Foreign news (Sinhala)

රික්ටර් මාපකයේ 7.6ක ප්‍රබල භූකම්පනයක් කැරිබියන් දූපත්වල හටගෙන ඇති අතර එනිසා රටවල් කිහිපයකට සුනාමි අනතුරු ඇඟවීමක් නිකුත් කර ඇති බව විදෙස් මාධ්‍ය වාර්තා කරයි.

ඒ අනුව කොලොම්බියාව, කේමන් දූපත්, පුවර්ටෝ රිකෝ, වර්ජින් දූපත්, කොස්ටාරිකාව, හොන්ඩුරාස්, නිකරගුවාව සහ කියුබාව යන වෙරළ තීරයන් ඇතුළු කලාප සදහා සුනාමි අනතුරු ඇඟවීම් නිකුත් කර ඇත.

ඇලස්කා ප්‍රාන්තයේ උනලක්ලීට් සිට නෝම් නගරය බලා පියාසර කළ කුඩා ගුවන් යානයක් මගීන් 9 දෙනෙකු සහ ගුවන් නියමුවකු ඇතුළු 10 දෙනෙකු සමග අතුරුදන් වී ඇති බව ඇලස්කාවේ මහජන ආරක්ෂාව පිළිබඳ දෙපාර්තමේන්තුව සදහන් කරයි.

සෙස්නා කැරවාන් යානය උනාලක්ලීට් සිට නෝම් දක්වා පියාසර කරමින් සිටියදී කිලෝමීටර් 19ක් ඈතින් මුහුදේදී අවසන්වරට රේඩාර් තිරයේ දිස්වූ බව ඇලස්කා කලාපය සදහා වූ එක්සත් ජනපද වෙරළාරක්ෂක බලකාය සදහන් කරයි.

ඇලස්කාවේ බටහිර වෙරළ තීරයේ බෙරිං මුහුදේ ඇතුල්වීමක් වන නෝර්ටන් සවුන්ඩ් හරහා නගර දෙක එකිනෙකට සැතපුම් 146ක් පමණ දුරින් පිහිටා ඇති බවද විදෙස් මාධ්‍ය වාර්තා කරයි.

එක්සත් ජනපද වෙරළාරක්ෂක බලකාය සහ එක්සත් ජනපද ගුවන් හමුදාව අතුරුදන් වූ පුද්ගලයින් 10 දෙනෙකු රැගත් කුඩා ගුවන් යානය සොයා ඇලස්කාවේ මුහුදු තීරයේ සෙවීම් සිදු කරමින් ඇති බව විදෙස් මාධ්‍ය වාර්තා කරයි.

අතුරුදන් වූ ගුවන් යානය ප්‍රාන්ත අතර ක්‍රියාත්මක වන බෙයාරින්ග් එයාර් ගුවන් සේවයට අයත් එකක් බව ඇලස්කාවේ මහජන ආරක්ෂාව පිළිබඳ දෙපාර්තමේන්තුව සදහන් කරයි.

බ්‍රසීලයේ සාඕ පවුලෝ නගරය අසලදී කුඩා ගුවන් යානයක් කඩාවැටී බස් රථයක ගැටීමෙන් දෙදෙනෙකු මියගොස් හය දෙනෙකු තුවාල ලබා ඇති බව විදෙස් මාධ්‍ය වාර්තා කරයි.

එම කිං එයාර් එෆ් 90 ගුවන් යානය කැම්පෝ ඩි මාර්ට් ගුවන්තොටුපළෙන් ගුවන් ගත වී මිනිත්තු පහක් ඇතුළත හදිසි ගොඩබෑමක් කිරීමට උත්සාහ කිරීමේදී මෙම අනතුර සිදුව ඇත.

එරට බලධාරීන් තවමත් යානයේ සිටි පුද්ගලයින් සංඛ්‍යාව හෙළිකර නොමැති නමුත් එෆ් 90 ගුවන් යානයට මගීන් අට දෙනෙකු දක්වා ගමන් කළ හැකි බව විදෙස් මාධ්‍ය වාර්තා කරයි.

මෙම අනතුර සිදුවන අවස්ථාවේදී බස් රථයේ මගීන් සිට නොමැති අතර එම අනතුරෙන් තුවාල ලැබූවන් හෝ තුවාල ලැබූ නිලධාරීන් තවමත් තහවුරු කර නොමැත.

ධවල මන්දිරය තුළ ප්‍රධාන වෙනස්කම් තුනක් සිදු කිරීමට අමෙරිකානු ජනාධිපති ඩොනල්ඩ් ට්‍රම්ප් තීරණය කර ඇති බව විදෙස් මාධ්‍ය වාර්තා කරයි.

ඒ අනුව පෙර පැවැතියාට වඩා අති නවීන පහසුකම් සහිතව, නවතම ක්‍රමවේදයකට අනුව ජනාධිපතිවරයාගේ නාන කාමරය වෙනස් කර ඇත.

එහෙත් ජනාධිපතිවරයකුට ඒ සදහා ඩොලර් ලක්ෂයකට වඩා වැය කළ නොහැකි අතර එනිසා ජනාධිපති ඩොනල්ඩ් ට්‍රම්ප් සිය පෞද්ගලික ධනයද මේ සදහා යොදවා ඇත.

තවද වොෂින්ටනයේ ධවල මන්දිරයේ පසුපස ප්‍රදේශයේ තිබෙන ට්‍රම්ප්ගේ නිල කාර්යාලයේ මේසය මත “Coke button” එකක් ද සවිකර ඇති අතර එයට හේතුව ට්‍රම්ප් නිතර සීනි රහිත පාන වර්ග ගෙන්නාගෙන බීමට හුරු වී ඇති නිසාය.

එමෙන්ම ධවල මන්දිරයේ ආහාර සැපයීමට නවතම ආහාර වට්ටෝරුවක් ලබාදී ඇති අතර එයට හේතුව ජනපති ඩොනල්ඩ් ට්‍රම්ප් විවිධ ක්ෂණික ආහාර වර්ග වලට ප්‍රියතාවයක් දැක්වීමයි.

ජර්මනියේ හිටපු ජනාධිපති හෝස්ට් කොහෙලර් කෙටි රෝගාබාධයක් හේතුවෙන් මියගිය බවත් ඔහු මියයන විට 81 හැවිරිදි වියේ පසුවු බවද විදෙස් මාධ්‍ය වාර්තා කරයි.

පුහුණුවෙන් ආර්ථික විද්‍යාඥයකු වූ හෝස්ට් කොහෙලර් පසුගිය 2004 වසරේ සිට 2010 වසර දක්වා ජර්මනියේ ජනාධිපතිවරයා ලෙස කටයුතු කළේය.

ජනාධිපති වීමට පෙර හෝස්ට් කොහෙලර් වොෂින්ටනයේ ජාත්‍යන්තර මූල්‍ය අරමුදලේ ප්‍රධානියා වු අතර පසුව ඔහු ජර්මනියේ ජනාධිපතිවරයා බවට පත් විය.

2010 වසරේ මැයි මාසයේදී විදේශගත ජර්මානු හමුදා මෙහෙයුම් පිළිබඳ ප්‍රකාශයන් විවේචනය කිරීමෙන් පසුව හෝස්ට් කොහෙලර් සිය ධුරයෙන් ඉල්ලා අස්විය.