By unusuma.lk on (LK time)
ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතා ඇතුළු පිරිසකට එරෙහිව ගොනු කළ මූලික අයිතිවාසිකම් පෙත්සමට අදාළ ව මීට මාස 07කට පෙර නිකුත් කළ ඇතැම් නියෝග ක්‍රියාත්මක නොකිරීම ගැන ශ්‍රේෂ්ඨාධිකරණය අද (04) දැඩි අප්‍රසාදය පළ කළේය.
මාස 07ක් තිස්සේ මෙම නියෝග ක්‍රියාත්ක නොකිරීම සම්බන්ධයෙන් නීතිපති දෙපාර්තමේන්තුව වෙනුවෙන් පෙනී සිටි රජයේ නීතිඥවරියගෙන් දීර්ඝ ලෙස ප්‍රශ්න කළ අධිකරණය, අදාළ නියෝග ක්‍රියාත්මක කර ඒ ගැන මෝසමක් මගින් අධිකරණයට දැනුම් දෙන ලෙස ද නියෝග කළේය.
ශ්‍රේෂ්ඨාධිකරණය මෙම නියෝගය කළේ ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු මහතාගේ වාහනයක් ඉස්සර කිරීම සම්බන්ධයෙන් ඔහු විසින් පහරදීම, අඩන්තේට්ටම් කිරීම සහ නීතවිරෝධීව අත්අඩංගුවට ගැනීම ඇතුළු කරුණු කිහිපයක් යටතේ මිෂාර රණසිංහ නම් පුද්ගලයකු විසින් ගොනු කළ මූලික අයිතිවාසිකම් පෙත්සමක් විභාගය සඳහා අද කැඳවූ අවස්ථාවේදී ය.
අද මෙම පෙත්සම් කැඳවූයේ දිලිප් නවාස්, අර්ජුන ඔබේසේකර සහ සම්පත් බී අබේකෝන් යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් ඉදිරිපිටදී ය.
පෙත්සම විභාගය වෙනුවෙන් අද කැඳවූවද, ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු ඇතුළු වගඋත්තරකරුවන් මෝසමක් මගින් දැනුම් දී තිබුණේ විරෝධතා ගොනකිරීම සඳහා ඔවුන්ට ලැබිය යුතු ඇතැම් ලේඛන තවම අධිකරණයට ඉදිරිපත් කර නැති බැවින් අදාළ ලේඛන ලැබීමෙන් පසු විරෝධතා ගොනුකිරීම සඳහා කාලය අවශ්‍ය බවයි. 1 සිට 5 දක්වා වූ වගඋත්තරකාර පොලිස් නිලධාරීන් වෙනුවෙන් අද අධිකරණය ඉදිරියේ පෙනී සිටි ජනාධිපති නීතිඥ අනුර මැද්දෙගොඩ මහතා සඳහන් කළේ පසුගිය අගෝස්තු මාසයේ ලබාදුන් ශ්‍රේෂ්ඨාධිකරණ නියෝග අනුව අදාළ වාර්තා ලැබී නැති හෙයින් විරෝධතා ගොනුකිරීමට නොහැකි වූ බවයි.
පෙත්සම්කරු වෙනුවෙන් නීතිඥ ඩිලාන් නාලක සමග පෙනී සිටි නීතිඥ තිෂ්‍ය වේරගොඩ මහතා සඳහන් කළේ ශ්‍රේෂ්ඨාධිකරණය අදාළ නියෝග ලබාදී ඇත්තේ පසුගිය අගෝස්තු මාසයේ බවයි. මාස 7ක් තිස්සේ ජාතික පොලිස් කොමිෂන් සභාව සහ අනෙකුත් බලධාරීන් එම නියෝග ක්‍රියාත්මක නොකර පැහැර හැර ඇති බව ද නීතිඥවරයා පෙන්වා දුන්නේය. නඩුවේ පළමු වගඋත්තරකාර රන්මල් කොඩිතුවක්කු මහතා අපරාධ බාර ජ්‍යෙෂ්ඨ නියෝජ්‍ය පොලිස්පතිවරයා මෙන්ම වින්දිතයන් සහ සාක්කිකරුවන්ගේ කොට්ඨාසය අධීක්ෂණය කරන ජ්‍යෙෂ්ඨ නියෝජ්‍ය පොලිස්පතිවරයා ද වන බවත්, එබැවින් හිතාමතාම අදාළ බලධාරීන් මෙම අධිකරණ නියෝග ක්‍රියාත්මක කිරීම පැහැර හැර ඇති බවත් නීතිඥවරයා වැඩිදුරටත් මෙහිදී ප්‍රකාශ කළේය.
