රුපියල් මිලියන 73කට ආසන්න වත්කම් අයථා ලෙස අත්පත් කරගැනීම තුළින් මුදල් විශුද්ධිකරණය වැළැක්වීමේ පනත යටතේ වරදක් සිදු කළේ යැයි චෝදනා කරමින් යෝෂිත රාජපක්ෂට සහ ඔහුගේ මිත්තණිය වන ඩේසි ෆොරස්ට් යන අයට එරෙහිව නීතිපතිවරයා විසින් ගොනුකළ නඩුව අද (25) කොළඹ මහාධිකරණ විනිසුරු උදේශ් රණතුංග ඉදිරියේ කැඳවනු ලැබීය.
අද නඩුව කැඳවූ අවස්ථාවේදී විත්තිකාර ඩේසී ෆොරස්ට්ට නඩු විභාගයකට මුහුණ දීමට සුදුසු මානසික තත්තවයක් තිබෙනවාද.? යන කරුණ පිළිබඳ කොළඹ අධිකරණ වෛද්ය නිලධාරියා මගින් කැඳවා තිබූ විශේෂ මානසික වෛද්ය වාර්තාව අද නියෝජ්ය සොලිසිටර් ජනරාල් ජනක බණ්ඩාර විසින් අධිකරණයට ඉදිරිපත් කළේය.
විත්තිකාරිය නඩු විභාගයකට මුහුණ දීමට සුදුසු මානසික තත්ත්වයක් නොමැති බවට එම වාර්තාව තුළින් වෛද්යවරු නිර්දේශ නිකුත් කර ඇති බවද නියෝජ්ය සොලිසිටර් ජනරාල්වරයා සඳහන් කළේය.
කෙසේ වෙතත් මෙම චෝදනා පත්රය සංශෝධනය කර පළමු විත්තිකාර යෝෂිත රාජපක්ෂට එරෙහිව නඩුව ඉදිරියට පවත්වාගෙන යන බවද නියෝජ්ය සොලිසිටර් ජනරාල්වරයා සඳහන් කළේය.
ඒ අනුව හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂගේ මිත්තණිය වන ඩේසි ෆොරස්ට් එම නඩුවෙන් නිදහස් කරන ලෙස කොළඹ මහාධිකරණය අද (25) නියෝග කළේය.
අනතුරුව පූර්ව නඩු විභාග සම්මන්ත්රණය සඳහා මෙම නඩුව මාර්තු මස (27) වනදා කැඳවන ලෙස විනිසුරුවරයා නියෝග කළේය.
