By unusuma.lk on (LK time)
ඊයේ (01) උදෑසන වත්තල පොලිස් වසමේ හේකිත්ත පාර වත්තල ප්‍රදේශයේ පිහිටි ලැඟුම්හලක සිදුකළ පරීක්ෂාවකදී ටී 56 වර්ගයේ ගිනිඅවියක් සහ උණ්ඩ 113ක් හා අයිස් මත්ද්‍රව්‍ය සමඟ සැකකාරියක් හා සැකකරුවෙකු අත්අඩංගුවට ගත් බව පොලීසිය පවසයි.
අදාළ ලැගුම්හලේ කාමරයක් තුළ කාන්තාවක් ගෙල වැලලාගෙන සිටින බවට වත්තල පොලිස් ස්ථානයට ලද පැමිණිල්ලක් මත වත්තල පොලීසිය විසින් විමර්ශන ආරම්භ කර තිබුණි.
විමර්ශන සිදුකළ නිලධාරින් හට ලැඟුම්හලේ නාන කාමරයක් තුළ කාන්තාවක් සිහිසුන්ව සිටිනු නිරීක්ෂණය වී ඇත.
එම කාන්තාව නැවත සිහි ගැන්වීමට කටයුතු කර ඇති අතර අනතුරුව ඇය පරීක්ෂා කිරීමේදී අයිස් මත්ද්‍රව්‍ය ග්‍රෑම් 06 මිලිග්‍රෑම් 100ක් ඇය සන්තකයේ තිබී ඇත.
ඇයගෙන් සිදුකළ වැඩිදුර ප්‍රශ්න කිරීමේදී තමා විදේශ ගතව සිටිමින් මත්ද්‍රව්‍ය බෙදාහරින්නෙකු සමග සමීප සම්බන්ධතා පවත්වන බවට තොරතුරු ලබාදී ඇත.
එහිදී කාන්තාව පොලිස් භාරයට ගෙන සිදුකළ වැඩිදුර ප්‍රශ්නකිරීම් වලදී හෙළිව ඇත්තේ ඇයට මත්ද්‍රව්‍ය ජාවාරම්කරු විසින් සුරක්ෂිතව තැබීම සඳහා ඇය වෙත ලබා දෙන ලද ටී 56 ගිනිඅවියක් හා පතරොම් 113ක් වෙනත් ස්‍ථානයක සඟවා තබා ඇති බවයි.
ඒ අනුව සැකකාරියගේ මඟ පෙන්වීම මත ක්‍රියාත්මක වූ නිලධාරීන් ඇය පදිංචිව සිටින දෙවන විවාහයේ සැමියා පදිංචි රාගම ප්‍රදේශයේ නිවසක සඟවා තිබියදී එම අවිය හා පතරොම් සොයා ගෙන ඇත.
එම ටී 56 ගිනිඅවිය හා පතරොම් සඟවා තිබූ හීන්කෙන්ද, රාගම නිවසේ පදිංචි සැකකාර කාන්තාවගේ වයස අවුරුදු 40ක් වන සැමියාද වත්තල පොලීසිය විසින් අත්අඩංගුවට ගෙන ඇති අතර සැකකාර කාන්තාව වයස අවුරුදු 35ක් වන කොළඹ 15 ප්‍රදේශයේ පදිංචිකාරියකි.
