By unusuma.lk on (LK time)
වකුගඩු රෝගයෙන් පෙළන්නන් වැඩිපුර ජීවත් වෙන ප්‍රදේශ වල පහසුකම් සැපයීම සදහා විදේශ ආධාර රුපියල් මිලියන 8940කින් 2012 වසරේ ආරම්භ කරන ලද ව්‍යාපෘති රැසක් 2024 වන තුරුත් අවසන් කර නැති බව විගණන වාර්තාවකින් අනාවරණය වෙයි.
පළාත් පාලන ආයතන මගින් ක්‍රියාත්මක කරන ලද මෙම ව්‍යාපෘතිය පසුගිය 2015 ජුනි (30) අවසන් කළ යුතුව තිබුණද පසුව 2024 ජනවාරි (31) දක්වා දීර්ඝ කරගෙන තිබෙන බවද විගණන වාර්තාවේ සදහන් වෙි.
ව්‍යාපෘතිය වඩාත් පුළුල්ව අවසන් කිරීමට බව පවසමින් යළි රුපියල් මිලියන 9,771ක වටිනාකමින් යුත් විදේශ ණයක් ලබාගෙන ඇති අතර ඒ අනුව ව්‍යාපෘතියේ සමස්ත වටිනාකම රුපියල් මිලියන 18,711ක් වේ.
එහෙත් මෙම මුදල් භාවිතා කර ආරම්භ කළ රුපියල් මිලියන 3,809 ක් වටිනා ව්‍යාපෘති 33 ක් අතර මග නවතා ඇති බවද විගණන වාර්තාවේ සදහන් වෙයි.
එසේම ව්‍යාපෘතිය සක්‍රියව පවත්වා ගෙන යෑම සදහා පළාත් පාලන ආයතන 07 ක ස්ථාපනය කරන ලද මෘදුකාංග පද්ධති වලින් අහඹු ලෙස පරීක්ෂා කළ පද්ධති පහකම එය ආරම්භ කරන ලද අවස්ථාවේ ඇතුළත් කළ දත්ත පමණක් පැවැති බවත් ඒවාද යාවත්කාලීන කර නැති බවත් අලුතෙන් කිසිදු දත්තයක් ඇතුළත් කර නැති බවද විගණන වාර්තාවේ සදහන් වේ.
ඒ අනුව රුපියල් මිලියන 18,711ක් වැය කළ මෙම ව්‍යාපෘතිය වසර 12ක් වැනි කාලයක් ගනිමින් ක්‍රියාත්මක කළද ඉන් නිසි ප්‍රයෝජනයක් ලැබී නැති බවද විගණන වාර්තාවෙන් අනාවරණය වෙයි.
