By unusuma.lk on (LK time)
හිටපු ජනාධිපති රනිල් වික්‍රමසිංහ මහතාගේ කොළඹ පිහිටි පෞද්ගලික නිවසට ගිනි තැබීමේ සිද්ධියට සම්බන්ධ සැකකරුවෙකු ලෙස තමා නම් කර ඇතැයි පුවත්පත් වාර්තාවල පළවූ ප්‍රවෘත්ති සම්පූර්ණයෙන්ම අසත්‍යක් බව තරුණ කටයුතු නියෝජ්‍ය අමාත්‍ය එරංග ගුණසේකර මහතා පවසයි.
පසුගිය 2022 ජූලි 9 වැනි දින රටපුරා ඇති වූ ව්‍යාකූල තත්ත්වය අතරතුර, වික්‍රමසිංහ මහතාගේ 5 වන පටුමගේ පිහිටි නිවසට ගිනි තැබීමේ සිද්ධියට සම්බන්ධ සැකකරුවෙකු ලෙස ඔහු හඳුනාගෙන ඇති බවට පුවත්පතක පළ වූ වාර්තාව සම්පූර්ණයෙන්ම ප්‍රතික්ෂේප කරනා බවත් එවැනි තොරතුරු වාර්තාකිරීම පිළිබඳ තමා කණගාටු වන බවත් මාධ්‍ය වෙත අදහස් දක්වමින් නියෝජ්‍ය අමාත්‍යවරයා පැවසීය.
“මෙය සම්පූර්ණයෙන්ම සාවද්‍ය වාර්තාවක්. අප අදාළ පොලිස් ස්ථාන සමඟ මේ පිළිබඳව සත්‍යතාව තහවුරු කර ගත්තා. අපගේ නීතිඥයන් ද අධිකරණයෙන් විමසීම් කර ඇති අතර, මා මෙම සිද්ධියට සම්බන්ධ කරන කිසිදු චෝදනාවක් නැහැ,”
ෑදාළ පුවත්පත් වාර්තාවේ සඳහන් වූයේ, 2022 වසරේ රනිල් වික්‍රමසිංහ මහතාගේ නිවසට ගිනි තැබීම සහ ගිනි නිවන භටයන්ට බාධා කිරීම සම්බන්ධයෙන් පැවරී ඇති චෝදනා සම්බන්ධ නඩුව කොටුව මහේස්ත්‍රාත් අධිකරණයේ විභාගයට ගැනුණු අවස්ථාවේ, ගුණසේකර මහතා අධිකරණයට පැමිණ නොසිටි බවයි.
නියෝජ්‍ය අමාත්‍යවරයා වැඩිදුරටත් පැවසූවේ එම වාර්තාව වැරදි තොරතුරු මත පදනම් වූ එකක් වන අතර, එය අධිකරණයට සිදුකළ අපහාස කිරීමක් ද වන බවයි.
නියෝජ්‍ය අමාත්‍යවරයා සඳහන් කළ පරිදි, අදාළ වැරදි වාර්තා පළ කිරීම සම්බන්ධයෙන් ඔහුගේ නීතිඥයන් දැනටමත් අවශ්‍ය පියවර ගෙන ඇති අතර එය හුදෙක් වාර්තාකරණයේ වරදක් නොවන බවත් සිය චරිතයට අපහාස කිරීමක් ලෙස සලකන බවත් ය.
එමෙන්ම මෙවැනි ප්‍රවෘත්ති වලින් මහජනතාව නොමඟ යැවීම වළක්වා ගැනීම සඳහා අවශ්‍ය නීතිමය ක්‍රියාමාර්ග ගන්නා බවද අමාත්‍යවරයා අවධාරණය කළේය.
