By unusuma.lk on (LK time)
ශ්‍රී ලංකා විදුලි සංදේශ නියාමන කොමිෂන් සභාව පවසන්නේ කිසියම් ජංගම දුරකතන සේවා සපයන සමාගමක් සිය පැකේජවල මිල වැඩි කිරීමක් සිදුකර ඇත්නම් කඩිනමින් කොමිෂන් සභාව වෙත දැනුම් දෙන ලෙසයි.
එම කොමිෂන් සභාවේ අධ්‍යක්ෂ ඉන්ද්‍රජිත් හඳපාන්ගොඩ මහතා වැඩිදුරටත් පවසන්නේ, සියලුම ජංගම දුරකතන සමාගම් විසින් කිසිඳු මිල වැඩි කිරීමක් මේ වන විට සිදු කර නොමැති බවට ලිඛිතව ශ්‍රී ලංකා විදුලි සංදේශ නියාමන කොමිෂන් සභාව වෙත ලිඛිතව දන්වා තිබෙන බවයි.
එම නිසා යම්කිසි පාරිභෝගිකයෙක් තමා දැනට සක්‍රිය කර තිබෙන ජංගම දුරකතන පැකේජයක මිල ගණන් ඉහළයාමකට මුහුණ දී සිටී නම් ඒ පිළිබඳ තොරතුරු සාධක සහිතව කොමිෂන් සභාව වෙත ඉදිරිපත් කරන ලෙසත්, සිය සේවාදායක සමාගම්වලට ලබාදී තිබෙන බලපත්‍රවල කොන්දේසි උල්ලංඝනය කිරීම මත එවැනි සේවාදායක සමාගම්වලට එරෙහිව කටයුතු කිරීමේ හැකියාව ශ්‍රී ලංකා විදුලි සංදේශ නියාමන කොමිෂන් සභාවට තිබෙන බවත් හෙතෙම වැඩිදුරටත් පැවසීය.
