Attention (Sinhala)

ජනාධිපති අනුර කුමාර දිසානායක මහතා ආරක්ෂක අමාත්‍යාංශය වෙත උපදෙස් ලබාදී ඇත්තේ වී මිලදී ගැනීම සඳහා අවශ්‍ය යටිතල පහසුකම් සංවර්ධනය කිරීමට වී අලෙවි මණ්ඩලය හා සතොස සතු අඩුපාඩුකම් පවතින ගබඩා අලුත්වැඩියා කිරීමට ත්‍රිවිධ හමුදා තාක්ෂණික සහය හා ශ්‍රම දායකත්වය ලබාදීමට කටයුතු කරන ලෙසයි.

දිවයින පුරා වී අලෙවි මණ්ඩලය සතු ගබඩා 209ක් පමණ පවතින අතර සතොස සතුව ගබඩා 12ක ප්‍රමාණයක් පවතී. එම ගබඩාවන්හි පවතින අඩුපාඩුකම් හා ගතයුතු පියවර මෙන්ම ඉදිරි සැලසුම් පිළිබඳවත් රජය පාර්ශවයෙන් සාකච්ඡාවට ලක්ව ඇති බව වාර්තා වේ.

ඒ අනුව එම කටයුත්ත කාර්‍යක්ෂම කිරීම වෙනුවෙන් ත්‍රිවිධ හමුදා සාමාජිකයන්ගේ ශ්‍රම දායකත්වයත්, තාක්ෂණික දැනුම සහ එම කටයුතු සඳහා යන්ත්‍ර සූත්‍ර යොදා ගැනීමටත් රජයේ අවධානය යොමුව ඇත.

එමෙන්ම අස්වනු නෙළන කාලය වනවිට ගබඩාවන්හි පවතින අලුත්වැඩියා කටයුතු මේ මස අවසන් වීමට පෙර නිමකර මහ කන්නයේ අස්වනු මිලදී ගැනීම සඳහා සූදානම් කිරීමටත් වී මිලදී ගැනීමෙන් අනතුරුව එම ගබඩා පරිශ්‍රයන් සඳහා ආරක්ෂාව සැපයීමටත් ආරක්ෂක අමාත්‍යාංශය සිය එකඟතාවය පළ කර ඇත.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග මහතා දිවයින ඉරිදා පුවත්පතට ප්‍රකාශයක් කරමින් පවසා ඇත්තේ පොලිසියට අවශ්‍ය ප්‍රධාන පෙළේ අපරාධකරුවන් හතර දෙනකු (පොඩි ලැසීට අමතරව) ජාත්‍යන්තර පොලිසිය මගින් ඩුබායි සහ තවත් රටවල් තුනකදී අත්අඩංගුවට ගෙන ඇති බවයි.

ආරක්ෂක හේතුන් මත එම සැකකරුවන් නම් ගම් හෙළිකිරීමට නොහැකි බවද ද මනතුංග මහතා පවසයි.

ඔහු වැඩිදුරටත් පවසන්නේ, ශ්‍රී ලංකාවේ සිට පිටරටවලට පැනගිය අපරාධකරුවන්ගේ නම් ලැයිස්තුව ජාත්‍යන්තර පොලිසියට ඉදිරිපත් කිරීමෙන් පසු ඔවුන් අල්ලා ගැනීමේ මෙහෙයුම් ජාත්‍යන්තර පොලිසිය අදාළ රටවල් සමඟ ඒකාබද්ධව දිගින් දිගටම සිදුකරගෙන යන බවයි.

ඒ අනුව ශ්‍රී ලංකා අපරාධකරුවන් 63 දෙනකුට ජාත්‍යන්තර පොලිසිය රතු නිවේදන නිකුත්කර ඇති බවද ඔහු පවසයි.

සමගි ජන බලවේගයේ පාර්ලිමේන්තු මන්ත්‍රි මනෝ ගනේෂන් පවසන්නේ දේශපාලන සිරකරුවන් යැයි පිරිසක් නැතැයි කියන පැරැණි ප්‍රශස්ති ගායනා කිරීම නවතා දෙමළ දේශපාලන සිරකරුවන් සියලු ම දෙනා වහා නිදහස් කිරීමට වත්මන් ආණ්ඩුව කටයුතු කළ යුතු බවයි.

ඔහු මේ බව පැවසූවේ දේශපාලන සිරකරුවන් යැයි පිරිසක් බන්ධනාගාරවල නැතැයි අමාත්‍ය හර්ෂණ නානායක්කාර විසින් කළා යැයි කියන ප්‍රකාශයකට ප්‍රතිචාර දක්වමිනි.

