Local news (Sinhala)

ජනාධිපති අනුර කුමාර දිසානායක මහනුවරදී පැවැත්වීමට නියමිත විශේෂ දළදා ප්‍රදර්ශනය සම්බන්ධයෙන් වැඩිදුර අනුශාසනා ලබාගැනීමට අද (02) දින මල්වතු අස්ගිරි මහානාහිමිවරුන් බැහැදැකීමට නියමිත බව වාර්තා වේ.

මෙම සාකච්ඡාවේදී දළදා සමිඳුන් ප්‍රදර්ශනය කෙරෙන වේලාව, මහනුවරට පැමිණෙන ලක්ෂ සංඛ්‍යාත ජනතාවට සපයන පහසුකම්, විශේෂ ආරක්ෂක වැඩපිළිවෙළ, ප්‍රවාහන සේවා ඇතුළු පහසුකම් සම්බන්ධයෙන්ද සාකච්ඡා කිරීමට නියමිත බවද වාර්තා වේ.

මෙම විශේෂ සාකච්ඡාව සදහා දළදා මාලිගාවේ දියවඩන නිලමේ ප්‍රදීප් නිලංග දෑලද සහභාගි වීමට නියමිත බවද වාර්තා වේ.

එළැඹෙන අප්‍රේල් මාසයේ සිට හෙද හෙදියන් සදහා වැටුප් වැඩිවීම් සිදුවන අතර එහිදි සියලුම ශ්‍රේණිවල හෙද හෙදියන් සදහා දැනෙන වැටුප් වැඩිකිරීමක් සිදුකිරීමට රජය පියවර ගෙන ඇති බව සෞඛ්‍ය අමාත්‍ය වෛද්‍ය නලින්ද ජයතිස්ස පාර්ලිමේන්තුවේදී සදහන් කරයි.

අමාත්‍ය නලින්ද ජයතිස්ස සදහන් කළේ,

“හෙද සේවයේ තුන්වැනි ශ්‍රේණියේ 8200ක් පමණ සේවය කරනවා. ඒ අයට මූලික වැටුප තිබුණේ රුපියල් 32,525ක් පමණයි. අපේ මූලික වැටුප් වැඩිවීම ඇතුළේ රුපියල් 54,920 දක්වා වැටුප් වැඩි කරලා තියෙනවා. ඒ අනුව මූලික වැටුප විතරක් 22,395ක් වැඩිවෙලා.

ඒ අයගේ OT එක පැයකට රුපියල් 215ක තිබුණ දීමනාව රුපියල් 290 දක්වා පැයකට රුපියල් 75කින් වැඩිවෙනවා. දෛනික දීමනාව රුපියල් 1,084 තිබුණ එක 1,831 දක්වා වැඩිවෙනවා. මම මේ කියන්නේ පළමු පත්වීම ලබලා අවුරුදු 05ක් වැඩ කරන අයටයි. ඒ අයට දළ වැටුප විදියට 10,4081 අප්‍රේල් මාසේ ඉඳලා 133,640ක් අවම වශයෙන් ලැබෙනවා.

දෙවන ශ්‍රේණියේ හෙද හෙදියන් 9,400ක් ඉන්නවා. පත්වීම ලැබිලා අවුරුදු 05කට පස්සේ දෙවන ශ්‍රේණියට ඇතුළත් වෙනවා. ඒ අයට මූලික වැටුප තිබුණේ රුපියල් 37,636යි. ඒක වැඩි කරලා තියෙනවා රුපියල් 64,500 දක්වා. ඒ කියන්නේ රුපියල් 26,864කින් මූලික වැටුප පමණක් වැඩිකරලා තියෙනවා.

මෙතෙක් පැයකට රුපියල් 255ක තිබුණ OT එක රුපියල් 345 දක්වා රුපියල් 90කින් වැඩි කරනවා. දෛනික දීමනා රුපියල් 1881ක දීමනාව රුපියල් 2150 දක්වා වැඩිකරනවා. එතකොට ඒ අයගේ දළ වැටුප සැලකිය යුතු ප්‍රමාණයක් වැඩිවෙනවා.

පළමු ශ්‍රේණියේ 16,000ක් සේවය කරනවා. සේවයට ඇතුළත් වෙලා අවුරුදු 12කට පස්සේ පළමු ශ්‍රේණියට ඇතුළත් වෙන්න පුළුවන්. ඒ අයගේ දැන් තියෙන මූලික වැටුප තමයි රුපියල් 44,965යි. මේ මූලික වැටුප රුපියල් 77,850 දක්වා වැඩිවෙනවා.

