By unusuma.lk on (LK time)
අද (6) කොළඹ මහාධිකරණ විනිසුරු සුජීව නිශ්ශංක මහතා විසින් මාලිගාවත්ත ප්‍රදේශයේ පදිංචි යුවළකට මරණීය දණ්ඩනය නියම කළේය.
ඒ අදාළ යුවල දරුකමට හදාවඩා ගැනීම සඳහා ගනු ලැබූ වයස අවුරුදු දෙකක ළමයෙකු වධ හිංසාවට ලක්කර මරණයට පත් කිරීමේ චෝදනාවකට වරදකරුවන් වීමෙන් අනතුරුවයි.
හදාවඩා ගැනීම සඳහා ලබාගත් අවුරුදු දෙකක පිරිමි ළමයකු වූ මෙම දරුවා 2018 වසරේ මැයි මස 11වනදා හෝ ඊට ආසන්න දිනයක, මාලිගාවත්ත ප්‍රදේශයේදී වධ හිංසාවට ලක්කොට මරණය සිදුකිරීම සම්බන්ධයෙන් මෙම විත්තිකරුවන් දෙදෙනාට එරෙහිව නීතිපතිවරයා නඩු පවරා තිබුණි.
දීර්ඝ නඩු විභාගයකින් අනතුරුව තීන්දුව ප්‍රකාශයට පත්කළ විනිසුරු සුජීව නිශ්ශංක මහතා කියා සිටියේ, විත්තිකරුවන්ට එරෙහිව එල්ලකර තිබෙන මිනීමැරීමේ චෝදනා සාධාරණ සැකයකින් තොරව පැමිණිල්ල විසින් ඔප්පු කර තිබෙන බවයි.
තවදුරටත් තීන්දු ප්‍රකාශයට පත්කළ විනිසුරුවරයා, සැකසහිත ලෙස මියගිය අවුරුදු දෙකක පමණ පිරිමි ළමයෙකුගේ මෘත ශරීරයක් පරීක්ෂණයකින් තොරව වල දැමීමට සූදානම් වන බවට ලැබුණු තොරතුරකට අනුව පොලීසිය විසින් අදාළ නිවසට ගොස් ඒ පිළිබඳ විමර්ශන සිදුකර ඇති ආකාරය පොලිස් සාක්ෂිවලින් අනාවරණය වූ බව සඳහන් කළේය.
ඒ අනුව අදාළ ස්ථානයට ගිය පොලිස් නිලධාරින් ඒ පිළිබඳ සැකයක් ඇතිවීම නිසා මහෙස්ත්‍රාත්වරයාට කරුණු වාර්තා කර දරුවාගේ මරණය සම්බන්ධයෙන් පශ්චාත් මරණ පරීක්ෂණයක් පැවැත්වීමට කටයුතු කළ බවත් පොලිස් සාක්ෂිවලින් අනාවරණය වී තිබුණි.
ඒ අනුව අධිකරණයට ඉදිරිපත් කෙරුණු අධිකරණ වෛද්‍ය වාර්තාව තුළින් මෙම දරුවා දරුණු ලෙස වධ හිංසනයට භාජනය වී තිබූ ආකාරය වෛද්‍ය සාක්ෂිවලින් අනාවරණය වී තිබූ බවත් විනිසුරුවරයා පැවසීය.
මෙම දරුවාගේ දේහයේ තිබී තුවාල 90ක් පමණ නිරීක්ෂණය වී ඇති අතර ඒවා පිළිස්සුම් තුවාල මෙන්ම පහරදීම් හේතුවෙන් ඇතිවූ තුවාල බවටත් වෛද්‍ය සාක්ෂිවලින් නිගමනය කර ඇත.
එමෙන්ම අදාළ දරුවාගේ වෘෂන කෝෂවලටද දැඩි ලෙස හානි සිදුවී තිබූ බවත් වෛද්‍ය සාක්ෂිවලින් අනාවරණය වී තිබේ.
ඒ අනුව මෙම දරුවා කෲර වද හිංසනයට භාජනය වී ඇති අතර චේතනාන්විතවම ප්‍රචණ්ඩත්වයට ලක්වීම හේතුවෙන් ඔහුගේ මරණය සිදුවී ඇති බව වෛද්‍ය සාක්ෂිවලින් නිරීක්ෂණය වී තිබෙන බවත් විනිසුරුත්වරයා සඳහන් කළේය.
එමෙන්ම කාලයක් වධ හිංසනයට භාජනය වී පිළිස්සුම් වලින් ඇතිවූ බහුවිධ තුවාල හේතුවෙන් දරුවාගේ මරණය සිදුවී ඇති බව අධිකරණ වෛද්‍ය නිලධාරියා විසින් නිගමනය කර තිබෙන බවත් විනිසුරුවරයා සිය තීන්දුවේ සඳහන් කර සිටියේය.
වැඩිදුරටත් තීන්දුව ප්‍රකාශයට පත් කරමින් විනිසුරුවරයා කියා සිටියේ, විත්තිකරුවන් විසින් මියගිය මෙම දරුවා කොළඹ ළමා රෝහල අසලටම රැගෙන ගොස් ඊට ඇතුළත් නොකට ආපසු හැරී ග්‍රෑන්ඩ්පාස් ප්‍රදේශයේ පිහිටි පෞද්ගලික වෛද්‍යවරයෙකු වෙත රැගෙන යාම බරපතළ සැකයකට තුඩුදෙන කරුණක් බවයි.
අදාළ දරුවා මෙම විත්තිකරුවන් භාරයේ සිටි බවට ප්‍රමාණවත් සාක්ෂි ඉදිරිපත් වී තිබෙන බවත් ඒ සම්බන්ධයෙන් කිසිදු සැකයක් මතුවී නොමැති බවත් විනිසුරුවරයා අවධාරණය කළේය.
සියලු සාක්ෂි විශ්ලේෂණය කිරීමේදී මියගිය දරුවා මෙම විත්තිකරුවන් භාරයේ ජීවත් වූ බව තහවුරු වී ඇති බැවින් ඉදිරිපත් වූ පර්වේෂණීය හා වෛද්‍ය සාක්ෂිවලට අනුව මෙම මරණයට විත්තිකරුවන් වගකිවයුතු බවත් විනිසුරුවරයා තීන්දු කළේය.
ඒ අනුව අදාල විත්තිකරුවන් දෙදෙනා මිනීමැරීමේ චෝදනාවට වරදකරු කරන බවත් විනිසුරුවරයා අවසන් වශයෙන් නිගමනය කර ඇත.
දඬුවම් නියම කිරීමට පෙර අධිකරණය හමුවේ කරුණු දැක්වූ විත්තිකරුවන් කියා සිටියේ තමන් මෙම චෝදනාවවලට නිර්දෝෂී බවයි.
තමාට තවත් දරුවන් දෙදෙනෙකු සිටින බවත් මෙම දරුවා හදාවඩා ගත්තේ තම කැමැත්තෙන් බවත් විත්තිකාරිය විවෘත අධිකරණයේ ප්‍රකාශ කළාය.
ඉදිරිපත් වූ කරුණු සලකා බැලූ විනිසුරුවරයා අනතුරුව මෙම තීන්දුව ප්‍රකාශයට පත් කළේය.
