රාජ්‍ය මුදල් ලක්ෂ 400ක් ගිල දමා සුර සැප විඳි වරායේ ලොක්කෙක්.!

සමස්ත ලංකා වරාය පොදු සේවක සමිතිය විසින් රජයේ මුදල් ලක්ෂ හාරසියයකට අධික මුදලක් අවභාවිත කළ වරාය අධිකාරියේ හිටපු කළමණාකාර අධ්‍යක්ෂවරයකුට එරෙහිව අල්ලස් හෝ දූෂණ විමර්ශන කොමිෂන් සභාවට හා ජනාධිපති විශේෂ විමර්ශන ඒකකයට පැමිණිලි කිරීමට කටයුතු කර තිබේ.

එම නිලධාරියා මුදල් අවභාවිතයට අමතරව කූට ලේඛන ඉදිරිපත් කර ඔහුට අවශ්‍ය උපදේශකයෙකුද පත් කරගෙන ඇති අතර එම උපදේශකයාට මාස 7කදී ලක්ෂ 33ක මුදලක් ගෙවා ඇති බවත් එම පැමිණිල්ලේ සඳහන් වේ.

මෙම නිලධාරියා විසින් මෝටර් රථ දෙකක් සඳහා කෝටියකට අධික මුදලක් සහ ඉන්ධන සඳහා ලක්ෂ 27ක් පමණ වියදම් කර ඇති බවත් මෙම පුද්ගලයාගේ විදුලි බිල හා ජල බිලද මාස 15ක් පුරා ශ්‍රී ලංකා වරාය අධිකාරියෙන් ගෙවා ඇති අතර එම මුදල් ප්‍රමාණය ලක්ෂ 20කට ආසන්න බවත් මෙම පැමිණිල්ලට අනුව වාර්තා වේ.

ඊට අමතරව, ශ්‍රී ලංකා වරාය අධිකාරියේ පෞද්ගලික ආයතනයකට ලක්ෂ 250ක මුදලක් නීතිවිරෝධීව ගෙවන ලෙස වරාය අධිකාරියට මොහු නියෝග කර ඇති බවත් ලංකා වරාය පොදු සේවක සමිතියේ ලේකම් නිරෝෂන් ගොරකානගේ මහතා පවසයි.

වරාය අධිකාරියේ ක්‍රියාපටිපාටියකට එරෙහිව යමින් එම අධිකාරියට සේවකයන් 50 දෙනකු බඳවා ගැනීමට රුපියල් මිලියන 2ක් එක් ආයතනයකට ගෙවා ඇති බවද එම නිසා අදාළ සේවකයන්ට සහ වරාය අධිකාරියේ සේවය කරන පුද්ගලයන්ටද බරපතළ අසාධාරණයක් සිදුව ඇති බවද වරාය පොදු සේවක සංගමයේ ලේකම්වරයා අනාවරණය කළේය.