ඒ 32,885ක් මූලික වැටුප වැඩිවෙනවා. දැන් OT පැයක් තියෙන්නේ රුපියල් 305යි ඒක රුපියල් 420 දක්වා වැඩිවෙනවා. OT පැයක් රුපියල් 115කින් වැඩිවෙනවා. රුපියල් 2248ක් තියෙන දෛනික දීමනාව රුපියල් 2595 දක්වා වැඩිවෙනවා.

අධි ශ්‍රේණියේ හෙද හෙදියන් 6,000ක් ඉන්නවා. මේ අයට සේවට බැඳිලා අවුරුදු 22ක් ගියාම තමයි උසස්වීම ලැබෙන්නේ. දැන් රුපියල් 53,035ක තියෙන මූලික වැටුප රුපියල් 92,460 වෙනකන් වැඩිවෙනවා. මූලික වැටුප 39,425කින් වැඩිවෙනවා රුපියල් 350ට තියෙන OT පැය රුපියල් 500ක් වෙනවා.

රුපියල් 2,651ක් තියෙන දෛනික දීමනාව රුපියල් 3,082 දක්වා වැඩිවෙනවා. ඒ වගේම විශේෂ ශ්‍රේණියේ හෙද හෙදියන් 415ක් පමණ දැන් ලංකාවේ ඉන්නේ. සේවා කාලය අවුරුදු 27ක් වගේ වුණාම උසස්වීම ලැබෙනවා. දැන් ලැබෙන්නේ රුපියල් 54,235යි. මේ මූලික වැටුප රුපියල් 94,060 වෙනකන් වැඩිවෙනවා. වැඩිවීම විතරක් රුපියල් 40,000කට ආසන්නයි.

ඒ අයට OT පැය රුපියල් 395 තියෙන මුදල රුපියල් 545 දක්වා වැඩිවෙනවා. දෛනික දීමනාව රුපියල් 2,711 රුපියල් 3,135 වෙනකන් වැඩි වෙනවා. අප්‍රේල් මාසයේදී මේ හෙද හෙදියන් 40,000ට ඒ අයගේ සේවා කාලයට මේ මුලික වැටුප් වැඩිවීම OT වැඩිවීම, දෛනික දීමනාව වැඩිවීම, ඒ වගේම වාර්ශික වැටුප් වර්ධකය මේ සියල්ල එකතු වුනාට පස්සේ අප්‍රේල් මාසයේදී අතට දැනෙන වැටුපක් ලැබෙනවා අනිවාර්යයෙන්ම.”

ගැමුණු හේවා බළකායේ නන්පේරියල් කඳවුරේ ස්ථානගත ආපදා සහන සේවා භට පිරිස් විසින් හිරිකටු ඔයේ ජල මට්ටම හදිසියේ ඉහළ යාම හේතුවෙන් සිරවී සිටි පුද්ගලයින් 35ක් සාර්ථකව මුදාගෙන ඇත.

දේශීය සංචාරකයින් 75 දෙනෙකුගෙන් යුත් කණ්ඩායමක් කොලොන්නාව ප්‍රදේශයේ සිට නන්පේරියල් ප්‍රදේශයේ සංචාරයක නිරත වී ඇති අතර එහිදී මෙම හදිසි සිද්ධියට මුහුණ දී ඇත.

හමුදා භට පිරිස්වල කඩිනම් ප්‍රතිචාර දැක්වීමේ ප්‍රතිඵල මත හිරිකටු ඔයේ ජල මට්ටම තවදුරටත් ඉහළ යාමට පෙර සිවිල් වැසියන් ආරක්ෂිතව මුදා ගැනීමට හැකි වූ බව යුද හමුදාව සදහන් කරයි.

රජයේ වියදම් කපා හැරීම සහ මූල්‍ය වගවීම ප්‍රවර්ධනය කිරීම අරමුණු කර ගනිමින් ජනාධිපති කාර්යාලය සතු සුඛෝපභෝගී වාහන 14ක්, භාවිතයෙන් ඉවත් කරන ලද වාහන 6ක් සහ වාහන අමතර කොටස් අලෙවි කිරීමට අදාළ වෙන්දේසිය ආරම්භ කර ඇත.

