Main news (Sinhala)

ජනාධිපති අනුර කුමාර දිසානායක මහතා සියලුම මැති ඇමතිවරුන්ට උපදෙස් දී ඇත්තේ දුරකතන ඇමතුම්වලට හැකි සෑම අවස්ථාවකම ප්‍රතිචාර දක්වන ලෙසයි.

ආණ්ඩු පක්ෂ මන්ත්‍රී කණ්ඩායම් රැස්වීමේදී ජනාධිපතිවරයා මේ දැනුම් දීම කර ඇතැයි වාර්තාවේ.

ජනතාව සහ ඇතැම් මාධ්‍යවේදීන් තම දුරකතන ඇමතුම් වලට මැති ඇමතිවෞන් ප්‍රතිචාර නොදක්වන බවට චෝදනා එල්ල කර ඇති පසුබිමක ජනපතිවරයා මෙම දැනුම්දීම කර තිබේ.

ජනතාවගේ දුරකතන ඇමතුම් වලට සවන් දී ඔවුන්ගේ ප්‍රශ්න ගැටලු කඩිනමින් විසඳීමට අවශ්‍ය ක්‍රියාමාර්ග ගන්න ලෙසද ජනාධිපතිවරයා එහිදී වැඩිදුරටත් උපදෙස් ලබාදී තිබේ.

රජයේ ප්‍රවෘත්ති දෙපාර්තමේන්තුවේ අද (25) පැවති විශේෂ මාධ්‍ය හමුවකදී කැබිනට් ප්‍රකාශක අමාත්‍ය නලින්ද ජයතිස්ස මහතා පැවසූවේ යෝෂිත රාජපක්ෂ හිටපු ජනාධිපති මහින්ද රාජපක්ෂගේ පුත්‍රයා වීම නිසා පමණක් අත්අඩංගුවට නොගත් බවයි.

නීතිවිරෝධී ලෙස හෝ සැකසහිත ආකාරයෙන් ඉඩම් හෝ දේපළ මිලදී ගෙන තිබේ නම් නීතිය ක්‍රියාත්මක කරන බවත් අද සිදු වූ අත්අඩංගුවට ගැනීම පිටුපස දේශපාලන දඩයමක් නොමැති බව අමාත්‍යවරයා අවධාරණය කළේය.

ආරම්භ කර ඇති පරීක්ෂණ දිගටම පවතින බවත්, CID සහ පොලිසිය අධිකරණයට කරුණු ඉදිරිපත් කර ඒ අනුව අත්අඩංගුවට ගැනීම් සිදුකරන බවත් අමාත්‍යවරයා වැඩිදුරටත් පැවසීය.

“යමෙකු නීතිවිරෝධී ලෙස හෝ සැකසහිත ආකාරයෙන් ඉඩම් හෝ දේපළ මිලදීගෙන තිබේ නම් සහ එවැනි නඩු සම්බන්ධයෙන් CID පරීක්ෂණ පවත්වන්නේ නම්, නීතිය ක්‍රියාත්මක වෙනවා. යෝෂිත අත්අඩංගුවට ගනු ලැබුවේ ඔහු මහින්ද රාජපක්ෂගේ පුත්‍රයා නිසා නෙවෙයි.”

අත්අඩංගුවට ගත් සැකකරුවන්ට ඇප ලබා දීම පිළිබඳ ප්‍රශ්නයකට පිළිතුරු දෙමින් අමාත්‍යවරයා පැවසුවේ

“ඔවුන්ට ඇප ලැබෙනවා. නමුත්, නඩු කටයුතු දිගටම ක්‍රියාත්මක වෙනවා. නීතිය ක්‍රියාත්මක කිරීම අධිකරණයේ යුතුකම. රජය කරන්නේ එයට පහසුකම් සැලසීම පමණයි.”

අත්අඩංගුවට ගත් යෝෂිත රාජපක්ෂ මහතා එලැඹෙන 27 වැනිදා දක්වා රක්ෂිත බන්ධනාගාර ගත කර තිබේ.

