පාර්ලිමේන්තුව හෙට (07), (09) සහ (10) යන දිනවල රැස්වීමට නියමිත බව පාර්ලිමේන්තුවේ මහ ලේකම් කුෂානි රෝහණදීර සඳහන් කළාය.
කථානායක වෛද්ය ජගත් වික්රමරත්නගේ ප්රධානත්වයෙන් පසුගිය (19) දින පැවති පාර්ලිමේන්තු කටයුතු පිළිබඳ කාරක සභා රැස්වීමේදී මෙම තීරණය ගෙන ඇත.
අප්රේල් (07) වැනිදා පෙ.ව. 11.30 සිට ප.ව 4.45 දක්වා ක්රීඩාවල යෙදීමේදී උත්තේජක ද්රව්ය ගැනීමට එරෙහි සම්මුති පනත යටතේ නියෝග, ක්රමෝපාය සංවර්ධන ව්යාපෘති පනත යටතේ නියෝග සහ ශ්රී ලංකා මහ බැංකු පනත යටතේ රීති විවාදයට ගැනීමට නියමිතය.
තවද 2026.03.17 දින පළමුවර කියවීම සඳහා පාර්ලිමේන්තුවට ඉදිරිපත් කළ දේශීය ආදායම් (සංශෝධන) පනත් කෙටුම්පත සහ සමාජ ආරක්ෂණ දායකත්ව බදු (සංශෝධන) පනත් කෙටුම්පත යන පනත් කෙටුම්පත් ද්විත්වය ආණ්ඩුක්රම ව්යවස්ථාවේ 121 ව්යවස්ථාව ප්රකාරව ශ්රේෂ්ඨාධිකරණය ඉදිරියේ අභියෝගයට ලක් නොවුණහොත් මෙදින දෙවනවර කියවීමට තීරණය වී ඇත.
අප්රේල් (09) වැනිදා පෙ.ව 11.30 සිට ප.ව 2.00 දක්වා (357 අධිකාරය වූ) යුද්ධ හමුදා පනත යටතේ නියෝග, (358 අධිකාරය වූ) නාවික හමුදා පනත යටතේ නියෝග සහ (359 අධිකාරය වූ) ගුවන් හමුදා පනත යටතේ නියෝග විවාදයට ගැනේ.
තවද මහජන ආරක්ෂක ආඥා පනත යටතේ සහ අත්යවශ්ය මහජන සේවා පනත යටතේ ගරු ජනාධිපතුමා විසින් ප්රකාශන පළ කරනු ලැබුවහොත් ඊට අදාළ වූ යෝජනා සම්මත ද්විත්වය මෙදින විවාදයට ගැනීමට තීරණය වී ඇත.
අප්රේල් (10) වැනිදා පෙ.ව 11.30 සිට ප.ව 5.30 දක්වා බලශක්ති අමාත්ය කුමාර ජයකොඩිට එරෙහිව විපක්ෂය විසින් ඉදිරිපත් කර ඇති විශ්වාසභංග යෝජනාව විවාදයට ගැනීමට තීරණය කර ඇත.
