Local news (Sinhala)

මෙරට ඉන්ධන බෙදුම්කරුවන් විසින් අයථා ලෙස ලබා ගන්නා 3%ක වට්ටම් මුදල අහෝසි කර ඒ වෙනුවට වෙනත් සමීකරණයක් ඉදිරිපත් කිරීමට පසුගිය 28දා රජය විසින් තීරණය කිරීමෙන් අනතුරුව ඉන්ධන බෙදුම්කරුවන්ගේ සංගමය විසින් ජනතාව අපහසුතාවට පත්කරමින් ඉන්ධන බෙදාහැරීමෙන් ඉවත්වීමේ තීරණයකට එළඹුනි.

ආරම්භයේදී දැඩි ස්ථාවරයක් ගත් එම ක්‍රියාමාර්ගය හමුවේ ආණ්ඩුව තම ස්ථාවරය නොවෙනස්ව පවත්වා ගත් අතර පසුව එම වර්ජනය අත්හැර දැමීමට එම සංගමය අද (3) පස්වරුවේ තීරණය කරනු ලැබුවා.

මෙලෙස ඉන්ධන බෙදුම්කරුවන් විසින් ලබා ගන්නා 3%ක වට්ටම් මුදල අයුතු ලාභයක් බවත් එය නීති විරෝධී අයකර ගැනීමක් බවත් ජාතික විගණන කාර්යාලය විසින් පෙන්වා දුන් අතර එය අධිකරණය මගින්ද තහවුරු කර තිබෙනවා.

මේ හේතුවෙන් රටේ ජනතාවගේ බදු මුදල් රුපියල් බිලියන 35ට අධික ප්‍රමාණයක් බෙදුම්කරුවන් 1000කටත් වඩා අඩු සංඛ්‍යාවක් අතරේ වාර්ෂිකව බෙදී ගොස් තිබුණා.

කෙසේවෙතත් මෙම තීරණයත් සමඟ රජය විසින් වැයකළ එකී අමතර පිරිවැයේ වාසිය ජනතාව වෙත ලබාදීම කෙරෙහි රජය පාර්ශ්වයෙන් සාකච්ඡාවට ලක්ව ඇති බව වාර්තාවේ.

ඒ අනුව මාර්තු මස අවසාන තෙල් මිල සංශෝධනයේදී තෙල් මිල යම් ප්‍රමාණයකින් පහත හෙලීමේ සැලැස්මක් පවතින බව වාර්තාවේ.

අද (03) පාර්ලිමේන්තුවේදී විදේශ කටයුතු නියෝජ්‍ය අමාත්‍ය අරුණ් හේමචන්ද්‍රා මහතා විසින් දේශපාලන සබඳතා මත ලබා දුන් බව කියන ඉන්ධන පිරවුම්හල් බලපත්‍ර ලාභීන් පිරිසකගේ නම් ලැයිස්තුවක් ඉදිරිපත් කළේය.

එම ලැයිස්තුවේ වත්මන් සහ හිටපු විපක්ෂ මන්ත්‍රීවරුන්ගේ දේශපාලන සම්බන්ධය ලේඛණයක්ද ඉදිරිපත් කළ නියෝජ්‍ය අමාත්‍යවරයා පවසා සිටියේ දිවයිනේ සෑම පළාතම ආවරණය වන පරිදි පෙට්‍රල් ෂෙඩ් ලබා දී තිබෙන බවයි.

මේ වනවිට ඇතිව තිබෙනා ඉන්ධන ගැටලුව සම්බන්ධයෙන් විපක්ෂය කුලප්පු වීම සාධාරණ බවද වැඩිදුරටත් අදහස් දක්වමින් නියෝජ්‍ය අමාත්‍යවරයා සඳහන් කළේය.

“මේ ලේඛණය පටන් ගන්නේ හයිටෙක් කාබන් ප්‍රයිවට් ලිමිටඩ් ආයතනය මේ ආයතනය එක්ක තියෙන දේශපාලන සබඳතාව බැලුවම හිටපු ජනපතිනිය චන්ද්‍රිකා බණ්ඩාරනායක කුමාරතුංග මහත්මියට පවතිනවා.

