By unusuma.lk on (LK time)
ජනාධිපති අනුර කුමාර දිසානායක මහතා ආරක්ෂක අමාත්‍යාංශය වෙත උපදෙස් ලබාදී ඇත්තේ වී මිලදී ගැනීම සඳහා අවශ්‍ය යටිතල පහසුකම් සංවර්ධනය කිරීමට වී අලෙවි මණ්ඩලය හා සතොස සතු අඩුපාඩුකම් පවතින ගබඩා අලුත්වැඩියා කිරීමට ත්‍රිවිධ හමුදා තාක්ෂණික සහය හා ශ්‍රම දායකත්වය ලබාදීමට කටයුතු කරන ලෙසයි.
දිවයින පුරා වී අලෙවි මණ්ඩලය සතු ගබඩා 209ක් පමණ පවතින අතර සතොස සතුව ගබඩා 12ක ප්‍රමාණයක් පවතී. එම ගබඩාවන්හි පවතින අඩුපාඩුකම් හා ගතයුතු පියවර මෙන්ම ඉදිරි සැලසුම් පිළිබඳවත් රජය පාර්ශවයෙන් සාකච්ඡාවට ලක්ව ඇති බව වාර්තා වේ.
ඒ අනුව එම කටයුත්ත කාර්‍යක්ෂම කිරීම වෙනුවෙන් ත්‍රිවිධ හමුදා සාමාජිකයන්ගේ ශ්‍රම දායකත්වයත්, තාක්ෂණික දැනුම සහ එම කටයුතු සඳහා යන්ත්‍ර සූත්‍ර යොදා ගැනීමටත් රජයේ අවධානය යොමුව ඇත.
එමෙන්ම අස්වනු නෙළන කාලය වනවිට ගබඩාවන්හි පවතින අලුත්වැඩියා කටයුතු මේ මස අවසන් වීමට පෙර නිමකර මහ කන්නයේ අස්වනු මිලදී ගැනීම සඳහා සූදානම් කිරීමටත් වී මිලදී ගැනීමෙන් අනතුරුව එම ගබඩා පරිශ්‍රයන් සඳහා ආරක්ෂාව සැපයීමටත් ආරක්ෂක අමාත්‍යාංශය සිය එකඟතාවය පළ කර ඇත.
