Local news (Sinhala)

වැඩ තහනමකට ලක්ව සිටින පොලිස්පති දේශබන්දු තෙන්නකෝන් පාර්ලිමේන්තු පරීක්ෂණ කමිටුව හමුවේ දෙවන වරට අද පෙනී සිටීමට නියමිතයි. 

මොහු පළමු වරට මෙම පරීක්ෂණ කමිටුව හමුවේ පෙනී සිටියේ පසුගිය 19 වනදායි. 

දේශබන්දු තෙන්නකෝන් විසින් කර ඇතැයි කියන විෂමාචාර සහ සිය ධූරයේ බලතල බරපතල අන්දමින් අනිසි ලෙස යොදා ගැනීම සම්බන්ධයෙන් විමර්ශනය කර වාර්තා කිරීමට සදහා පසුගියදා මෙම කමිටුව පත් කෙරෙනු ලැබුවා. 

එහි සභාපතිවරයා ලෙස ශ්‍රේෂ්ඨාධිකරණ විනිසුරු ප්‍රීති පද්මන් සූරසේන කටයුතු කරන අතර, විනිසුරු ඩබ්ලිව්.එම්.එන්.පී. ඉද්දවල සහ ජාතික පොලිස් කොමිෂන් සභාවේ සභාපති ඊ.ඩබ්ලිව්.එම්. ලලිත් ඒකනායක එහි සෙසු සාමාජිකයින්.

දුම්රිය රියදුරන් හදිසියේම ලෙස නිවාඩු දමා සේවයට වාර්තා නොකිරීම හේතුවෙන් පසුගිය දිනවල දුමිරිය ගමන්වාර රැසක් අවලංගු කිරීමට පියවර ගත් අතර ඒ හේතුවෙන් මගීන් දැඩි ලෙස අසරණ විය.

පසුගිය 2023 වසරේ සැලසුම් කළ දුම්රිය වාර සංඛ්‍යාව එක්ලක්ෂ විසි දෙදාහස් හාරසිය විසි හයක් (122,426) බවත් එම දුම්රිය ගමන් වාර වලින් නියමිත වෙලාවට ධාවනය වී ඇත්තේ ගමන් වාර දස දහස් පන්සිය තිස් එකක් (10,531) බව සඳහන් කරයි.

ඒ අනුව 70%ක් දුම්රිය ගමන් වාර නියමිත වෙලාවට ධාවනය කර නොමැති අතර ඒ හේතුවෙන් කිසිම විශ්වාසයක් තියන්න බැරි ප්‍රවාහන මාධ්‍යයක් වන දුම්රිය ධාවනය හේතුවෙන් ජනතාව දැඩි ලෙස අසරණ වී සිටියි.

දවසකට ලක්ෂ 3ක් විතර මගීන්ට දුම්රිය අවශ්‍ය වන බැවින් තවදුරටත් මගීන් බිල්ලට නොදී ජනතාවගේ ඡන්දයට ගරු කරමින් වත්මන් ආණ්ඩුව විසින් මෙම දුමිරිය ගැටලුවට කඩිනම් සෘජු තීරණ ගත යුතුයි.

මෙම හැම එකකටම හේතුව දුම්රිය රියදුරු හිඟය නම්, තවදුරටත් රටේ මගීන් අසරණ නොකර වත්මන් ආණ්ඩුව අලුත් රියදුරන් බදවාගෙන පුහුණු කර මෙම පහත් වර්ජන ක්‍රමය අවසන් කළ යුතුයි.

වෛද්‍ය රසායනාගාර වෘත්තිකයින් සහ භෞත චිකිත්සක වෘත්තිකයින් ආරම්භ කළ වැඩවර්ජනය හෙට (28) දින උදෑසන 8.00ට තාවකාලිකව අත්හිටුවන බව පරිපූරක වෛද්‍ය වෘත්තියවේදීන්ගේ ඒකාබද්ධ බල මණ්ඩලයේ සභාපති රවීකුමුදේශ් සඳහන් කරයි.

අද (27) දින රාත්‍රියේ පැවති විශේෂ සාකච්ඡාවකින් අනතුරුව මෙම තීරණයට එළඹි බව පරිපූරක වෛද්‍ය වෘත්තියවේදීන්ගේ ඒකාබද්ධ බල මණ්ඩලයේ සභාපති රවීකුමුදේශ් සඳහන් කරයි.

බස්නාහිර පළාත දකුණ අපරාධ කොට්ඨාසයේ නිලධාරීන් විසින් දෙහිවල, නැදිමාල ප්‍රදේශයේදී වෙළෙඳසැලක සිටි පුද්ගලයෙකු ඉලක්ක කර ඉකුත් (19) වෙඩි තබා ඝාතනය කිරීමට තැත්කිරීමේ සිද්ධියේ සැකකාර වෙඩික්කරු අත්අඩංගුවට ගෙන තිබේ. 

අද (27) පොලීසියට ලැබුනු තොරතුරක් මත සැකකරු අත්අඩංගුවට ගත් බවයි පොලිසිය පවසයි.