ප්‍රසන්න රණතුංග, වර්ණන් ගුණරත්න, කුමාර වෙල්ගම, හර්ෂණ රාජකරුණා, මහින්ද රාජපක්ෂගේ PSO ගේ නම ,පියසේන ගමගේ මහතාගේ පුතුන්ගේ නමට තියනවා.

ගාමිණි සෙනරත් මහතාගේ සහෝදරවරු, ගයන්ත කරුණාතිලකගේ සහෝදරයෙක් ගේ නමටත් තියනවා.

අකිල විරාජ්,පවිත්‍රා වන්නිආරච්චි, නිලානි ධර්මදාස නමින් ෂෙඩ් එකක් තියෙනවා.

මේ සම්බන්ධය රංජිත් මද්දුම බණඩාරට සම්බන්ධයක් තියනවා කියලා මේ ලේඛණයේ තියනවා.

අද විපක්ෂය කුලප්පු වෙන එක ඉතාම සාධාරණයි. තමන්ගේම බිස්නස්වලට මොකක් හරි ආකාරයෙන් ප්‍රශන්න ගැටලුවක් මතුවෙනකොට යම්කිසි ආකාරයෙන් කුලප්පුවෙන එක සාධාරණයි. අපි කිසිසේත්ම ආණ්ඩුවක් ලෙස මේ සම්බන්ධයෙන් සැලෙන්නේ නැහැ.

අපිට තියන සම්මුතිය ජනතාවත් එක්ක තියන සම්මුතිය. ඒක ඉතාම හොද ආකාරයෙන් කටයුතු කරගෙන යනවා”

නියෝජ්‍ය අමාත්‍යවරයා අනාවරණය කළ ලෙස වත්මන් දේශපාලකයින්ට හා ඔවුන්ගේ සමිපතමයින්ට අයත් පෙට්‍රල් ෂෙඩ් ගණන 40කට අධිකයි.

ඒ අනුව,

බස්නාහිර පළාත

හිටපු ජනාධිපතිනිය චන්ද්‍රිකා බණ්ඩාරණායක කුමාරතුංග මහත්මිය, ප්‍රසන්න රණතුංග මහතා , කුමාර වෙල්ගම මහතා, හර්ෂණ රාජකරුණා මහතා, කඩුවෙල හිටපු නගරාධිපතිවරයෙකු වන වර්ණන් ගුණරත්න මහතා, හිටපු සහ වත්මන් පාර්ලිමේන්තු මැති ඇමතිවරුන්ට හෝ ඔවුන්ගේ සමිපතමයින්ට අයත්.

දකුණු පළාත

හිටපු ජනපති මහින්ද රාජපක්ෂ මහතාගේ පුද්ගලික ආරක්ෂක නිළධාරීවරයා, හිටපු ඇමති පියසේන ගමගේ ගේ පුතුන්, හිටපු ජනාධිපති ලේකම් ගාමිණි සෙනරත් ගේ සහෝදරයා හම්බන්තොට ප්‍රෙද්ශිය සභාවේ හිටපු සභාපතිවරයෙක්, ගයන්ත කරුණාතිලක ගේ සහෝදරයා, හිටපු දකුණු පළාත් මහ ඇමති එච් ඊ සිරිසේන

නියෝජ්‍ය අමාත්‍යවරයා හෙළිකර ලැයිස්තුවේ නැගෙනහිර පළාත තුළ මෙවනි දේශපාලන සබඳතා මත පෙට්‍රල් ෂෙඩ් 04ක් ක්‍රියාත්මක වන බව සඳහන්.

උතුරු පළාත

චාර්ල් නිර්මලනාදන් හිටපු මන්ත්‍රී, කදර්මස්ථාන් මන්ත්‍රීවරයා ගේ සහොදරයින් ඇතුලු දේශපාලන සබඳතා ඇති සිව්දෙනෙකුටයි.

