Main news (Sinhala)

ඩිජිටල් ශ්‍රී ලංකා ව්‍යාපෘතිය යටතේ සිදුකෙරෙන ප්‍රමුඛ කාර්‍යක් වන ඩිජිට්ල් හැඳුනුම්පත ක්‍රියාත්මක කිරීම සඳහා අවශ්‍ය කටයුතු නොබෝදිනකින් ආරම්භ කරන බව ඩිජිටල් ආර්ථික කටයුතු අමාත්‍ය ජනාධිපති අනුර කුමාර දිසානායක මහතා පවසයි.

තඹුත්තේගම ප්‍රදේශයේ ඊයේ (26) පැවති සුහද හමුවකට එක්වෙමින් ජනාධිපතිවරයා මේ බව පැවසීය.

ඩිජිටල් හැඳුනුම්පත හරහා මුල්‍ය ආයතන සමග ගනුදෙනු කිරීමට මෙන්ම බදු ගෙවීමේ කටයුතු සඳහා එමඟින් පහසුකම් සැලසෙන බවත් දත්ත සොරකම් කිරීම සම්බන්ධයෙන් කිසිවෙකු බියවිය නොමැති බවත් එහිදී ජනපතිවරයා අවධාරනය කළේය.

ඩිජිටල් හැඳුනුම්පතට අවශ්‍ය තොරතුරු ඇතුලත් කිරීම සඳහා දිවයින පුරා මධ්‍යස්ථාන 2,300ක් ස්ථාපිත කිරීමට බලාපොරොත්තු වන බවත් එහිදී ජනාධිපතිවරයා වැඩිදුරටත් සඳහන් කළේය.

වෙළෙඳපොළේ පවතින බොහෝමයක් පැන්සල්වල දරුවන්ගේ සිරුරට අහිතකර රසායනික ද්‍රව්‍ය රැසක් අන්තර්ගත බවත් පැන්සල් මුඛයෙන් සැපීමෙන් දරුවන් දීර්ඝ කාලීන රෝග රැසකට ගොදුරු විය හැකි බවට වෛද්‍යවරුන් අනතුරු අඟවයි.

බොහෝමයක් ආනයනික විවිධ වර්ණවලින් වෙළෙඳපොළේ දක්නට ලැබෙන අතර පැන්සල්වල පවතින වර්ණගැන්වීම් හා ආකර්ශනීය බව නිසාම එවන් පැන්සල් මිලට ගැනීමට දරුවන් වැඩි කැමැත්තක් දක්වයි.

පැන්සල්වල මෙම ආකර්ශනීය බව ලබාගැනීමට ඒවාට රසදිය, ආසනික්, කැඩ්මියම් වැනි රසායනික ද්‍රව්‍ය සහ බැර ලෝහ විශාල ප්‍රමාණයක් ආලේප කිරීම සිදුවන අතර පැන්සලෙන් ලිවීමේදී, පැන්සල් උල් කිරීමේදී එම එම පැන්සල් මුඛයෙන් සැපීමේදී මෙම විෂ රසායන නොදැනුවත්වම ශරීර ගතවන බව වෛද්‍යවරු පවසයි.

පැන්සල් හා පාට පැන්සල් නිෂ්පාදනයට අන්තර්ජාතික ප්‍රමිතියක් ඇති අතර EN71 – 3 ප්‍රමිතියට සහතිකකර ඇති පැන්සල් බැර ලෝහ වර්ග 19කින් සිරුරට ආරක්ෂාව ලබාදෙන නමුත් වර්තමානයේ වෙළෙඳපොළේ පවතින බොහෝ පැන්සල් මෙම අන්තර්ජාතික ප්‍රමිතියට අනුකූල නොවන බව වාර්තා වෙයි.

ශ්‍රීලංකන් ගුවන් සමාගම රජය සතු සමාගමක් ලෙස ඉදිරියටත් පවත්වාගෙන යාමට අවශ්‍ය කටයුතු සිදුකරමින් පවතින බව ප්‍රවාහන, මහාමාර්ග, වරාය හා සිවිල් ගුවන්සේවා අමාත්‍ය බිමල් රත්නායක මහතා පවසයි.

ඔහු පවසන්නේ මසකට ඩොලර් ලක්ෂ 9 බැගින් ගෙවමින් වසර 03ක් පුරා නවතා දමා තිබෙනා ගුවන් යානා 3න් එකක් මේ වනවිට යළි පිළිසකර කර මෙහෙයුම් සඳහා සූදානම් කර ඇති බවයි.

එමෙන්ම තවත් එවැනි යානා 2ක් අප්‍රේල් මාසයට පෙර ගුවන්ගත කිරීමට බලාපොරොත්තු වන බවද අමාත්‍යවරයා පැවසීය.

