By unusuma.lk on (LK time)
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පසුගියදා වෛද්‍ය නෙවිල් ප්‍රනාන්දු රෝහලේ සිදුකරන විශේෂ නිරීක්ෂණ චාරිකාවකට එක්වීමෙන් අනතුරුව පැවැත්වූ සාකච්ඡාවේදී සඳහන්කර සිටියේ, ප්‍රධාන ධාරාවන් කිහිපයක් පිළිබදව අවධානය යොමු කර සුදුසුම සංවර්ධන සැළැස්ම ක්‍රියාත්මක කරමින් මාළඹේ වෛද්‍ය නෙවිල් ප්‍රනානදු රෝහල රටට අතිශය ඵලදායී රෝහලක් ලෙස කඩිනමින් සංවර්ධනය කිරීමට පියවර ගන්නා බවයි.
වෛද්‍ය නලින්ද ජයතිස්ස මහතා සෞඛ්‍ය අමාත්‍යවරයා ලෙස සිය ධූරයේ රාජකාරී ආරම්භ කිරීමෙන් පසු රජයේ රෝහලක සිදුකරන ලද පළමු නිරීක්ෂණ චාරිකාව ද මෙය වන අතර මෙහිදී අමාත්‍යවරයා රෝහලේ සියලු අංශ නිරීක්ෂණයට ලක් කරමින් අදාල ඉදිරි සැළසුම් සකස් කිරීම සදහා අමාත්‍යංශයේ නිලධාරීන්, විශේෂඥ වෛද්‍යවරුන් ප්‍රමුඛ රෝහල් කාර්ය මණ්ඩලය සමග ඉතා දීර්ඝ සාකච්ඡාවක නිරත විය.
සෞඛ්‍ය සේවා අධ්‍යක්ෂ ජනරාල්වරයාගේ ප්‍රධානත්වයෙන් රෝහල ඉදිරියේ පවත්වාගෙන යායුතු ආකාරය සහ සංවර්ධනය කලයුතු ආකාරය පිළිබදව නිර්දේශ ඉදිරිපත් කිරීම සදහා අමාත්‍යවරයා පත්කර තිබෙන විශේෂ කමිටුව විසින් වෛද්‍ය නෙවිල් ප්‍රනානදු රෝහලේ ඉදිරි සංවර්ධන කටයුතු පිළිබදව ව්‍යාපෘති යෝජනාවලියක් මේ වන වන විට සකස්කරමින් සිටින බව එහිදී අමාත්‍යවරයා සඳහන් කළේය.
වත්මන් රජයේ ප්‍රධාන ඉලක්කය වන ශ්‍රී ලංකාව සෞඛ්‍ය කේන්ද්‍රකරගත් සංචාරක ව්‍යාපාර අංශයෙන් ද ප්‍රධාන කේන්ද්‍ර ස්ථානයක් බවට ඉදිරියේදී පත් කිරීම සඳහා මෙම රෝහල දේශීය වෛද්‍ය ක්‍රමයද සම්බන්ධ කරගනිමින් සංවර්ධනය කිරීමේ හැකියාව පවතින බවද අමාත්‍යවරයා පැවසීය.
එමෙන්ම නෙවිල් ප්‍රනාන්දු රෝහල ස්ථාපිත කර ඇති භූමිය පිළිබදව සලකා බලන විට සාර්ථක සංචාරක ව්‍යාපාර ආකෘතියකට ගැලපෙන පසුබිමක් පවතින නිසා එවැනි පියවරක් අනුගමනය කිරීමට පිහිටීමද වඩා යෝග්‍යවනු ඇතැයිද අමාත්‍යවරයා වැඩිදුරටත් සදහන් කලේය.
නෙවිල් ප්‍රනාන්දු රෝහලේ වැටුප් ගෙවීම සදහා දැනට සෞඛ්‍ය හා ජනමාධ්‍ය අමාත්‍යාංශය මගින් මාසිකව රුපියල් මිලියන 40 මුදලක් වැයකරන බව පෙන්වා දුන් අමාත්‍යවරයා තව දුරටත් මෙම රෝහල රජයේ රෝහලක් ලෙස සම්ප්‍රදායිකව පවත්වාගෙන යාමට අරමුණක් නොමැති බවත්, ජාත්‍යන්තරව සහ මෙරට තත්ත්වයන් සැලකිල්ලට ගනිමින් හා නිපුණතාවන්ගෙන් පරිපුර්ණ රෝහල් කාර්ය මණ්ඩලයේ පුහුණුව මෙන්ම ගුණාත්මකභාවයද සැළකිල්ලම ගනිමින් අලුත් ආකෘතියක් යටතේ මෙම රෝහල නව්‍යකරණයකට ලක්කිරීමට සැලසුම් සකස් කරන බව ද අවධාරණය කලේය.
වෛද්‍ය නෙවිල් ප්‍රනාන්දු රෝහල ඇදන් 1002 ක ඉලක්කගත ධාරිතාවකින් සමන්විත වන අතර දැනටමත් ඇදන් 800 ක පමණ ධාරිතාවකින් සමන්විත වන බවත්, මේ වන විටද ඇදන් 440 ක පමණ ප්‍රමාණයක් එදිනෙදා භාවිතයට යොදාගෙන ඇති බවත් මෙහිදී අනාවරණය විය.
එමෙන්ම සාමාන්‍ය වාට්ටු, වෙන්කරන ලද ඇදන් සහිත වාට්ටු මෙන්ම සුභෝපභෝගී, අර්ධ සුභෝපභෝගී සහ සාමාන්‍ය තත්වයේ කාමර ආදී වශයෙන් කාමර 100 ක පමණ ප්‍රමාණයක් දැනටමත් ස්ථාපිත කර ඇත.
2013 වර්ෂයේදී මාළඹේ සයිටම් වෛද්‍ය විද්‍යාලයට අනුබද්ධව මෙම රෝහල ආරම්භකර ඇති අතර 2017 වර්ෂයේදී එය රජයට පවරා ගැනීමේ මුලික කටයුතු ආරම්භ වී ඇත
