Attention (Sinhala)

පෞද්ගලික අංශය මාස් කන්නයේ වී මිලදී ගැනීම ආරම්භ කර ඇති අතර තෙත වී කිලෝවක් රුපියල් 122 කටත්, වියළි වී කිලෝවක් රුපියල් 140 කටත් මිලදී ගැනීමට මහා පරිමාණ වී මෝල් හිමියන් පියවර ගෙන ඇති බව වාර්තා වේ.

අහස් වැස්සෙන් සහ ඔක්තෝබර් මාසයේ මැද සිට මහවැලි ජලයෙන් කළ වගාවල වී අස්වැන්න නෙළීම දැන් ආරම්භ වී තිබෙන අතර පසුගිය සතියේ සිට අස්වැන්න වෙළෙඳපොළට ලැබෙමින් පවතියි.

රජයේ සහතික මිල මෙතෙක් ප්‍රකාශයට පත් කිරීමට අපොහොසත්වී සිටින බව පැවැසූ ගොවි නියෝජිතයෝ වෙළෙඳුන් මාස් කන්නයේ වී අස්වැන්න කුණු කොල්ලෙට මිලදී ගැනීමෙන් පසුව සහතික මිළ ප්‍රකාශයට පත් කරන්නේ දැයි කෘෂිකර්ම ඇමැතිවරයාගෙන් විමසයි.

මාස් කන්නයේ වී වගාව සඳහා පිරිවැයට සාපේක්ෂව වී කිලෝවක සහතික මිල නියම කළ යුතු බව පෙන්වා දෙන ගොවියෝ වී කිලෝවක් සදහා අවම වශයෙන් රුපියල් 130ක මිලක් ලැබිය යුතු බව අවධාරණය කරයි.

කොළඹ මල් පාරේ පිහිටි දේශපාලන කාර්යාලයට පැමිණි කඩු වෙල ආසනයේ සජබ පළාත් පාලන නියෝජිතයෝ පිරිසක් අමතමින් හිටපු ජනාධිපති රනිල් වික‍්‍රමසිංහ මහතා පැවසූවේ පක්ෂ නායකත්වයන් ගැන නොසිතා සජබ එජාප සියලු දෙනා එක්ව වැඩ කර ජයග්‍රහණය ලබාගත යුතු බවයි.

එජාප නායක හිටපු ජනාධිපති රනිල් වික්‍රමසිංහ මහතා එහිදී වැඩිදුරටත් අදහස් දක්වමින් පැවසූයේ මෙම පක්ෂ දෙකේ එකතුව රටට හොඳ අවස්ථාවක් බවයි.

එහිදී රනිල් වික්‍රමසිංහ මහතා සිහිපත් කළේ එවකට 1991 වසරේ දෝශාභියෝගයෙන් එක්සත් ජාතික පක්ෂය දෙකට කැඩීමට ගිය අවස්ථාවේ ප්‍රේමදාස ජනාධිපතිතුමා ආරක්ෂා කර ගනිමින් ඉදිරියට යාමේ වගකීම තමා බාර ගත් බවයි.

එම අවස්ථාව සඳහා එජාප නියෝජ්‍ය නායක රුවන් විජයවර්ධන, මහලේකම් තලතා අතුකෝරළ ජාතික සංවිධායක සාගල රත්නායක, හිටපු පාර්ලිමේන්තු මන්ත්‍රී රාජිත සේනාරත්න මහත්වරුද සජබ පළාත් පාලන ආයතන නියෝජිතයෝද සහභාගී වී සිටියහ.

එමෙන්ම තලතා අතුකෝරළ මහත්මියගේ සහෝදරයාත් තමාට එදා උදව් කළ අතර දැන් තලතා අතුකෝරළ මහත්මිය සියලු පාර්ශ්ව වලට කතා කොට පක්ෂ එකතු කිරීමේ වගකීම බාරගෙන තිබෙන බවද හිටපු ජනාධිපතිවරයා පැව්සීය.

මීළඟට පවත්වන මහ මැතිවරණයේදී පාර්ලිමේන්තුවේ බලය ලබා ගැනීමට විපක්ෂයේ දේශපාලන පක්ෂ ඒකාබද්ධ කිරීමට තරුණ මන්ත්‍රීවරු පිරිසක් පියවර ගනිමින් සිටින බව වාර්තා වේ.

දැනටමත් හිටපු ජනාධිපති රනිල් වික්‍රමසිංහ හා විපක්ෂ නායක සජිත් ප්‍රේමදාස එක් කිරීමට එම දෙපාර්ශ්වයේම පිරිසක් සූදානමින් සිටින බවත් විපක්ෂයේ සියලු පක්ෂ ඒකරාශී කිරීමටද මෙම තරුණ දේශපාලකයන් පිරිස පියවර ගනිමින් සිටින බවද වාර්තා වේ.

මෙම වැඩපිළිවෙළ ක්‍රියාත්මක කිරීම සදහා පාර්ලිමේන්තුව නියෝජනය නොකරන ජ්‍යෙෂ්ඨ දේශපාලනඥයන් පිරිසක් මූලික වී සිටින අතර ජනාධිපතිවරණයට සහ මහ මැතිවරණයට පෙර පැවැති නොහොඳ නෝක්කාඩු අමතක කර ඉදිරි දේශපාලන කටයුතු සැලසුම් කිරීමට මෙම තරුණ මන්ත්‍රී පිරිස සාකච්ඡා පවත්වමින් සිටින බවද දැන ගන්නට ඇත.

මාලිමා රජයෙන් බලාපොරොත්තු ඉටුකරගත නොහැකි තත්ත්වයක් පැවැතීම හා මීළඟ මහ මැතිවරණයේදීත් මාලිමාව ජයග්‍රහණය කළහොත් දැනට විපක්ෂයේ සිටින බහුතරයකට දේශපාලනයෙන් සමුගැනීමේ තර්ජනයක් ඇති විය හැකි බවත් මෙම පිරිසගේ අදහස වී ඇති බවද වාර්තා වේ.