By unusuma.lk on (LK time)
පසුගිය 23 වැනිදා බිංගිරිය වයඹ ජාතික අධ්‍යාපන විද්‍යා පීඨයේ දෙවැනි වසරේ අධ්‍යාපනය ලබමින් සිටි සිසුවියක් නේවාසිකාගාර කාමරයේ ගෙල වැලලාගෙන ජීවිතක්ෂයට පත් විය.
සිද්ධියෙන් ජීවිතක්ෂයට පත්වූයේ මහනුවර තෙල්දෙනිය දෙල්ගස්තැන්න ප්‍රදේශයේ පදිංචි සංජීවනී කුමාරි නම් 23 හැවිරිදි සිසුවියකි.
කෙසේවෙතත් මෙම සිසුවිය දිවි හානි කර ගැනීමේ සිද්ධියට එහි පාලනාධිකාරිය හා කථිකාචාර්යවරුන් වගකිව යුතු බව කියමින් සිසු සිසුවියෝ පිරිසක් විද්‍යා පීඨයේ ඉදිරිපිට දී පෙරේදා (24) පස්වරුවේ නිහඬ විරෝධතාවක නිරත වූහ.
මෙම සියදිවි නසා ගැනීමට අධ්‍යාපන විද්‍යා පීඨයේ පාලනාධිකාරිය හා කථිකාචාර්යවරුන් වග කිව යුතු බව උද්ඝෝෂණයේ නිරත සිසු සිසුවියෝ චෝදනා කරති.
දිවි නසා ගැනීමට තරම් මෙම සිසුවිය මානසික පීඩාවකට පත්කර ඇත්තේ එක්තරා කථිකාචාර්යවරයකු බවත් වයඹ අධ්‍යාපන පීඨය අධ්‍යාපන ආයතනයක් ලෙස නොව තරුණ සිරකරුවන්ගේ කඳවුරක් ලෙසට පාලනය කරන බවත් සිසු සිසුවියෝ චෝදනා කරති.
ඔව්හු විරෝධතා පුවරු ප්‍රදර්ශනය කරමින් පැය තුනකට පමණ ආසන්න කාලයක් සිසු සිසුවියෝ විරෝධතාවේ නිරතව සිටි අතර වයඹ ජාතික අධ්‍යාපන විද්‍යා පීඨයේ පීඨාධිපති ලාල් කුමාර මහතා අනතුරුව එහි පැමිණ සිසුන් සමග සාකච්ඡාවක නිරතවීමෙන් පසු ඔවුහු විසිර ගොස් ඇත.
හලාවත විදුහලක ප්‍රාථමික අංශයේ සිසුනට අකුරු කියාදීමේ පුහුණු වැඩසටහනකට තවත් ගුරු පුහුණුව ලබන සිසුවියන් සමග ඉකුත් 23 වැනිදා ගොස් ඇති මෙම සිසුවිය නැවත නේසිකාගාරයට පැමිණ අනතුර සිදු කරගෙන ඇතැයි පොලිසිය පවසයි.
කෙසේවෙතත් මාධ්‍යයට ප්‍රකාශයක් කරමින් පීඨාධිපති ලාල් කුමාර මහතා කීවේ. විද්‍යා පීඨයේ පවතින සම්ප්‍රදාය අනුව විද්‍යා පීඨයේ ගුරුවරුන් කටයුතු කර තිබෙන බවයි.
“ළමයි පීඩාවට පත් කිරිමක් හෝ වෙන දෙයක් මෙහි වන්නේ නෑ ඒ ළමයා මිය යන්න සති දෙකකට කලින් ගෙදර ගියා. ජීවිතය එපාවෙලා තියෙනවා යැයි අක්කලට කියා තිබෙනවා. පීඩනයක් තිබෙන බව කියා තිබෙනවා” යැයි පීඨාධිපතිවරයා කීය.මේ පිළිබඳව බිංගිරිය පොලිසිය පරීක්ෂණ පවත්වයි.
