By unusuma.lk on (LK time)
අලිමංකඩ නව ලුණු කර්මාන්තශාලාව ආරම්භ කිරීමත් සමඟ හිටපු අමාත්‍ය විමල් වීරවංශ මහතා විසින් සිය නිල යූටියුබ් නාලිකාවේ “මගේම කලිසම අගේට ඇඳගෙන ඌ උගේ වගේ යනවා.” ‘අලිමංකඩ ලුණු’ ඇත්ත කතාව සාක්ෂි සහිතවම විමල් හෙළිකරයි.!” යන මැයෙන් පලකර තිබූ වීඩියෝව සම්බන්ධයෙන් කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා අදහස් දැක්වීය.
අමාත්‍යවරයා පැවසූයේ අලිමංකඩ ලුණු කර්මාන්තශාලාව ආරම්භ කිරීම සම්බන්ධයෙන් හිටපු කර්මාන්ත අමාත්‍යවරයක වූ විමල් වීරවංශ මහතා කිසිදු දායකත්වයක් ලබාදී නොමැති බවත් ඔහු විසින් සිදු කරනා ප්‍රකාශයන් සම්පූර්ණයෙන්ම දේශපාලන කුහකත්වය සහ ඊර්ෂ්‍යාව මත සිදුකරන ප්‍රකාශයන් පමණක් බවයි.
විමල් වීරවංශ වැනි ජනතාවගෙන් ප්‍රතික්ෂේප වූ දේශපාලන අනාතයින් සඳහා පිළිතුරු ලබාදිය යුතු නොවූවත් මෙවැනි අසත්‍ය ප්‍රකාශයන් හරහා ජනතාව මුළා කිරීම වැළැක්වීම පිණිස මෙම ප්‍රකාශය සිදු කරන බවද අමාත්‍යවරයා පැවසීය.
වැඩිදුරටත් අදහස් දක්වමින් අමාත්‍යවරයා පැවසූවේ වෙනත් පුද්ගලයින් විසින් සිදුකළ ව්‍යාපෘති සම්බන්ධව ලකුණු දා ගැනීමේ හීන මානසිකත්වයක් තමා ඇතුළු රජයට නොපවතින බවත් මේ සම්බන්ධයෙන් ගෞරවය හිමි විය යුත්තේ හිටපු අමාත්‍ය රමේෂ් පතිරණ මහතාට බවත් ය.
මෙම කර්මාන්ත ශාලාවට අයත් යන්ත්‍ර සූත්‍ර 2023 වසරේ ආනයනය කිරීමට කටයුතු කර තිබුණි එවකට හිටපු අමාත්‍යවරයෙකු රමේෂ් පතිරණ අමාත්‍යවරයා විසින් බැවින් ඔහුට මේ සම්බන්ධව ගෞරවය හිමි විය යුතු නමුත් විමල් වීරවංශයට මෙහි කිසිදු කටයුත්තකට සම්බන්ධ වී නොමැති අතර දේශපාලනිකව තම පක්ෂය සහ කණ්ඩායම සමඟ පවතින දේශපාලන ඉරිසියාව මත සිදුකරනා ප්‍රකාශයන් සම්බන්ධයෙන් අනුකම්පා කරනා බවද ඔහු වැඩිදුරටත් සඳහන් කළේය.
