Local news (Sinhala)

දුම්රිය ගමන්වාර 15කට ආසන්න සංඛ්‍යාවක් දුම්රිය රියදුරු හිඟය හේතුවෙන් අද (26) දින පෙරවරුවේ අවලංගු කර ඇති බව වාර්තා වේ.

රියදුරන් ලෙඩ නිවාඩු දැමීම හේතුවෙන් ධාවනය කිරීමට නියමිතව තිබූ ගමන්වාර අවලංගු කිරීමට කටයුතු කර ඇත.

යුධ හමුදාපති ලුතිනන් ජෙනරාල් ලසන්ත රෙද්‍රිගෝගේ උපදෙස් මත දිවයිනේ සෑම යුධ හමුදා කදවුරකම රණවිරු සුබසාධන අංශයක් අද (26) සිට ආරම්භ වන බව යුධ හමුදා මූලස්ථානය පවසයි.

ඒ අනුව අද සිට සෑම හමුදා කදවුරකම අණදෙන නිලධාරියාගේ අධීක්ෂණය යටතේ මෙම රණවිරු සුබසාධන අංශය ක්‍රියාත්මක කිරීමට නියමිතයි.

යුධ හමුදා මූලස්ථානය සඳහන් කළේ මෙමගින් විශ්‍රාමික, ආබාධිත සහ මිය ගිය හමුදා රණවිරුවන්ගේ පවුල්වල සාමාජිකයින්ට සුබසාධන කටයුතු පහසුවෙන් සිදු කළ හැකි බවයි.

කොළඹ නගර සීමාවේ මැතිවරණයට තමාව දායක කරගත්තේ නැති බවත් කොළඹ නගර සභාව හදන එකට තමාව දායක කරගෙන නැති බවත් තමාට වගකීම් පවරලා නැති බවද සමගි ජන ⁣බලවේග පාර්ලිමේන්තු මන්ත්‍රී එස්. එම් මරික්කාර් සඳහන් කරයි.

මන්ත්‍රී එස්.එම් මරික්කාර් මේ සම්බන්ධයෙන් සඳහන් කළේ,

“මම කොළඹ දිස්ත්‍රික්කයේ මන්ත්‍රීවරයෙක්. හැබැයි ඉතින් මේ මැතිවරණ ව්‍යාපාරයේදී මම පෞද්ගලිකව සමහර ඉල්ලපු, මට උදව් කරපු අපේක්ෂකයින්ට උදව් කරපු නම්, පක්ෂය විසින් කොළඹ නගර සභාව සීමාවේ මැතිවරණයට මාව දායක කරගත්තේ නෑ.

ඒ වගේම මේ නගර සභාව හදන එකටත් මාව දායක කරගෙන නෑ. ඒක ගිහින් මුජබර් රහුමාන් මන්ත්‍රී තුමාගෙන් අහන්න. එතුමා තමයි කරන්නේ මේක.

මට වගකීම් පවරලත් නෑ. මට වගකීම් දුන්නෙත් නෑ. මම සියයට 50ක් කොළඹින් ඡන්ද ගත්තට මාව සම්බන්ධ වෙලා නෑ. 117න් 29ක් හම්බුණේ ඒකනේ. හරිද..

මම මේ පක්ෂයේ නිර්මාණය කරපු මුල් 15 දෙනා අතර එක්කනෙක්. ඒ වගේම සජිත් ප්‍රේමදාස මැතිතුමා එක්ක මම බස් එකේ ඉස්සරහ සීට් එකේ තමා වාඩිවුණේ. මම පුටි බෝඩ් එකේ එල්ලිලා ආවේ නෑ හරිද. ඒ වගේම මේ පක්ෂයේ නියෝජ්‍ය ජාතික සංවිධායක මම. ඒ වගේම මේ පක්ෂයේ කලමණාකරන කමිටුවේ සාමාජිකයෙක් මම. හැබැයි මම දන්නේ නෑ.”

2023 අංක 03 දරණ මැතිවරණ වියදම් නියාමනය කිරීමේ පනත යටතේ අපේක්ෂකයින් මැතිවරණ ප්‍රචාරණ ආදායම් හා වියදම් වාර්තා වෙන වෙනම ඉදිරිපත් කළ යුතු බව මැතිවරණ කොමිසම සඳහන් කරයි.

ඒ අනුව පළාත් පාලන ජන්ද විමසීමට අදාළ මැතිවරණ ප්‍රචාරණ ආදායම් වියදම් වාර්තා භාරදීම සඳහා ලබාදුන් කාලය හෙටින් අවසන් වන බව මැතිවරණ කොමිසම සඳහන් කරයි.

ඒ සම්බන්ධයෙන් සියලු දේශපාලන පක්ෂ ලේකම්වරුන්ට, අපේක්ෂකයින්ට හා ස්වාධීන කණ්ඩායම්වලට දැනුම්දී ඇති බවත් දිස්ත්‍රික් තේරීම් භාර නිලධාරීන්ට, එම වාර්තා ලබාදිය යුතු බව මැතිවරණ කොමිසම සඳහන් කරයි.

ජාතික ලොතරැයි මණ්ඩලයේ හිටපු අධ්‍යක්ෂ තුසිත හල්ලොලුවගේ වාහනයට පහරදීම සහ වෙඩි තැබීම සම්බන්ධයෙන් කාන්තාවක් ඇතුළු සැකකරුවන් තිදෙනෙකු අත්අඩංගුවට ගෙන ඇත.

කොළඹ අපරාධ කොට්ඨාශය විසින් ඊයේ (24) දින මහරගමදී මෙම සැකකරුවන් අත්අඩංගුවට ගෙන ඇති අතර අනතුරුව එම සැකකරුවන් අලුත්කඩේ මහෙස්ත්‍රාත් අධිකරණයට ඉදිරිපත් කිරීමෙන් පසුව මැයි (29) දක්වා රක්ෂිත බන්ධනාගාර ගත කිරීමට නියෝග කර ඇත.

පරිපූරක වෛද්‍ය සේවා ඒකාබද්ධ බල මණ්ඩලය විසින් සිය සේවාව තුල නිර්මාණය වී ඇති ගැටලු සඳහා රජය විසින් විසඳුම් ලබානොදිම හේතුවෙන් වෘත්තිය ක්‍රියාමාර්ග වෙත එළඹීමට තීරණය කර ඇත.

ඒ අනුව හෙට (26) දිනය තුළ විසදුම් ලබා නොදෙන්නේ නම් අනිද්දා (27) දින උදෑසන 08.00ට වෘත්තිය ක්‍රියාමාර්ග ආරම්භ කරන බව පරිපූරක වෛද්‍ය සේවා ඒකාබද්ධ බල මණ්ඩලය සඳහන් කරයි.

පැනනැගී ඇති ගැටලු විසඳා ගැනීමට සෞඛ්‍යය අමාත්‍ය වෛද්‍ය නලින්ද ජයතිස්ස සමග අවස්ථා කිහිපයකදි සාකච්ඡා සිදු කළද ඒ සියල්ල අසාර්ථක වු බව පරිපූරක වෛද්‍ය සේවා ඒකාබද්ධ බල මණ්ඩලය සඳහන් කරයි.