ප්‍රොවිඩස් හිදී උගන්ඩා කන්ඩායම ලකුණු 125කින් පරාජය කළ ඇෆ්ගනිස්තාන කඩායම T20 ලෝක කුසලාන ඉතිහාසයේ සිව්වැනි විශාලතම ජයග්‍රහණය වාර්තා කළේය.
ඇෆ්ගනිස්තානයේ ආරම්භක පිතිකරුවන් වන ඊබ්‍රාහිම් සද්‍රාන් (පන්දු 46 කදී ලකුණු 70) සහ රහ්මානුල්ලා ගුර්බාස් (පන්දු 45 කදී ලකුණු 76) ලබාගනිමින් ලකුණු 154 ක සම්බන්ධතාවක් ගොඩනඟා ගත් අතර එය විස්සයි20 ලෝක කුසලාන ඉතිහාසයේ දෙවැනි විශාලතම ආරම්භක කඩුලු සබඳතාවයයි.
ඕවර 14ක් අවසානයේ ඇෆ්ගනිස්තානය ලකුණු 152/0ක් ලෙසින් විශාල ලකුණු සංඛ්‍යාවක් කරා ගමන් කරමින් සිටියේය. නමුත් සද්‍රාන් සහ ගුර්බාස් දැවී යාමත් සමඟ වේගය තරමක් මන්දගාමී කළ ඇෆ්ගන් කණ්ඩායම අවසන් ඕවර පහේදී රැස් කළේ ලකුණු 27ක් පමණක් වන අතර අවසන් ඕවර හයේ දී එකදු හතරේ පහරක් හෝ එල්ල නොකළහ.
සී කාණ්ඩයේ තරගයේදී ඇෆ්ගනිස්තානය ලබාගත් 183/5ට පිළිතුරු ලෙස T20 ලෝක කුසලානයේ මංගල ක්‍රීඩකයන් වන උගන්ඩාවට රැස් කරගත හැකිවූයේ ලකුණු 58ක් පමණි.
කැරිබියන් දූපත් හි ඊයේ දිනයේ පැවති තරඟයේදී, උගන්ඩාවේ පිතිකරුවන් දෙදෙනෙකු පමණක් ඉලක්කම් ද්විත්වයක ලකුණු ලබාගැනීමට සමත්විය. ඒ රොබින්සන් ඔබුයා (14) සහ රියාසාත් අලි ෂා (11).
විස්සයි 20 ලෝක කුසලාන ඉතිහාසයේ විශාලතම ජයග්‍රහණ 03 ලෙස ශ්‍රී ලංකාව ලකුණු 172කින් කෙන්යාව පරාජය කිරීම, දකුණු අප්‍රිකාව සහ ඇෆ්ගනිස්තානය ලකුණු 130කින් ස්කොට්ලන්තය පරාජය කිරීම සැළකේ.
