මැතිවරණ කොමිෂන් සභාව විසින් 2023 පළාත් පාලන ආයතන ඡන්ද විමසීමට අදාළව නිවේදනයක් නිකුත් කර ඇත.
මැතිවරණ කොමිෂන් සභාවේ සභාපති, ආර්. එම්. ඒ. එල්. රත්නායකගේ අත්සනින් යුතුව මෙම නිවේදනය නිකුත් කර ඇත.
“2023 පළාත් පාලන ආයතන ඡන්ද වීමසීමට අදාළව ගොනු කොට තිබූ මූලික අයිතිවාසිකම් අයදුම්පත් සම්බන්ධයෙන් 2024.08.22 දින ශ්‍රේෂ්ඨාධිකරණය විසින් ලබාදුන් තීන්දුව මැතිවරණ කොමිෂන් සභාව විසින් නිසි ගෞරවයෙන් යුතුව සැලකිල්ලට ගන්නා ලදී.
එසේම 2024 ජුලි මස (26) වන දින ප්‍රකාශයට පත් කරන ලද අති විශෙෂ ගැසට් නිවේදනය අනුව 2024 සැප්තැම්බර් මස (21) වන දින ජනාධිපතිවරණය පැවැත්වීමට අදාළ කටයුතු ඒ වන විටත් සිදු කෙරෙමින් පැවතීම හේතුවෙන් ජනාධිපතිවරණ ඡන්ද වීමසීම අවසන් වූ වහාම පළාත් පාලන ආයතන ඡන්ද වීමසීම පැවැත්වීමට කොමිෂන් සභාව අවශ්‍ය කටයුතු සම්පාදනය කරන ලදී.
මේ පිළිබඳව මැතිවරණ කොමිෂන් සභාව විසින් 2024.08.28 දිනැතිව මාධ්‍ය නිවේදන අංක LAE/2023/57 නිකුත් කොට ඇත.
තවද, පළාත් පාලන ආයතන ඡන්ද විමසීමේ කටයුතු සංවිධානය කිරීම පිළිබඳව දිස්ත්‍රික් නියෝජ්‍ය/ සහකාර මැතිවරණ කොමසාරිස්වරුන් සමඟ හා රජයේ මුද්‍රණාලය ඇතුළු සෙසු රාජ්‍ය ආයතන සමඟ ද සාකච්ඡා කිරීමෙන් අනතුරුව ඒ සඳහා අවම වශයෙන් දින (30- 35) ක් අතර දක්වා වූ කාලයක් අවශ්‍ය වන බැව් නිරීක්ෂණය කරන ලදී.
2024.09.21 දින පැවති ජනාධිපතිවරයා තෝරා පත්කර ගැනීමේ ඡන්ද වීමසීමෙන් තේරීපත් වූ ජනාධිපතිවරයා විසින් 2024.09.24 වන දින පාර්ලිමේන්තුව විසුරුවා හැරීමේ හා පාර්ලිමේන්තු මැතිවරණය සඳහා දින නියම කිරීමේ ගැසට් නිවේදනය නිකුත් කරන ලදී.
එබැවින් රටේ ව්‍යවස්ථාදායකයට නියෝජිතයින් තෝරා පත්කර ගැනීමේ කාර්යය සඳහා ප්‍රමුඛත්වය දී ක්‍රියා කිරීමට මැතිවරණ කොමිෂන් සභාවට සිදු වී ඇත. එසේම ජනාධිපතිවරණ ඡන්ද විමසීම් කාල සීමාව තුළදී තීරණය කළ පරිදි පාර්ලිමේන්තු මැතිවරණය අතරතුර එනම් 2024.10.26 දින ඇල්පිටිය ප්‍රාදේශීය සභා ඡන්ද විමසීම පැවැත්වීමට සිදු වී ඇත.
ශ්‍රී ලාංකික ජනතාවගේ ප්‍රජාතන්ත්‍රවාදී අයිතීන් සුරැකීම සඳහා මැතිවරණ කොමිෂන් සභාව සිය කාර්යභාරය මැනවින් වටහාගෙන කටයුතු කරනු ලබන අතර 2024 අගෝස්තු (22) වන දින ශ්‍රේෂ්ඨාධිකරණය විසින් ලබාදුන් නියෝගයට අනුකූල වෙමින් නීතියෙන් නියම කර ඇති මැතිවරණ පැවැත්වීමේ කාර්ය භාරය සැලකිල්ලට ගනිමින් පාර්ලිමේන්තු මැතිවරණයේ කටයුතු අවසන් වූ වහාම කොමිෂන් සභාව විසින් හැකි ඉක්මනින් පළාත් පාලන ආයතන ඡන්ද විමසීම පැවැත්වීමට දින නියම කිරීමට කටයුතු කරනු ලබන බව මෙයින් නිවේදනය කරනු ලැබේ.”
