By unusuma.lk on (LK time)
පසුගියදා බදුල්ල දිස්ත්‍රික් මන්ත්‍රී චාමර සම්පත් දසනායක මහතා පාර්ලිමේන්තුවේදී ප්‍රකාශයක් සිදුකරමින් කියා සිටියේ ජනපතිවරයාගේ ප්‍රධානත්වයෙන් පැවති “ක්ලීන් ශ්‍රී ලංකා” වැඩසටහනේ සමාරම්භක උත්සවය සඳහා රුපියල් ලක්ෂ 70ක වියදමක් දරා ඇති බවයි.
එමෙන්ම තමා ඉතා වගකීමෙන් ඒ පිළිබඳ පවසන බවත්, එවැනි වියදමක් දරා නොමැති බවට ආණ්ඩුව ඔප්පු කළහොත් තමා මන්ත්‍රීධූරයෙන් ඉල්ලා අස්වන බවත් මන්ත්‍රීවරයා අභියෝග කළේය.
ඊට පිළිතුරු දක්වමින්, සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා “ක්ලීන් ශ්‍රී ලංකා” වැඩසටහනේ සමාරම්භක උත්සවයට ගිය වියදම් පිළිබඳව පාර්ලිමේන්තුවට පැහැදිලි කළේය.
එහිදී අමාත්‍යවරයා සඳහන් කළේ, උත්සවය සඳහා රුපියල් ලක්ෂ 70ක් වියදම් වූ බවට පාර්ලිමේන්තු මන්ත්‍රී චාමර සම්පත් දසනායක විසින් පාර්ලිමේන්තුවේදී සිදුකළ ප්‍රකාශය අසත්‍ය බවත් ඔහු එම උත්සවය සඳහා සම්ප්‍රදායික ලෙස කැඳවූ ‘quotation’ සමඟ වියදම් වාර්තාව පටලවාගෙන ඇති බවත් ය.
කෙසේවෙතත් චාමර සම්පත් මන්ත්‍රීවරයා අභියෝග කළ පරිදි සිය මන්ත්‍රීධූරයෙන් ඉල්ලා අස්විය යුතු නොවන බවද නලින්ද ජයතිස්ස අමාත්‍යවරයා පවසා සිටියේය.
