Local news (Sinhala)

අද පස්වරු 12.30 න් පසුව ලංකා බැංකු ශාඛා පද්ධතිය වසා සියලු‍ ගනුදෙණුවලින් ඉවත් වීමට ලංකා බැංකු සේවක සංගමය තීරණය කර තිබේ. 

ඒ සිය දිරිදීමනා කප්පාදු කිරීමට විරෝධය පලකිරීමක් වශයෙනි.

එම සංගමයේ මධ්‍යම කාරක සභික නජිත් විජේරත්න කියා සිටියේ සිය ඉල්ලීම්වලට නිසි විසදුමක් නොලැබුණහොත් ලබන 06 වෙනිදා සංකේත වර්ජනයකට අවතීර්ණ වන බවයි.

මෙම ගැටලුව මුල් කරගෙන ඊයේ දිවයිනේ තෝරාගත් ප්‍රධාන නගර කිහිපයක ලංකා බැංකු ශාඛා 22ක් ඉදිරිපිට කෑම පැයේදී සේවකයන් විරෝධතාවල නිරත විය. 

එමෙන්ම, බඳවා ගැනීමේ පටිපාටියේ පවතින ප්‍රමාදයන් විසදීම ඇතුලු ඉල්ලීම් 10ක් මුල් කරගනිමින් තැපැල් හා විදුලි සංදේශ නිලධාරීන්ගේ සංගමය ද ඊයේ මධ්‍යම රාත්‍රියේ සිට පැය 48ක සංකේත වර්ජනයක් ආරම්භ කර තිබෙනවා. 

සිවිල් ගුවන් සේවා වෘත්තිය සේවක සංගමය ද ඊයේ මධ්‍යම රාත්‍රියේ සිට අතිකාල සේවයෙන් ඉවත් වී තිබෙනවා. 

ලබන (02) වැනිදා සිට (08) වැනිදා දක්වා ජාතික බදු සතියක් ප්‍රකාශයට පත්කර ඇත.

මෙමගින් රජයේ බදු ආදායම ඉහළ දැමීමට සැලසුම් කර ඇති බව රාජ්‍ය ආදායම් පරිපාලන ප්‍රතිසංස්කරණ හා නවීකරණ කාර්යාංශයේ ජනාධිපති ජ්‍යේෂ්ඨ අතිරේක ලේකම් නිශාන්ත ජයවීර සඳහන් කරයි.

දේශීය ආදායම් බදු දෙපාර්තමේන්තුව, රේගුව සහ සුරා බදු දෙපාර්තමේන්තුව මගින් එම සතිය තුළ ජනතාව දැනුවත් කිරීම සඳහා දිවයිනම ආවරණය වන පරිදි විවිධ වැඩසටහන් සංවිධානය කර ඇත.

ඉල්ලීම් 10ක් මුල් කරගනිමින් දිවයිනේ සියලු තැපැල් කාර්යාල වල සේවකයින් ඊයේ (28) දින මධ්‍යම රාත්‍රියේ සිට වැඩවර්ජනයක් ආරම්භ කළේය.

ඒ අනුව හෙට (30) දින මධ්‍යම රාත්‍රිය දක්වා වැඩවර්ජනය ක්‍රියාත්මක බව තැපැල් හා විදුලි සංදේශ නිලධාරීන්ගේ සංගමයේ සභාපති ජී.ජී. සී. නිරෝෂන සඳහන් කරයි.

අපරාධයක් සිදුකර පලායන සැකකරුවන් වහා අත්අඩංගුවට ගැනීමට මෙන්ම සාමය කඩවන ආකාරයේ සිදුවන යම් අපරාධයක් වැළැක්විය හැකි ක්ෂණික ළඟාවීමක්, අවි බලයක් සහිත විශේෂ පොලිස් කණ්ඩායම් ක්ෂේත්‍රයට මුදාහැරීම කාලෝචිත අවශ්‍යතාවයක් බව හඳුනාගෙන ඇත.

ඒ අනුව දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත්ගේ මූලිකත්වයෙන් විශේෂිත සංවිධානත්මක යතුරුපැදි බලඝනයක් රාජකාරි යෙදවීමට පියවර ගෙන ඇත.

මේ සඳහා තංගල්ල පොලිස් කොට්ඨාසයෙන් සහ මාතර පොලිස් කොට්ඨාසයෙන් එක්කල සංග්‍රාමික යතුරුපැදි 8 ක්, Highway යතුරුපැදි 15ක් ඇතුළත් අතර නිලධාරීන් 46ක පමණ ප්‍රමාණයක් අනුයුක්ත වේ.