උතුරු මැද පළාත

හිටපු ඇමති දුමින්ද දිසානායක මහතාගේ සහෝදරයා, කිංස් නෙල්සන් මන්ත්‍රිවරයාගේ සහෝදරයා, හිටපු මන්ත්‍රි ලාල් ධර්මප්‍රිය මහතාගේ සහෝදරයා, චන්දිම ගමගේ මහතාගේ බිරිඳ මෙම ලැයිස්තුවට අයත්.

වයඔ පළාත

හිටපු ඇමති ඉන්දික බණ්ඩාරනායක මහතාගේ සහෝදරයෙක් හා මව, හිටපු ඇමති අකිල විරාජ් කාරියවසම් මහතා 

හිටපු පළාත් සභා මන්ත්‍රි ඩී.සී.යූ.ඉලේපෙරුමගේ මහතා හවුල් කාරිත්වය දරන පෙට්‍රල් ෂෙඩ් එකක් මධ්‍යම පළාතේ ක්‍රියාත්මකයි.

ඌව පළාතේ පෙට්‍රල් හිමිකරු ලැයිස්තුවේ රංජිත් මද්දුමබණ්ඩාර මහතාගේ සබඳතාවයද අනාවරණය කර තිබෙනවා.

සබරගමු පළාත

හිටපු ඇමති පවිත්‍රා වන්නිආරච්චිගේ සහෝදරිය ට සබරගමු පළාතේ පෙට්‍රල් ෂෙඩ් දෙකක් හිමි බව සඳහන්.

තෙල් බෙදුම්කරුවන්ගේ සංගමයේ උප සභාපති කුසුම් සඳනායක මහතා සිය සංගමයේ සියලුම සාමාජිකයින්ට දැනුම්දීමක් කරමින් පවසන්නේ කඩිනමින් ඛනිජ තෙල් ඇනවුම් ලබා ගැනීමට කටයුතු කරනා ලෙසයි.

අද (03) පැවැති මාධ්‍ය හමුවකට එක්වෙමින් ඔහු පැවසුවේ ඉදිරියේදී රජයත් සමග සාකච්ඡා කර පවතින ගැටලුවට විසඳුම් සෙවීමට අපේක්ෂා කරන බවයි.

එමෙන්ම හෙට (04) දිනයේදී ඛනිජ තෙල් සංස්ථාවේ සභාපතිවරයා සමග සාකච්ඡාවක් පැවැත්වෙන බවත් එම සාකච්ඡාවෙන් අනතුරුව මේ පිළිබඳව සිය සංගමයේ සාමාජිකයින් දැනුවත් කිරීමට කටයුතු කරන බවද ඔහු පැවසීය.

එහිදි වැඩිදුරටත් අදහස් දැක්වූ කුසුම් සඳනායක.

“අපි දැනුම්දෙනවා සියලුම බෙදුම්කරුවන්ට නැවත යථා පරිදි ව්‍යාපාරය කරගෙන යන්න කියලා.

මොකද අපිට තේරුණා අපි ගත්ත තීරණය අනුව රටේ මහජනතාවට හානියක් වෙනවා කියලා.

අපිට කවුරුවත් කවුරුත් සාකච්ඡාවක් නොදීම තුළින් තමයි මේක මේතරම් දුරදිග ගියේ. දැන් ඒගොල්ලොත් තීරණය අරන් තියෙනවා මේක ඒකපාර්ශවීය කරන්න බෑ මේ අයත් එක්ක සාකච්ඡා කරලා තමයි කරන්න ඕනේ කියන එක.

ඒ නිසා අපි ගරු කරනවා ඛනිජ තෙල් සංස්ථාවේ සභාපතිතුමාටත් එතුමා අපෙන් ඉල්ලීමක් කරලා තියෙනවා හෙට උදේ 09ට ඇවිල්ලා රැස්වීමට සහභාගී වෙන්න කියලා.

ඒ නිසා මම ඉල්ලීමක් කරනවා සියලුම බෙදුම්කරුවන්ට හැකි ඉක්මනින්ම පෙර පරිදිම ව්‍යාපාරයට එන්න ඇවිත් ඒ බෙදුම්කටයුතු පෙර පරිදිම කරගෙන යන්න කියලා”