අධිකරණ නියෝග ක්‍රියාත්මක නොකිරීම සම්බන්ධයෙන් ශ්‍රේෂ්ඨාධිකරණය දිගින් දිගටම රජයේ නීතිඥවරියගෙන් ප්‍රශ්න කළ අතර, ඊයේ දිනැතිව එනම් 2025 මාර්තු 03 වැනිදා දිනැතිව ජාතික පොලිස් කොමිෂන් සභාවේ සභාපතිවරයා අධිකරණය වෙත එවා ඇති ලිපියක් ගැන ද ශ්‍රේෂ්ඨාධිකරණය අවධානය යොමු කළේය. අදාළ කටයුතු සිදු කිරීම සඳහා ශ්‍රේෂ්ඨාධිකරණ නඩු ගොනුවේ පිටපතක් ලබා දෙන ලෙස ජාතික පොලිස් කොමිෂන් සභාවේ සභාපතිවරයා ලිපියක් මගින් ඉල්ලා තිබිණි. ශ්‍රේෂ්ඨාධිකරණය අලුත් කරුණු සොයාබැලීමක් සඳහා නියෝග කළේ 2024 අගෝස්තු මස 08 වැනිදා බවත්, අදාළ නියෝගය ක්‍රියාත්මක කිරීම සඳහා ජාතික පොලිස් කොමිෂන් සභාව නඩු වාර්තා ඉල්ලා ඇත්තේ මාස 07කට පසුව බවත් නීතිඥ තිෂ්‍ය වේරගොඩ මහතා මෙහිදී අධිකරණයේ අවධානය යොමු කරමින් සඳහන් කළේය.
ශ්‍රේෂ්ඨාධිකරණ නියෝග ක්‍රියාත්මක නොකිරීම සම්බන්ධයෙන් දැඩි අප්‍රසාදය පළ කළ විනිසුරු මඩුල්ල මෙම නියෝග ක්‍රියාත්මක කර, ඒ සම්බන්ධයෙන් මෝසමක් මගින් මැයි 08 වැනිදා වන විට අධිකරණය දැනුම්වත් කරන ලෙස රජයේ නීතිඥවරියට නියෝග කළේය. අධිරණයේ එක් නියෝගයකට අදාළ ව වාර්තාව ලබා දිය යුතු වෛද්‍ය චන්න පෙරේරා මහතා විදේශගත ව සිටින බවත්, ඔහු නැවත ලංකාවට පැමිණෙන්නේ මැයි මාසයේ බවත්, ඔහු පැමිණි පසු අදාළ වාර්තාව ඉදිරිපත් කරනු ඇති බවත් රජයේ නීතිඥවරිය ප්‍රකාශ කළාය. ඒ අනුව අදාළ වෛද්‍යවරයා සමග සන්නිවේදනය කර මැයි මාසයේදී වාර්තාව අධිකරණයේ ගොනුකරන ලෙස ද අධිකරණය නියෝග කළේය.
මෙම පෙත්සම්කරු පහරකෑමෙන් පසු මුල්ලේරියාව රෝහලට ඇතුළත් වී ප්‍රතිකාර ලබාගෙන ඇති අතර, ඊට අදාළ ඇඳ හිසපත අතුරුදන්වීම ගැන බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයාගේ සෘජු අධීක්ෂණය යටතේ විමර්ශනයක් කරන ලෙස අගෝස්තු 08 වැනිදා නිකුත් කළ අධිකරණ නියෝගවල සඳහන් වන අතර, ශ්‍රේෂ්ඨාධිකරණය අද ඒ ගැන කරුණු විමසීය. ඊට ප්‍රතිචාර දක්වමින් රජයේ නීතිඥවරිය සඳහන් කළේ අදාළ විමර්ශනය කොළඹ අපරාධ කොට්ඨාසයෙන් සිදු කර පෙබරවාරි මස අවසන් සතියේ උධෘත නීතිපති වෙත ඉදිරිපත් කර ඇති බවයි. ඒ අනුව අදාළ වාර්තා පරීක්ෂා කර බලා ඉදිරි ක්‍රියාමාර්ග ගන්නා ලෙස ද අද ශ්‍රේෂ්ඨාධිකරණය නියෝග කළේය.
මෙම සිද්ධියේ පෙත්සම්කරුට පහරදීම ගැන අපරාධ විමර්ශනයක් සිදු කිරීමට අදාළ ව නිකුත් කර ඇති අධිකරණ නියෝගය මේ වන තෙක් ක්‍රියාත්මක කර නැති බව ද අද අධිකරණයේදී අනාවරණය විය. අදාළ නියෝගය ද ක්‍රියාත්මක කරන ලෙස ශ්‍රේෂ්ඨාධිකරණය රජයේ නීතිඥවරියට දැනුම් දුන්නේය.
අදාළ නියෝග ක්‍රියාත්මක වීම ගැන සොයාබැලීම සඳහා මෙම මූලික අයිතිවාසිකම් පෙත්සම මැයි මස 30 වැනිදා කැඳවීමට නියෝග කළ අධිකරණය, පෙත්සම විභාග කිරීම සඳහා ඔක්තෝබර් 21 වැනිදා කැඳවන ලෙස ද නියෝග කළේය.
Author – Medialk