ලංකාවේ විශාලතම ගංජා ජාවාරම්කරු බවට ආරක්ෂක අංශ විසින් සැක පළකරන ඇඹිලිපිටියේ පදිංචි ජේ.ඒ.ජයසිංහට හෙවත් “බතල හීන්මහත්තයා” අයත් රුපියල් කෝටි 10ක පමණ වටිනා දේපොළ නීතිවිරෝධී වත්කම් විමර්ශන කොට්ඨාසය විසින් අද (28) දින තහනම් කළේය.

මෙම දේපළ ජේ.ඒ.ජයසිංහගේ බිරිඳගේ නමින් මිලදීගෙන ඇති අතර ඒ සඳහා මුදල් උපයාගත් ආකාරය ප්‍රකාශ කිරීමට ඔවුන්ට නොහැකි වී ඇති අතර ඒ අනුව අදාළ දේපළ දින 7ක කාලයකට තහනම් කළේය.

අත්අඩංගුවට ගැනුණු සැකකරු හෙට (29) දින වැල්ලවාය අධිකරණයට ඉදිරිපත් කිරීමට නියමිතය.

කුමන ගැටලු පැවතියද පක්ෂයේ තීරණවලට එකඟ වියයුතු බවත් පක්ෂ තීරණවලට අනුව කටයුතු කිරීම පක්ෂයේ සියලු සාමාජිකයින්ගේ වගකීම බවත් සමගි ජන බලවේගයේ ජ්‍යේෂ්ඨයින්ගේ මතය වී තිබේ.

පළාත් පාලන මැතිවරණයෙන් පසු එම පළාත් පාලන ආයතන සඳහා නියෝජිතයින් පත් කිරීමේදී මතුවී ඇති ගැටළුකාරී තත්ත්වයක් හේතුවෙන් සමගි ජන බල⁣වේගයේ ආසන සංවිධායකවරුන් කිහිපදෙනෙකු පසුගියදා එම ධුරවලින් ඉල්ලා අස්විය.

ඒ අනුව බණ්ඩාරවෙල ආසන සංවිධායක පාර්ලිමේන්තු මන්ත්‍රී චමින්ද විජේසිරි, හොරොව්පොතාන ආසන සංවිධායක අනුර බුද්ධික, දඹුල්ල ආසන සංවිධායක නීතීඥ චම්පක විජේරත්න, රත්තොට ආසන සංවිධායක හා නියෝජ්‍ය ජාතික සංවිධායක වූ රංජිත් අලුවිහාරේ, නුවරඑළිය දිස්ත්‍රික් සම සංවිධායක අනගිපුර අශෝක සේපාල, ගාල්ල ආසන සංවිධායක බන්දුලාල් බණ්ඩාරිගොඩ යන පිරිස් මෙලෙස සිය සංවිධායක තනතුරුවලින් ඉල්ලා අස්වීමට තීරණය කර ඇති අතර ඒ අනුව ඔවුන් සිය ඉල්ලා අස්වීමේ ලිපි පක්ෂ නායක සජිත් ප්‍රේමදාස මහතා සහ පක්ෂ මහලේකම් රංජිත් මද්දුම බණ්ඩාර මහතා වෙත යොමු කර තිබේ.

සමගි ජන බලවේගයේ පක්ෂ අභ්‍යන්තර අර්බුද මීට මාස කිහිපයකට පෙර සිටම නිර්මාණය වූ අතර එම අර්බුදවල තවත් දිගුවක් ලෙස පළාත් පාලන නියෝජිතයින් පත් කරගැනීමේ ගැටලුකාරී තත්ත්වය දැකිය හැකි අතර ඒ අනුව මෙම සංවිධායකවරුන් සිය සංවිධායක ධුරවලින් ඉල්ලා අස්වීමට තීරණය කර ඇති බවද වාර්තා වෙයි.

මේ වනවිට පළාත් පාලන ආයතන සඳහා සමගි ජන බලවේගයේ නියෝජිතයින් පත් කරගැනීමේ අර්බුදය උඩු දුවමින් පවතින අතර ඒ සම්බන්ධව තවත් ආසන සංවිධායකවරුන් රැසක් පක්ෂ නායකත්වය ගනු ලැබූ තීරණ හේතුවෙන් දැඩි කළකිරීමට පත්වී ඇතැයිද වාර්තා වෙයි.