ඒ අනුව වොල්වෝ ජීප් රථයක්, ඩිෆෙන්ඩර් ජීප් රථ 09ක්, ක්‍රයිස්ලර් මෝටර් රථයක්, මහේන්ද්‍රා බෝලෙරෝ රථයක්, රෝසා බස් රථයක්, ඩිස්කවරි රථයක් සහ ටොයෝටා මෝටර් රථයක් ඇතුළු වාහන 15ක් (28) දින වෙන්දේසි වී තිබු අතර ඉතිරි වාහනවලට අදාළ වෙන්දේසිය නුදුරේදීම පැවැත්වීමට නියමිතය.

එම වාහන ජනාධිපති ලේකම් කාර්යාලයේ නිත්‍ය කාර්ය මණ්ඩල වෙත ලබාදී තිබූ වාහන නොවන අතර හිටපු ජනාධිපතිවරයා විසින් සිය ධූර කාලයේදී ආණ්ඩුක්‍රම ව්‍යවස්ථාවේ 41 (1) වගන්තිය යටතේ පත් කරන ලද උපදේශකවරුන් සහ කාර්ය මණ්ඩලය විසින් භාවිතා කළ වාහන වේ.

පොලිස්පති දේශබන්දු තෙන්නකෝන් අත්අඩංගුවට ගැනීම සදහා මාතර මහේස්ත්‍රාත් අධිකරණයෙන් ලබාදුන් නියෝගයකට අනුව අපරාධ පරීක්ෂණ දෙපාර්තමේන්තුව විසින් පෙරේදා (27) විමර්ශණ ආරම්භ කළේය.

ඒ අනුව, කොළඹ ඇතුලු ඔහු රැදී සිටි බවට තොරතුරු වාර්තා වූ නිවාස 05ක් මේවන විට පරික්ෂාවට ලක් කෙරුණු අතර එම නිවාස කිසිවක ඔහු නොමැති බව වාර්තා වේ.

වැලිගම – පැලෑන ප්‍රදේශයේ හෝටලයක් ඉදිරිපිට සිදුවූ වෙඩි තැබීමට අදාළව හිටපු පොලිස්පති දේශබන්දු තෙන්නකෝන් ඇතුලු‍ 08 දෙනෙකු අත්අඩංගුවට ගෙන අධිකරණයට ඉදිරිපත් කරන ලෙස මාතර මහේස්ත්‍රාත් අධිකරණය නියෝග කළේය.

මේ සම්බන්ධයෙන් 6314 / 323 නඩු අංකය යටතේ මාතර මහේස්ත්‍රාත් අධිකරණයේ නඩුවක් ගොනු කර පවතින අතර, එහිදී මනුෂ්‍ය ඝාතනයක් සදහා කුමන්ත්‍රණය කිරීම චෝදනා යටතේයි මෙම නියෝගය නිකුත් කර තිබෙනවා.

2023 වසරේ දෙසැම්බර් 31 වනදා අපරාධ පරීක්ෂණ දෙපාර්තමේන්තුව භාරයේ පසුවන නදුන් චින්තක හෙවත් හරක් කටාගේ මත්ද්‍රව්‍ය ජාවාරමට සම්බන්ධ බවට කියන පිරිසක් අත්අඩංගුවට ගැනීමට ගිය අවස්ථාවේදී මෙම වෙඩි තැබීම සිදුව තිබුණි.

2025 පෙබරවාරි (27) වන දින පාර්ලිමේන්තුවේදී සභානායක, අමාත්‍ය බිමල් රත්නායක විසින් කරන ලද ප්‍රකාශය සම්බන්ධව හිටපු කථානායක මහින්ද යාපා අබේවර්ධන නිවේදනයක් නිකුත් කර ඇත.

මේ අතර පසුගියදා සභානායක, අමාත්‍ය බිමල් රත්නායක පාර්ලිමේන්තුවේදී සදහන් කළේ, හිටපු කථානායකවරයාගේ නිල නිවසේ කාර්ය මණ්ඩලය ලෙස 70ක පිරිසක් යොදවා තිබී ඇති බවත් ඔහු 2024 වසරේ ජනවාරි (01) වනදා සිට සැප්තැම්බර් (24) දක්වා මාස 9ක කාලයක් ධුරය දැරූ සමයේ වාහන 9ක් සදහා රුපියල් මිලියන 33ක ඉන්ධන භාවිතා කර ඇති බවයි.