නොරොච්චෝල ලක්විජය බලාගාරය සඳහා ගල්අඟුරු මිලදී ගැනීමේ ක්රියාවලියේ සිදුව ඇති බරපතල අක්රමිකතා සහ ඉන් රජයට සිදුව ඇති දැවැන්ත මූල්ය අලාභය පිළිබඳ තොරතුරු ජාතික විගණන කාර්යාලය නිකුත් කළ නවතම විශේෂ විගණන වාර්තාව මගින් අනාවරණය කර ඇත.
2025/2026 වාරය සඳහා ගල් අඟුරු සැපයීමට තෝරාගත් ඉන්දියානු සමාගම වන Trident Chemphar Limited, ලංසු කැඳවන දිනටත් ලංකා ගල් අඟුරු සමාගමේ නිසි පරිදි ලියාපදිංචි වී නොසිටි බව විගණනයේදී හෙළිදරව් වී ඇත.
ලියාපදිංචිය තහවුරු කරගත් සැපයුම්කරුවන්ගෙන් පමණක් ලංසු කැඳවිය යුතු බවට කොන්දේසියක් පවතිද්දී ට්රයිඩන්ට් ඇතුළු ලියාපදිංචි නොවූ සමාගම් තිදෙනෙකු ලංසු ඉදිරිපත් කිරීමට අවස්ථාව ලබාදීම හරහා ප්රසම්පාදන නීති උල්ලංඝනය වී ඇති බව විගණකාධිපතිවරයා සඳහන් කරයි.
මීට පෙර අවස්ථාවලදී ප්රමිතියෙන් තොර ගල් අඟුරු සැපයූ සමාගම්වලට පවා ලංසු ඉදිරිපත් කිරීමට අවස්ථාව ලැබෙන පරිදි ලියාපදිංචි නිර්නායක ලිහිල් කර තිබූ බවත් Trident Chemphar සමාගම විසින් සැපයූ මුල් නැව් තොග 9 පරීක්ෂා කිරීමේදී, ඒවායේ තාපජනන අගය බලාගාරයට අවශ්ය ප්රමිතියට වඩා අඩු මට්ටමක පැවති බව තහවුරු වී ඇත.
මේ හේතුවෙන් විදුලිය ජනනය කිරීමේදී ගල් අඟුරු අධි-පරිභෝජනයක් සිදුව ඇති අතර ඉන් රජයට සිදුව ඇති ඇස්තමේන්තුගත අලාභය රුපියල් මිලියන 2,237.7ක් බව විගණන වාර්තාව පෙන්වා දෙන අතර පැටවුම් වරායේදී (Load Port) ගල් අඟුරු පරීක්ෂා කළ සමාගම සතුව ඒ සඳහා අවශ්ය වලංගු බලපත්ර හෝ ප්රතීතනතාවයක් නොතිබූ බව විගණන වාර්තාව මගින් අනාවරණය කර ඇත.
මෙම පරීක්ෂණ වාර්තාවල දත්ත සහ බලාගාරයේ පාලන ඒකකයේ දත්ත අතර පැහැදිලි පරස්පරතාවයක් තිබියදීත්, ඒ පිළිබඳ සොයා බැලීමට ලංකා ගල් අඟුරු සමාගම පියවර ගෙන නොතිබුණ අතර 2026 මාර්තු මාසය වනවිට ගල් අඟුරු නැව් 18ක් ගොඩබෑමට සැලසුම් කර තිබුණද, ලබාගෙන තිබුණේ නැව් 12ක් පමණක් බවද සඳහන් වේ.
ඒ අනුව නියමිත කාලයට ගල් අඟුරු තොග ගෙන්වා ගැනීමට අපොහොසත් වීම හේතුවෙන් ඉදිරියේදී විදුලි ජනනයට බාධා එල්ල වීමේ අවදානමක් පවතින බව විගණකාධිපතිවරයා අවධාරණය කළ අතර ප්රමිතියෙන් තොර ගල් අඟුරු සැපයීම සහ අනෙකුත් කොන්දේසි උල්ලංඝනය කිරීම වෙනුවෙන් අදාළ සැපයුම්කරුගෙන් රුපියල් මිලියන 2332.5ක දඩ මුදලක් අයකර ගත යුතු බවද විගණනය මගින් ගණනය කර ඇත.
ගල් අඟුරු මිලදී ගැනීමේ ප්රසම්පාදන ක්රියාවලියේ අභ්යන්තර පාලනය ශක්තිමත් කිරීම සඳහාත්, සිදුවිය හැකි ආර්ථික හා සමාජයීය බලපෑම් අවම කර ගැනීම සඳහාත් අවශ්ය නිර්දේශ රැසක් විගණන වාර්තාවේ 7 වන පරිච්ඡේදය මගින් ඉදිරිපත් කර ඇත.
