උත්තරකරුවන් අධිකරණයෙන් ඉල්ලා සිටි නමුත් අතිරේක මහේස්ත්‍රාත්වරයා පෙන්වා දුන්නේ 2014 වසරේ ගෙවිය යුතු වැට් බදු මුදල් වසර දහයක් තිස්සේ නොගවා පැහැර හැරී ඇති පසුබිමක තවත් වසර පහක සහන කාලයක් ලබා දුනහොත් වසර පහළොවක් නොගොවා පැහැර හැරී බද්දක් වන බැවින් අදාළ පනතේ විධිවිධාන ප්‍රකාරව එය කළ නොහැකි බවයි.
දේශීය ආදායම් කොමසාරිස්වරයා විසින් ගොනුකළ නඩුවකට අනුව මහේස්ත්‍රාත් අධිකරණය විසින් 2022 ඔක්තෝම්බර් මස 03 දින අදාල බදු මුදල් ගෙවන ලෙසට වග උත්තරකරුවන්ට නියෝගයක් නිකුත් කර ඇති නමුත් එම නියෝගයට එරෙහිව වග උත්තරකරුවන් විසින් අභියාචනයක් ගොනු කර ඇති අතර අදාල අභියාචනය සලකා බැලූ මහාධිකරණය පසුගිය 2024 පෙබරවාරි 29 වැනි දින අභියාචන පෙත්සම ගාස්තු රහිතව නිශ්ප්‍රභ කළේය.
කෙසේවෙතත් මහාධිකරණය විසින් අභියාචනය නිෂ්ප්‍රභ කිරීමෙන් අනතුරුව වග උත්තරකාර පාර්ශවය විසින් අභියාචනාදී කරණය හමුවේ රීට් පෙත්සමක්ද ගොනු කල අතර එම රීට් පෙත්සමද අභියාචනාධිකරණය විසින් නිෂ්ප්‍රභ කළේය.
විත්තිකරුවන් වෙනුවෙන් ජනාධිපති නීතිඥ උපුල් කුමරප් පෙරුම මහතා කරුණු ඉදිරිපත් කරමින් බදු ගෙවීමට තවත් වසර පහක සහන කාලයක් ලබා දෙන ලෙස ඉල්ලමින් ගෙවීම් සැලැස්මක් අධිකරණයට ඉදිරිපත් කළ නමුත් කරුණු සලකා බැලූ අතිරේක මහේස්ත්‍රාත්වරයා පනතේ විධිවිධාන ප්‍රකාරව එවන් අවස්ථාවක් ලබා දිය නොහැකි බවට සඳහන් කරමින් අදාළ නියෝග නිකුත් කරමින් බදු මුදල් නොගෙවන්නේ නම් මාස හයක ලිහිල් වැඩ සහිත සිරදඬුවමක් ද නියම කළේය.
