හිටපු අමාත්ය කෙහෙළිය රඹුක්වැල්ල ඇතුළු පවුලේ සමාජිකයින්ට එරෙහිව අල්ලස් කොමිසම විසින් ගොනුකර තිබෙන නඩුව අද (13) කොළඹ මහාධිකරණ විනිසුරු මොහොමඩ් මිහාල් හමුවේ කැඳවනු ලැබීය.
අනතුරුව අල්ලස් කොමිසමේ නිලධාරීන් හා විත්තිය වෙනුවෙන් පෙනී සිටි නීතිඥ කාංචන රත්වත්තේ විසින් ඉදිරිපත් කළ කරුණු සලකා බැලීමෙන් අනතුරුව එම නඩුව විභාගයට අප්රේල් මස (27) වනදා විභාගයට ගැනීමට විනිසුරුවරයා දින නියම කළේය.
තවද සාක්ෂිකරුට අධිකරණය හමුවේ පෙනී සිටින ලෙස දන්වා සිතාසි නිකුත් කරන ලෙසද විනිසුරුවරයා නියෝග කළේය.
2020 අගෝස්තු (13) වනදා සිට 2024 ජුනි (24) වනදා දක්වා කාල සීමාව තුළ ජනමාධ්ය, සෞඛ්ය සහ පරිසර අමාත්යවරයා වශයෙන් කටයුතු කළ අවධියේ අයථා ලෙස වත්කම් උපයා ගැනීම තුළින් මුදල් විශුද්ධිකරණය වැළැක්වීමේ පනත යටතේ වරදක් සිදු කළේ යැයි චෝදනා කර අල්ලස් කොමිසම විසින් මෙම විත්තිකරුවන්ට එරෙහිව අධි චෝදනා ඉදිරිපත් කර ඇත.
