By unusuma.lk on (LK time)
ජපානයේ ශ්‍රී ලංකා මෝටර් රථ සංගමය (SLAAJ) විසින් ශ්‍රී ලංකාවේ ආනයන හා අපනයන පාලන දෙපාර්තමේන්තුවේ පාලක ජනරාල්වරයා වෙත ලිඛිත පැමිණිල්ලක් යොමුකරමින් පවසන්නේ යම් ආනයනකරුවන් පිරිසක් විසින් රජය පනවා ඇති ආනයනික වාහන සඳහා වූ කොන්දේසියක් වන 2023 ජනවාරි 15 න් පසු නිෂ්පාදනය කරන ලද වාහන ආනයනය කිරීමේ තහනම උල්ලංඝනය කරමින් 2022 දී නිෂ්පාදනය කරන ලද වාහන ආනයනය කිරීමට කටයුතු කරමින් සිටිනා බවයි.
එම පැමිණිල්ල මගින් පෙන්වාදී ඇත්තේ ඇතැම් ආනයනකරුවන් විසින් වාහන තත්ව සහතික නිකුත් කිරීම සඳහා නිර්දේශිත ජපානයේ ආයතන වෙත නිෂ්පාදන දිනයන් ව්‍යාජ ලෙස සඳහන් කරන ලෙසට බලපෑම් කර ශ්‍රී ලංකා රජය විසින් පනවා ඇති කොන්දේසිය වංචනිකව උල්ලංඝනය කමින් සිටිනා බවයි.
පැමිණිල්ල අනුව, මෙම සතිය තුළ එලෙස ව්‍යාජ දිනයන් භාවිතා කරමින් අවම වශයෙන් වාහන 150 ක් පමණ මෙරටට අපනයනය කර ඇති බව පැවසේ.
කෙසේවෙතත් එවැනි ආකාරයේ වංචනිකව ව්‍යාජ ලේඛන මත පදනම්ව ආනයනය කරන ලද වාහන ශ්‍රී ලංකා වෙළඳපොළට ඇතුළු කිරීමට ඉඩ නොදිය යුතු බවත් එම සංගමය කියා සිටියි.
එබැවින් මෙම වාහන නැවත ප්‍රති-අපනයනය කිරීමට කටයුතු කරනා ලෙසද ඔවුන් රජයෙන් ඉල්ලා සිටියි.
තායිලන්තයෙන් පළමු වාහන කාණ්ඩය මේ මාසයේ පැමිණීමට නියමිත අතර ජපානයෙන් පළමු නැව්ගත කිරීම ලබන මාසයේ මැද භාගයේදී පැමිණීමට නියමිත බව ඔවුන් පවසයි.
මුල් තොගයේ වාහන 2,000 කට ආසන්න ප්‍රමාණයක් පැමිණීමට නියමිත බවද ඔවුහු වැඩිදුරටත් පවසති.