එහිදී අදහස් දැක්වූ මනෝ ගනේෂන් මහතා,

“දේශපාලන සිරකරුවන් යැයි කණ්ඩායමක් නැති බව අමාත්‍ය හර්ෂණ නානායක්කාර ප්‍රකාශ කළා. මොහු හිටපු අමාත්‍ය වාසුදේව නානායක්කාරගේ සහෝදරයාගේ පුතා. එවක ජනතා විමුක්ති පෙරමුණ ආණ්ඩුවට විරුද්ධව සටන් කළ ඔවුන්ගේ සහෝදරයන්ව සිරගත කළ අවස්ථාවේ ඔවුන්ව හැඳින්වූයේ දේශපාලන සිරකරුවන් වශයෙන්. නමුත් යුද්ධය හේතුවෙන් අත්අඩංගුවට ගෙන දීර්ඝ කාලයක් බන්ධනාගාර ගතකර සිටින දෙමළ සිරකරුවන්ව දේශපාලන සිරකරුවන් වශයෙන් හැඳින්වීම ප්‍රතික්ෂේප කරනවා.

බන්ධනාගාරවල දේශපාලන සිරකරුවන් කියා කොටසක් නැතැයි ඇතැමුන් එදා පටන් සිදුකරන ප්‍රකාශ අසා අපට හොඳ පුරුද්දක් තිබෙනවා. විශාල පෙරළියක් සිදු කිරීමට බව පවසමින් බලයට පත්වූ වත්මන් ආණ්ඩුව ඒ ප්‍රශස්ති ම ගායනා නොකළ යුතුයි. ආණ්ඩුව පාර්ශ්වයෙන් ඔවුන් ත්‍රස්තවාදීන් වුණාට ජනතාව පාර්ශ්වයෙන් ඔවුන් අරගලකරුවන්. පලස්තීනයේ සිට ශ්‍රී ලංකාව දක්වා ම අරගල සිදුවූ රටවල තත්ත්වය මෙයට සමානයි.

අපගේ ආණ්ඩු කාලවලත් දේශපාලන සිරකරුවන් ත්‍රස්තවාදීන් යැයි හැඳින්වූ අය සිටියා. 1989දී ජනතා විමුක්ති පෙරමුණේ අරගලකරුවන්වත් එවක ආණ්ඩු ත්‍රස්තවාදීන් ලෙස හැඳින්වූවා. නමුත් ජනතා විමුක්ති පෙරමුණ තමන්ගේ සටන්කාමීන්ව හැඳින්වූයේ අරගලකරුවන් වශයෙන්. එබැවින් පැරැණි ප්‍රශස්ති පසෙක තබා දෙමළ දේශපාලන සිරකරුවන්ව වත්මන් ආණ්ඩුව නිදහස් කළ යුතුයි.”

‘නව රජයේ වැඩපිළිවෙල සමග පොලීසියේ කාර්යභාරය’ යන තේමාව යටතේ ඊයේ (17) රජයේ ප්‍රවෘත්ති දෙපාර්තමේන්තුවේ පැවැත් වූ විශේෂ මාධ්‍ය හමවේදී වැඩබලන පොලිස්පති ප්‍රියන්ත වීරසූරිය මහතා පවසා සිටියේ මෑතකදී සිදුකළ සමීක්ෂණයක් අනුව පොලිස් නිළධාරීන්ගෙන් 40% ඔවුන් ස්ථිර පදිංචි ප්‍රදේශයේ පොලිස් ස්ථානයන්හි සේවයේ නියතුව සිටිනා බවයි.

එමෙන්ම ගමේ නිළධාරියා ගමේ පොලිසියේ නොසිටිය යුතු බවට අමාත්‍යංශ ලේඛම්වරයා සහ තමා දැඩි ස්ථාවරයක සිටින බවත් ඒ අනුව ඉදිරියේදී එම මාරුවීම් සිදුකිරීමට බලපොරොත්තු වන බවත් ඔහු පැවසීය.

පොලීසියේ ඉහළ නිළධාරීන්ගේ සිට පහලම නිළධාරියා දක්වා දේශපාලන කරනයට ලක්ව ඇති බව නොරහසක් බවත් නිළධාරීන්ගේ කාර්‍යසාධනය ගණනය කිරීම තුලින් එම සංස්කෘතිය අවසන් කිරීමට බලාපොරොත්තු වන බවත් ඔහු වැඩිදුරටත් පැවසීය.