By unusuma.lk on (LK time)
චීනය සමඟ මෙරට ණය සම්බන්ධයෙන් ගිවිසුමකට එළඹීමත් සමඟ පසුගිය ණය අර්බුදය හේතුවෙන් අතරමග නවතා දැමූ මෙරට ව්‍යාපෘතිවලට වෙන්වී තිබූ ඇමෙරිකානු ඩොලර් බිලියන 1.5 ක මුදලක් ශ්‍රී ලංකාවට ලැබීමට නියමිත බව වාර්තා වේ.
ශ්‍රී ලංකාවේ නිල ණය හිමියන්ගේ කමිටුව සහ චීන අපනයන – ආනයන බැංකුව සමඟ ණය ප්‍රතිව්‍යුහගත කිරීම සඳහා ගිවිසුම්වලට එළඹීමත් සමඟ මෙම මුදල ශ්‍රී ලංකාවට හිමිවීමට නියමිත බව වැඩිදුරටත් සඳහන්.
එම මුදල් අතර දැනට වසර තුනකට අධික කාලයක් ප්‍රමදවී ඇති කඩවත – මීරිගම අධිවේගී මාර්ග කොටස සඳහා වෙන්වුණු මුදල්ද ඇතුලත් බව මහා භාණ්ඩාගාරය පවසයි.
මේ වනවිට එම ව්‍යාපෘති නැවත ආරම්භ කිරීමට චීන අපනයන – ආනයන බැංකුව සමඟ නව කොන්දේසි සම්බන්ධයෙන් සාකච්ඡා කරමින් සිටිනා බව වාර්තා වේ.
මහාමාර්ග අමාත්‍ය බන්දුල ගුණවර්ධන පැවැසුවේ ඇමෙරිකානු ඩොලර් බිලියන 1.5ක මුදල නිදහස් කරගැනීමට හැකිවීමේ ප්‍රතිඵලයක් ලෙස ලබන වසරේ ප්‍රමාදවූ මාර්ග ව්‍යාපෘතිවලින් බහුතරයක් ආරම්භ කිරීමට අවස්ථාව උදාවන බවයි.
ලබන මාසයේදී එම මුදල නිදහස් කර ගැනීම සඳහා චීනය සමඟ සාකච්ඡා ආරම්භ කරන බවත් එම මුදලේ පළමු වාරිකය සාකච්ඡා ආරම්භ කර මාස 2 ක් තුළ ලබා ගැනීමට හැකිවනු ඇති බවත් අමාත්‍යවරයා වැඩිදුරටත් පැවසීය.
