පාස්කු ත්රස්ත ප්රහාරය වළක්වා ගැනීමට කටයුතු නොකිරීම තුළින් සාපරාධි ලෙස මිනීමැරීම යන චෝදනා යටතේ ඉදිරිපත් වූ පුද්ගලික පැමිණිල්ලකට අදාළව හිටපු ජනාධිපති මෛත්රිපාල සිරිසේනට අධිකරණය හමුවේ පෙනී සිටින ලෙස දන්වා සිතාසි නිකුත් කරන ලෙස කොළඹ කොටුව මහෙස්ත්රාත් අධිකරණය විසින් 2022 වසරේ කළ නියෝගයක් බලරහිත කරමින් අභියාචනාධිකරණය අද (03) රිට් ආඥාවක් නිකුත් කර ඇත.
හිටපු ජනාධිපති මෛත්රිපාල සිරිසේන විසින් ඉදිරිපත් කළ රිට් පෙත්සමක තීන්දුව දෙමින් පංච පුද්ගල අභියාචනාධිකරණ විනිසුරු මඩුල්ලක් විසින් මෙම නියෝගය ප්රකාශයට පත් කර ඇත.
ධම්මික ගනේපොල, මායාදුන්නේ කොරයා, පී. කුමාරන් රත්නම්, ශෂී මහේන්ද්රන් සහ අමල් රණරාජා යන මහත්වරුන්ගේ සමන්විත අභියාචනාධිකරණ විනිසුරු මඩුල්ල විසින් මෙම තීන්දුව ප්රකාශයට පත් කළේය.
එහෙත් නව සාක්ෂි ඉදිරිපත් වන්නේ නම් කොටුව මහෙස්ත්රාත් අධිකරණය හමුවේ පවතින අදාළ පුද්ගලික පැමිණිල්ල ඉදිරියට පවත්වාගෙන යාමට මෙම නඩු තීන්දුව බාධාවක් නොවන බවද විනිසුරු මඩුල්ල සඳහන් කළේය.
සිරිල් ගාමිණී පියතුමා සහ පාස්කු ඉරු දින ත්රස්ත ප්රහාරයෙන් වින්දිතයකු බවට පත් වූ ජේසුරාජ් ගනේෂන් යන අය මෙම පෙත්සමේ වග උත්තරකරුවන් ලෙස නම් කර ඇත.
