By unusuma.lk on (LK time)
විපක්ෂ කණ්ඩායම්වලට බහුතර මන්ත්‍රී ධුර සංඛ්‍යාවක් හිමිව තිබූ බණ්ඩාරවෙල මහ නගර සභාවේ බලය පිහිටවීමට ආණ්ඩු පක්ෂයට හැකියාව ලැබී තිබේ.
ස්වාධීන කණ්ඩායම් දෙකක මන්ත්‍රීවරුන් දෙදෙනෙකුගේ සහාය ලැබීමත් සමඟ මන්ත්‍රීවරුන් 6 දෙනෙකු පමණක් සිටි ජාතික ජන බලවේගය අද පැවති නගරාධිපතිවරයා තෝරා ගැනීමේ ඡන්ද විමසීමේදී ජයග්‍රහණය කරන ලදී.
පසුගිය පළාත් පාලන ආයතන ඡන්ද විමසීමේදී බණ්ඩාරවෙල මහ නගර සභාවේ සභික ධුර 16න් ජාතික ජන බලවේගයට සභික ධුර 6ක් හිමිවිය. කෙසේ වෙතත්, විපක්ෂයේ සියලු පක්ෂවල සභිකයන්ගේ එකතුව 10ක් වූ බැවින්, විපක්ෂයට මහ නගර සභාවේ බහුතර බලය හිමි විය.
මෙම තත්ත්වය යටතේ විපක්ෂය ඒකාබද්ධව නගරාධිපතිවරයෙකු පත් කර ගැනීම සඳහා සාකච්ඡා ආරම්භ කළ අතර, ඒ සඳහා ඡන්ද විමසීම අද දිනයට නියමිතව තිබිණි.
කෙසේ වෙතත්, සමගි ජන බලවේගය තමන්ට ලැයිස්තුවෙන් හිමිවූ මන්ත්‍රී ධුර 3 සඳහා පුද්ගලයින් නම් කර නොතිබූ බැවින්, අද වන විට ගැසට් කර තිබුණේ ජාතික ජන බලවේගයේ සභිකයන් 6 දෙනාගේ සහ විපක්ෂයේ සෙසු 7 දෙනාගේ නම් පමණි.
බණ්ඩාරවෙල මහ නගර සභාවේ මන්ත්‍රී ධුර බෙදී ගිය ආකාරය පහත පරිදි වේ:
- ජාතික ජන බලවේගය: මන්ත්‍රී ධුර 6
- ස්වාධීන කණ්ඩායම අංක 1: මන්ත්‍රී ධුර 5
- සමගි ජන බලවේගය: මන්ත්‍රී ධුර 3
- ශ්‍රී ලංකා පොදුජන පෙරමුණ: මන්ත්‍රී ධුර 1
- ස්වාධීන කණ්ඩායම 2: මන්ත්‍රී ධුර 1
කෙසේවෙතත් අද පැවති ඡන්ද විමසීමේදී ස්වාධීන කණ්ඩායම් දෙකක මන්ත්‍රීවරුන් දෙදෙනෙකුගේ සහාය ජාතික ජන බලවේගයට හිමි වීමත් සමඟ ඔවුන්ට බණ්ඩාරවෙල මහ නගර සභාවේ බලය අත්පත් කර ගැනීමට හැකි විය.
