Attention (Sinhala)

පසුගියදා තරුණ සේවා සභාවේ සභාපති සහ අධ්‍යක්ෂ ජනරාල් තනතුරුවලින් ඉල්ලා අස්වූ චින්තක හේවාපතිරණ මහතා සිය ෆේස්බුක් ගිණුමේ සටහනක් තබමින් සිය ඉල්ලා අස්වීම සම්බන්ධයෙන් කරුණු හෙළිකර තිබේ.

පක්ෂයේ ඉල්ලීමකට අනුව එම තීරණය ගත් බව ඔහු පවසයි.

එම සම්පූර්ණ සටහන පහතින් දැක්වේ.

සහෝදරයා සහෝදරිය,

මීට මාස හතරකට පෙර ජාතික ජන බලවේගය විසින් මා හට පවරන ලද වගකීමක් අනුව මා ජාතික තරුණ සේවා සභාවේ සභාපති අධ්‍යක්ෂක ජෙනරාල් ලෙස පත්වූ අතර එකී කාලය තුළ මා මට පුළුවන් උපරිමයෙන් එකී කටයුතු සිදු කරන ලද අතර 2025 01 මස 31 දින මා මාගේ සේවයෙන් ඉල්ලා අස්වීමට තීරණය කළෙමි. මා මෙම වගකීම් භාරගත්තේ ද පසුව එකී වගකීමෙන් ඉවත් වන්නේ ද පක්ෂයේ ඉල්ලීමකට අනුව බවත් මින් ඉදිරියටත් පක්ෂය විසින් මාතර දිස්ත්‍රික්කයේ නව දේශපාලන වගකීමක් මේ වනවිටත් මා වෙත පවරා ඇති බවත් එකී වගකීමද මට හැකි උපරිමයෙන් ඉටු කිරීමට මේ වන විට මා සූදානම් වන බවත් කියා සිටිමි.

2025/01/31 වන දින සිටමේ දක්වා සමාජ මාධ්‍ය තුළ විවිධ ආකාරයේ අදහස් ප්‍රචාරණය වී තිබූ අතර එකී සියලු ප්‍රචාරයන්ට මා කියා සිටින්නේ මා දේශපාලනය ආරම්භ කළ කොළඹ විශ්ව විද්‍යාල නීති පීඨයේ දේශපාලනයේ සිට මේ මොහොත දක්වා උත්සාහ කරන්නේ මේ මව් පොළව වෙත යම් සාධනීය මෙහෙවරක් සිදු කිරීමටයි. එතෙක් මෙතෙක් ඒ කාල පරාසය තුළ මගේ හෘද සාක්ෂියට එකඟව කටයුතු කොට ඇති අතර සමාජ සාධාරණත්වය වෙනුවෙන් සටන් කොට ඇත. දේශපාලනයෙන් මා උපයාගත් අබ ඇටයක තරම්වත් ආර්ථික වත්කමක් නොමැත. ඉදිරියටත් ජාතික ජන බලවේගයේ පොදු යහපත් අරමුණ යථාර්ථයක් කරන්නට මාතර දිස්ත්‍රික්කයේ මාගේ සහෝදරත්වය සමග උපරිම වගකීමෙන් කටයුතු කරන බවත් මාතරින් තාවකාලිකව මා මාස හතරකට පෙර නතර කළ ගමන ඊයේ නැවත වැලිගමින් ආරම්භ කළ බවත්ය.

එබැවින් මා හට පැවරී ඇති සමාජ වගකීමෙන් මා කිසිදු විටෙකත් දුරස් නොවෙමි. මිනිසුන් අතර කේලාම් වාසි බස් කියා ගැටුම් ඇති නොකරන්නෙමි. මගේ ගමන යන්න පොදු හැඟීම් සමග සෙල්ලම් නොකරන්නෙමි. යමෙක් පහත් ක්‍රම හරහා පහත් සතුටක් ලබයිද එය තාවකාලික තිරිසන් පහත් සතුටකි. එහෙත් පටු නපුරු චේතනාවන්ගෙන් ඔබ කියන කරන සියල්ලක්ම මේ වාතලයේ යම් තැනක සටහන් වන බව අමතක නොකරන්න. දවසක හොඳ හෝ නරක ලෙස ඔබ පසුපස එන්නේ ඒ කළ කී දේ බව මතක තියාගන්න. අපේ මව් පොළොවේ පුරවැසියන් උදෙසා යහපත් මව් පොළොවක්, සමාජයක් නිර්මාණය කරන්න මා මගේ වපසරිය තුළ මට කළ හැකි සියල්ලක්ම උපරිමයෙන් කරමි.

ස්තුතියි, ජය !

~ Chinthaka D Hewapathirana

හැටන් තොණ්ඩමන් වෘත්තීය පුහුණු මධ්‍යස්ථානයේ පැවති උත්සවයකට සහභාගි වීමෙන් අනතුරුව මාධ්‍යට අදහස් දක්වමින් අමාත්‍ය සමන්ත විද්‍යාරත්න මහතා පැවසූවේ වී මිල දී ගැනීම සඳහා සහතික මිලක් නියම් කරමින් (03) දින කැබිනට් පත්‍රිකාව නිකුත්වීමට නියමිත බවයි.

මෙවර කන්නයේ වී අස්වැන්න නෙලීමෙන් අනතුරුව රටේ ජනතාවට ගැටළුවකින් තොරව පාලන මිලට සහල් මිල දී ගත හැකි බවද අමාත්‍යවරයා කියා සිටියේය.