වරාය හා සිවිල් ගුවන්සේවා අමාත්‍යංශයේ පැවති සාකච්ඡාවකින් අනතුරුව මාධ්‍ය වෙත අදහස් දක්වමින් බිමල් රත්නායක අමාත්‍යවරයා ඒ බව සඳහන් කළේය.

“ශ්‍රීලංකන් ගුවන් සමාගම වහලා, විකුණලා, විනාශ කරලා තිබුණේ.  ඒ වගේම මගේ දැනීමේ හැටියට ශ්‍රීලන්කන් ගුවන් සේවයට අයත් යානා තුනක් අවුරුදු 03ක් තිස්සේ ග්‍රවුන්ඩ් කරලා තිබුණා එන්ජිම නැතුව. අවුරුදු 03ක් තිස්සේ මාසයකට ඩොලර් ලක්ෂ 09 ගාණේ යානා බිම තියාගෙන ගෙව්වා රනිල් ලාගේ පසුගිය ආණ්ඩු. එහෙම තමයි ඒ අය හොඳටම කළේ.

ගනේගොඩ මහතා ඇතුළු අලුත් නායයෝ ඇවිල්ලා ඒ අය යම් ආකාරයකට මුදල් හොයාගෙන බිම තියෙන යානාවලින් එකක් දැනට ඔපරේට් වෙනවා.

තව දෙකක් ඒ අය අප්‍රේල්වලට කලින් ඔපරේට් කරන්න යනවා. ඉතින් ඒ නිසා ඒ අය ශ්‍රීලංකන් ගුවන් සමාගම විකුණන්නේ නැතිව ඉදිරියට යන්න සැලැස්මක ඉන්නේ.” 

එළඹෙන පෙබරවාරි 17 දින පාර්ලිමේන්තුවට ඉදිරිපත් කිරීමට නියමිත ජාතික ජනබලවේගය රජයේ මංගල අයවැය ලේඛනයෙන් සාමාන්‍ය ජනයාගේ ජීවන වියදමට සහනයක් සැලසීමට රජයේ අවධානය යොමුව ඇති බව වාර්තා වෙයි.

ඒ අනුව අත්‍යවශ්‍ය භාණ්ඩ කීපයක වැට් බදු ඉවත්කිරීමට නියමිත බව අරයේ ආරංචිමාර්ග පවසයි.

එම අත්‍යවශ්‍ය භාණ්ඩ කිහිපයක වැට් බදු ඉවත්කිරීමෙන් සහ ජීවන වියදම අඩු කිරීමට අදාළ තවත් අයවැය යෝජනා හරහා ජනතාවගේ මිලදී ගැනීමේ හැකියාව හැකියාව වර්ධනය වනු ඇතැයි ද ඒ හරහා ජනතාවගේ ජීවන බරට සහනක් වනු ඇතැයි ද රජය අපේක්ෂා කරයි.

එසේම රාජ්‍ය සේවකයන්ට වැටුප් වැඩිවීමක් ලබාදීම, උපයනවිට ගෙවීම් බද්දේ උපරිම සීමාවන් වෙනස් කිරීමට සහ එම බද්ද අයවන ආදායම් කාණ්ඩවල වෙනසක් සිදු කිරීම ද අයවැයෙන් සිදු කෙරෙනු ඇත.

ශ්‍රී ලංකාවේ මහත් ආන්දෝලනයට ලක්වූ අපරාධ පිළිබඳව පරීක්‍ෂණ පැවැත්වූ අදාළ ලිපිගොනු සියල්ලම ලහි ලහියේම යළි විමර්ශනවලට භාජනය කරන බව රහස් පොලිසියේ ජ්‍යෙෂ්ඨ නිලධාරියෙක් ‘දිවයින ඉරිදා සංග්‍රහය’ට පැවසූ බව එම පුවත්පත වාර්තා කර තිබේ.

බොරැල්ල කනත්තේදී අභිරහස් ලෙස මරුමුවට පත් දිනේෂ් ෂාෆ්ටර් මහතාගේ මරණය පිළිබඳව පැවැත්වූ පොලිස් විමර්ශන කටයුතු ආරම්භ වන බව එම නිලධාරියා පවසා ඇත.

පුවත්පත වැඩිදුරටත් පවසන්නේ මෙම ලිපිගොනු පිළිබඳව විමර්ශන කිරීම සඳහා රහස් පොලිස් නිලධාරීන් විශේෂ කණ්ඩායමක් යොදවා ඇති බවත් එම අපරාධය පිළිබඳව ළඟදීම වරින් වර සුලමුල අනාවරණය විය හැකි බවත් ය.

