ලෝක දේශපාලනය මත ශ්‍රී ලංකාවේ ආර්ථික බලපෑම අද කොටස් වෙළඳපොළ පෙන්වයි.!

පසුගිය අප්‍රේල් 02 වනදා අමෙරිකානු ජනාධිපති ඩොනල්ඩ් ට්‍රම්ප් විසින් සිය නවතම ආනයනික තීරුබදු ප්‍රතිපත්තිය නිවේදනය කිරීමත් සමඟින් ඇතුවූ ආන්දෝලනාත්මක තත්ත්වය හමුවේ ලොව පුරා කොටස් වෙළෙඳපොළ රැසක් කඩාවැටීමට ලක්විය. එදින සිට ඊයේ (09) දිනය දක්වා පමණක් 7% කින් කොළඹ කොටස් වෙළෙඳපොළ සියලු කොටස් මිල දර්ශකය පහළ ගොස් තිබුණි.

මේ අතර ඊයේ (09) දිනයේදී ට්‍රම්ප් ජනාධිපතිවරයා සිය තීරණය ක්‍රියාවට නැංවීම මාස 03ක කාලයක් සඳහා අත්හිටුවනු ලබන බවට නිවේදනය කිරීමත් සමඟම ශ්‍රී ලංකාවේ මෙන්ම ලොව ප්‍රමුඛතම කොටස් වෙළෙඳපොළ සියල්ලක්ම පාහේ වාර්තාගත ලෙස ඉහළ ගොස් ඇත.

අද (10) දිනයේදී කොළඹ කොටස් වෙළෙඳපොළ මිල දර්ශක දැවැන්ත වර්ධනයක් අත්පත් කරගැනීමට සමත්වූ අතර දිනය අවසානයේදී එහි අගය ඒකක 15,580.83ක් ලෙසින් සටහන් විය.

එහිදී සියලු කොටස් මිල දර්ශකය පෙර දිනයට සාපේක්ෂව 4.7% ක සුවිශාල ඉහළ යාමක් වාර්තා කළේ ඒකක 704.88ක දැවැන්ත වර්ධනයක් සමගිනි.

සෙසු දිනවලට සාපේක්ෂ ඉහළ ගනුදෙනු පිරිවැටුමක් අද දින වාර්තා වූ අතර රු. බිලියන 6.97ක් ලෙසින් එය වාර්තාවී තිබේ.

මේ අතර S&P sl20 දර්ශකය ඒකක 290.94 කින් දිනය තුළ ඉහළ ගිය අතර එය දිනයේ ගනුදෙනු අවසානයේදී ඒකක 4,643.63ක් ලෙසින් සටහන්ව තිබුණි. මෙය පෙර දිනයට සාපේක්ෂව 6.68% ක දැවැන්ත ඉහළ යාමකි.