පළාත් පාලන මැතිවරණය සම්බන්ධයෙන්ද අදහස් දැක්වූ හෙතෙම කියා සිටියේ නීතිමය ගැටළු කිහිපයක් ඇති බවත්, එම ගැටළු නිරාකරණය කර කඩිනමින් පළාත් පාලන මැතිවරණය පැවත්වීමට කටයුතු කරනා බවත් ය.

ජනාධිපතිවරණයේදී සහ මහ මැතිවරණයේදී ජාතික ජන බලවේගය ජයගත් සේම පළාත් පාලන මැතිවරණයේදී ජාතික ජන බලවේගයෙ බහුතර පළාත් පාලන ආයතන බලය ලබා ගන්නා බවත් ඔහු වැඩිදුරටත් පැවසීය.

මේ වනවිට අභියාචනාධිකරණ සභාපති විනිසුරු බන්දුල කරුණාරත්න මහතා විශ්‍රාම පූර්ව නිවාඩු ලබා ගෙන ඇති අතර, එය ජනාධිපති අනුර කුමාර දිසානායක මහතා විසින් ඊට අනුමැතිය ලබාදී ඇත.

ඒ අනුව වැඩබලන අභියාචනාධිකරණ සභාපති ලෙස විනිසුරු මොහොමඩ් ලෆාර් තාහිර් මහතා ජනාධිපති අනුර කුමාර දිසානායක මහතා ඉදිරියේ ජනාධිපති ලේකම් කාර්යාලයේදී දිවුරුම් දීම අද (02) සිදුවිය.

මොහොමඩ් ලෆාර් තාහිර් මහතා මෙම අධිකරණයේ දැනට සිටින ජ්‍යෙෂ්ඨතම විනිසුරුවරයාද වන අතර ආණ්ඩුක්‍රම ව්‍යවස්ථානුකූලව නව අභියාචනාධිකරණ සභාපති විනිසුරුවරයෙකු පත් කරන තෙක් මෙම පත්වීම වලංගු වේ.

ජනපති අනුර කුමාර දිසානායක මහතා පසුගියදා පැවති ජන හමුවක් අමතමින් රටට බරක්ව ඇති රාජ්‍ය ආයතන සම්බන්ධයෙන් අනාවරණයක් සිදුකළ අතර එහිදී ඔහු පැවසූවේ “Sorry සමහර රාජ්‍ය ආයතන සම්බන්ධයෙන් තීන්දු තීරණ ගන්න සිද්ධවෙනවා” යනුවෙනි.

එම ප්‍රකාශය තහවුරු කරමින් ව්‍යවසාය සංවර්ධන අමාත්‍යංශ ලේකම් තිලකා ජයසුන්දර මහත්මිය ඊයේ (01) පැවසූවේ ඇතැම් රාජ්‍ය ආයතන ප්‍රතිව්‍යුහගත කිරීම සම්බන්ධයෙන් මේ වනවිටත් තීරණය කර ඇති බවයි.

ඒ සඳහා පත්කර ඇති කමිටුව මගින් ප්‍රතිව්‍යුහගතකරණය සඳහා රාජ්‍ය ආයතන 113ක් හඳුනාගෙන ඇති බව ද ලේකම්වරිය වැඩිදුරටත් පැවසීය.

වර්තමාන ඇමැතිවරයාට සහ නියෝජ්‍ය ඇමතිවරයාට සිය හිතවතුන් අධ්‍යක්ෂ මණ්ඩල සඳහා පත්කර ගැනීම සඳහා එම ආයතන පවත්වා ගෙන යෑමේ අවශ්‍යතාවක් නොමැති බව අවධාරණය කළ ලේකම්වරිය තව සති දෙකක් ඇතුළත ඊට අදාළ වාර්තාව ජනාධිපතිතුමාට සහ ඇමතිවරයාට යොමු කරන බව පැවසීය.

කොළඹදී පැවති කර්මාන්ත අමාත්‍යංශය යටතේ ඇති ආයතනවල නිලධාරීන්ගේ හමුවක් අමතමින් ඇය මේ බව පැවසීය.

ඊයේ (01) මහා බාගේ පොලිසිය විසින් සංවිධානාත්මක අපරාධකරුවකු වන රන්කැටියා නමැත්තාගේ ප්‍රධාන ගෝලයෙක්, හිටපු යුද හමුදා සෙබළෙක් ඇතුළු සිව් දෙනෙක් අත්අඩංගුවට ගෙන තිබේ.

මෙලෙස අත්අඩංගුවට ගෙන ඇත්තේ රාගම ප්‍රදේශයේ පදිංචි අවුරුදු 29 ත් 39 ත් අතර වයස්වල පසුවන සිව් දෙනෙකි.

ඇලපිටිවල, මඟුල් පොකුණ, හොරපේ යන ප්‍රදේශවල සිදුකළ වැටලීමකින් මෙම පිරිස අත්අඩංගුවට ගෙන ඇත.

සැකකරුවන් සන්තකයේ තිබී යුද හමුදා ක්‍රීඩා ටී ෂර්ට් එකක්, කැමා ටී ෂර්ට් 2 ක්, යුද හමුදා නිල ඇඳුම් දෙකක්, ඉණ පටියක්, පුවස් එකක්, ව්‍යාජ පිස්තෝලයක්, අඟල් 32 ක ඇත්දල යුගලක්, පොලිස් ක්‍රීඩා ටී ෂර්ට් තුනක්, පොලිස් ගමන් කථනයක්, අයිස් මත්ද්‍රව්‍ය ග්‍රෑම් 10ක් සහ මිළිග්‍රෑම් 700ක් පොලිසිය අත්අඩංගුවට ගෙන ඇත.