මෙරට පවතින සහල් ඒකාධිකාරිය බිඳ දැමීම සඳහා ඊට සමගාමීව රාජ්‍ය හස්තය ශක්තිමත් කිරීමේ වැදගත්කම ජනපතිවරයා අවධාරණය කළේය.

ඒ සඳහා රාජ්‍ය සතුව වී තොග පවත්වාගැනීම, සහල් නිෂ්පාදනය සහ වෙලඳපොල පිවිසුම ශක්තිමත් කිරීම සම්බන්ධයෙන් ආණ්ඩුවේ වැඩ පිළිවෙල මේ වනවිට ක්‍රියාත්මක වෙමින් පවතී.

හෝමාගම, පිටිපන ප්‍රදේශයේ පැවති සුහද හමුවකදී ජනපතිවරයා පැවසූවේ, මෙවර වී මිලදී ගැනීම වෙනුවෙන් රුපියල් කෝටි 500ක් රජය වෙන්කර ඇති බවයි.

එම මුදල වී මිලදී ගැනීම සඳහා රජයක් වෙන්කළ වැඩිම මුදල බවද ජනාධිපතිවරයා අවධාරණය කළේය.

“අපි දැනටමත් රුපියල් කෝටි 500ක් වෙන්කරලා තියෙන්නේ වී මිලදී ගන්න. මෑත කාලයේ ආණ්ඩුවක් වෙන් කරන ලද වැඩිම මුදල ඒක. අපේ ගබඩා සියල්ල ප්‍රතිසංස්කරණය කරනවා. අපේ ගබඩාවල තියෙනවා ලක්ෂ 03ක ධාරිතාවයක්, අපිට ලක්ෂ 03ම මිලදී ගන්න බැරි වෙයි.

හැබැයි අපි ඒ ගබඩා පුද්ගලික අංශයේ වී එකතු කරන අයට දෙන්න සැලසුම් කරනවා. එතකොට ඒ අය වී ගන්නවා අපේ ගබඩාවේ තැන්පත් කරනවා. අපි දන්නවා හාල් තියෙන ප්‍රමාණය. අපි පත්තරේ දැන්වීමක් දැම්මා ලංකාවේ සියලුම වී තොග රැස්කරන්නන්, හාල් මෝල් පවත්වාගෙන යන ව්‍යපාරිකයින් සියලුදෙනා ලියාපදිංචි වෙන්න ඕනේ ආණ්ඩුවේ.

ආණ්ඩුවේ ලියාදිංචි නොවන කිසිවෙකුට මීට පස්සේ වී තොග එක්රැස් කරන්න බැහැ. වී කොටන්නත් බැහැ. ලියාපදිංචි වෙන්න ඕනේ වගේම සතිපතා ආණ්ඩුවට වාර්තාවක් දෙන්න ඕනේ ඔයගොල්ලෝ කොච්චර වී තොග රැස්කරලා තියෙනවාද කියලා. මම දැක්ක මේ ළඟදි කෘෂිකර්ම අමාත්‍යාංශයේ නිලධාරියෙක් කෝප් එකට ගිහිල්ල කිව්වා හාල් මෙට්‍රික් ටොන් මිලියනයක් අතුරුදන් කියලා.

ඉතින් ඒවා කොහෙද තියෙන්නේ කියලා අපි දැනගන්න ඕනේ. ආණ්ඩුව සතු සියලු ගබඩාවල එකතුව මෙට්‍රික් ටොන් ලක්ෂ 03යි. පොළොන්නරුවේ ප්‍රධාන මෝල හිමියන්ගේ මෝල්වල එකතුවත් මෙට්‍රික් ටොන් ලක්ෂ 03යි. ඒ සියලුම ගබඩාවල වී ගොඩ ගැහුවත් තියෙන්නේ පුළුවන් මෙට්‍රික් ටොන් ලක්ෂ 06යි. ඉවට කියන්න සිදුවෙලා තියෙනවා.

රටක් තවදුරටත් ඉවට ගියපු කාලය ඉවරයි. ලෝකයක් තවදුරටත් ගමන්කරන්නේ ඉවට නෙමයි දත්තවලට හැබැයි අපි ළඟ ප්‍රධාන ආහාරය වන වී නිෂ්පාදනය කරන ප්‍රමාණය අපි දන්නේත් නෑ පරිභෝජනය කරන ප්‍රමාණය අපි දන්නේත් නැහැ. ඒ නිසා අපි ඉතා ඉක්මනින් ශක්තිමත් දත්ත පද්ධතියක් හදනවා. මට තව සති දෙකක් දෙන්න සහතික මිලට වඩා අඩුවෙන් හැර වැඩියෙන් එක හාල් ඇටයක් ලංකාවේ වෙළෙඳපොළේ නැහැ. සති දෙකක් දෙන්න.”