By unusuma.lk on (LK time)
බංග්ලාදේශයේ ආගමන හා විදේශ ගමන් බලපත්‍ර දෙපාර්තමේන්තුව පුද්ගලයන් 97 දෙනකුගේ විදේශ ගමන් බලපත්‍ර අවලංගු කර ඇති බව විදෙස් මාධ්‍ය වාර්තා කරයි.
ඔවුන් ජූලි මාසයේදී බලහත්කාරයෙන් අතුරුදන් කිරීම් සහ ඝාතනවලට සම්බන්ධ බවට චෝදනා කරමින් විදේශ ගමන් බලපත්‍ර අවලංගු කර ඇති අතර එම ලැයිස්තුවට හිටපු අගමැතිනි ෂෙයික් හසීනා ද ඇතුළත් වන බවද විදෙස් මාධ්‍ය වාර්තා කරයි.
මෙම පුද්ගලයන් අතර 22 දෙනකු බලහත්කාර අතුරුදන් කිරීම් වලට සම්බන්ධ වන අතර හසීනා ඇතුළු 75 දෙනෙකු ඝාතන සම්බන්ධ චෝදනා වලට මුහුණ දෙන බව බංග්ලාදේශ නායක යුනුස්ගේ නියෝජ්‍ය මාධ්‍ය ලේකම් අබුල් කලාම් අසාද් සදහන් කරයි.
ජනවාරි (06) වැනිදා රටේ ජාත්‍යන්තර අපරාධ අධිකරණය (CT) පුද්ගලයන් 11 දෙනකු අත්අඩංගුවට ගැනීමේ වරෙන්තු නිකුත් කළේය.
ඒ අතර ෂෙයික් හසීනා, ඇගේ හිටපු ආරක්ෂක උපදේශක (විශ්‍රාමික) මේජර් ජෙනරාල් තාරික් අහමඩ් සිද්දික් සහ හිටපු පොලිස්පති බෙනාසීර් අහමඩ් ඇතුළත් වේ.
මෙම වරෙන්තු අවාමි ලීග් ආණ්ඩුවේ 15 වසරක පාලන සමයේදී සිදු කරන ලදැයි කියනු ලබන නීති විරෝධී ඝාතන සහ බලහත්කාරයෙන් අතුරුදන් කිරීම් සම්බන්ධ සිද්ධි වලට අදාළ වේ.
ඒ අනුව මෙම සැකකරුවන් අත්අඩංගුවට ගෙන 2025 පෙබරවාරි (12) දිනට පෙර අධිකරණයට ඉදිරිපත් කරන ලෙස බලධාරීන්ට උපදෙස් ලැබී ඇත.
මේ වන විට මෙම චෝදනා සම්බන්ධයෙන් හිටපු අගමැතිනි හසීනාට එරෙහිව නඩු දෙකක් ගොනු කර ඇතත් ඇය තවමත් සිටින්නේ ඩකාහි නීතිමය සීමාවෙන් ඔබ්බෙහි ඉන්දියාවේය.