එහිදී වෙඩික්කරු සතුව තිබූ අයිස් මත්ද්‍රව්‍ය ග්‍රෑම් 10 මිලි ග්‍රෑම් 160ක්ද සොයාගැනීමට සමත්ව ඇත.

එමෙන්ම වෙඩිතැබීමේ සිද්ධියට ආධාර අනුබල දීම සම්බන්ධයෙන් තවත් සැකකරුවෙකු අයිස් මත්ද්‍රව්‍ය ග්‍රෑම් 10 මිලි ග්‍රෑම් 350ක්ද සමඟ අත්අඩංගුවට පත්ව තිබේ.

සැකකරුවන් අවුරුදු 38 හා 43 වයස්වල පසුවන දෙහිවල හා මිහින්තලය ප්‍රදේශවල පදිංචිකරුවන් බවයි සඳහන්. 

චීන සමාගමක් විසින් ලබාදුන් රුපියල් කෝටි 12කට අධික මුදලක් සාවද්‍ය පරිහරණය කළේ යැයි චෝදනා ලබා සිටින හිටපු නියෝජ්‍ය අමාත්‍ය සරණ ගුණවර්ධනට එරෙහිව ගොනුකර තිබෙන නඩුව අද (27) දින කොළඹ මහාධිකරණය හමුවේ යළි විභාගයට ගත්තේය.

රුපියල් දොළොස් කෝටී අනූ එක්දාස් පන්සීයක මුදලක් සුබසාධන කටයුතු වලට නොයොදා 2015 වසරේ ජනාධිපතිවරණයේ ප්‍රචාරණ කටයුතු සඳහා යෙදවීම තුළින් දණ්ඩ නීති සංග්‍රහයේ 389 වැනි වගන්ති යටතේ වරදක් සිදුකළේ යැයි චෝදනා කරමින් විත්තිකාර හිටපු නියෝජ්‍ය අමාත්‍ය සරණ ගුණවර්ධනට එරෙහිව නීතිපතිවරයා විසින් මෙම නඩුව ගොනුකර ඇත.

අත්තනගල්ල, කරස්නාගොඩ ප්‍රදේශයේ එම සමාගම විසින් ක්‍රියාත්මක කළ ජල ව්‍යාපෘතියක් හේතුවෙන් අවතැන් වූ පවුල් 35කගේ සුබසාධන කටයුතු වෙනුවෙන් ලබාදුන් එම මුදල සාවද්‍ය පරිහරණය කළේ යැයි චෝදනා ලබා සිටින සරණ ගුණවර්ධනට එරෙහි නඩුව කොළඹ මහාධිකරණ විනිසුරු මංජුල තිලකරත්න ඉදිරියේ කැඳවනු ලැබුවෙිය.

නඩුව කැඳවූ අවස්ථාවේදී පැමිණිල්ල වෙනුවෙන් ජාතික ජල සම්පාදන හා ජල ප්‍රවාහන මණ්ඩලයේ මිනුවන්ගොඩ ජල සම්පාදන යෝජනා ක්‍රමයේ ව්‍යාපෘති අධ්‍යක්ෂක ලෙස කටයුතු කළ කේ.ජී.වී ඇන්ටනි පෙරේරාගේ සාක්ෂි සටහන් කර ගැනීම සිදුවුණි. 

අනතුරුව වැඩිදුර සාක්ෂි විභාගය එළඹෙන අගෝස්තු මස (07) වනදා දක්වා කල් තැබීමට විනිසුරුවරයා තීරණය කළ අතර එදිනට නඩුවේ සාක්ෂිකරුවන් දෙදෙනෙකුට සාක්ෂි දීම සඳහා අධිකරණයේ පෙනී සිටින ලෙස දන්වා සිතාසි නිකුත් කරන ලෙසත් විනිසුරුවරයා නියෝග කළේය.

නැවත වරක් ලෝකය පුරා ව්‍යාප්ත වෙමින් පවතින නව කොවිඩ් වෛරසය පිළිබඳව මේ වන විට රජය අවධානය යොමු කර ඇතැයි කැබිනට් ප්‍රකාශක අමාත්‍ය නලින්ද ජයතිස්ස සඳහන් කරයි.

කොවිඩ් වෛරසය සම්බන්ධයෙන් අනතුරුදායක තත්ත්වයක් තවමත් මෙරට නොමැති නමුත් ගුවන්තොටුපොළ ආශ්‍රිතව ඒ සම්බන්ධව මේ වන විටත් එම කටයුතු සඳහා මැදිහත් වෙමින් පවතින බවද අමාත්‍යවරයා සඳහන් කරයි.

මේ වනවිට සිංගප්පූරුවෙත්, ඉන්දියාවෙත් යම් ප්‍රමාණයක් වාර්තා වෙලා තියෙන බවත් වෛරසය සම්බන්ධයෙන් රජය දැඩි අවධානයෙන් පසුවන බවද අද (27) දින කැබිනට් තීරණ දැනුම්දීමේ මාධ්‍ය හමුවට එක්වෙමින් අමාත්‍යවරයා සඳහන් කරයි.