අලුත්කඩේ අංක 5 අතිරේක මහෙස්ත්‍රාත් පවිත්‍රා සංජීවනි මහත්මියගේ නියෝගය මත ඔහු මෙලෙස බන්ධනාගාර ගත කර ඇත.

යෝෂිත රාජපක්ෂ මහතා අද (25) පෙරවරුවේ බෙලිඅත්ත ප්‍රදේශයේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබීය.

ඔහු මෙලෙස අත්අඩංගුවට ගනු ලැබූවේ රත්මලාන ප්‍රදේශයේ දෙපළක් සම්බන්ධයෙන් මුදල් විශුද්ධිකරණය යටතේ සිදුකරන විමර්ශනයකට අදාළවයි.

අද (25) පෙරවරුවේ අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් යෝෂිත රාජපක්ෂව මීට ටික වේලාවකට පෙර අපරාධ පරීක්ෂණ දෙපාර්තමේන්තුවට රැගෙනවිත් තිබේ.

ඔහු මුදල් විශුද්ධිකරණ පනත යටතේ අත්අඩංගුවට ගෙන ඇති අතර අද (25) අධිකරණයට ඉදිරිපත් කිරීමටද නියමිතය.

දක්ෂිණ අධිවේගී මාර්ගයේ බෙලිඅත්ත පිවිසුම අසලදී ඔහු අත්අඩංගුවට ගනු ලැබීය.

රත්මලාන, සිරිමල් පෙදෙසේ පිහිටි රුපියල් මිලියන 34ක් වටිනා නිවසක් හා ඉඩමක් මිලදී ගැනීමේ සිද්ධියට අදාළව යෝෂිත රාජපක්ෂව සැකකරුවකු ලෙස නම් කිරීමට තරම් ප්‍රමාණත් කරුණු ඇති බව පසුගිය 23වනදා නීතිපතිවරයා විසින් අපරාධ පරීක්ෂණ දෙපාර්තමේන්තුවට දැනුම්දී තිබුණි.

මේවන විට නඩු කරයක් පවතින අදාළ සිද්ධියයේ ප්‍රධාන සැකකාරිය වන්නේ යෝෂිත රජපක්ෂගේ මිත්තණියක්වන ඩේසි ෆොරස්ට් නම් කාන්තාවයි. 

පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි බුද්ධික මනතුංග මහතා පැවසූවේ, හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මහතා අපරාධ පරීක්ෂණ දෙපාර්තමේන්තුව විසින් අද (25) උදෑසන බෙලිඅත්ත ප්‍රදේශයේදී අත්අඩංගුවට ගත් බවයි.

2006 අංක 5 දරණ මුදල් විශුද්ධිකරණය වැළැක්වීමේ පනත යටතට වැටෙන වැරදි යෝෂිත රාජපක්ෂ විසින් සිදුකර ඇති බවට ප්‍රමාණවත් සාක්ෂි ඇති බවට නීතිපතිවරයා විසින් දන්වා සිටීමෙන් අනතුරුව මෙම අත්අඩංගුවට ගැනීම සිදුකර ඇත.

ඒ අනුව යෝෂිත රාජපක්ෂ සම්බන්ධයෙන් අපරාධ නඩු විධාන සංග්‍රහය පනත ප්‍රකාරව ඉදිරි කටයුතු සිදුකිරීම සඳහා මෙම අත්අඩංගුවට ගැනීම සිදුකළ බව පොලිස් මාධ්‍ය ප්‍රකාශකවරයා වැඩිදුරටත් පැවසීය.

කතරගම ප්‍රදේශයේ පිහිටි ඉඩමක හිමිකාරිත්වය සම්බන්ධයෙන් ප්‍රකාශයක් ලබාදීම සඳහා යෝෂිත රාජපක්ෂ මහතා පසුගිය ජනවාරි 3 වනදා ද අපරාධ පරීක්ෂණ දෙපාර්තමේන්තුව වෙත පැමිණ තිබුණි.

ජාතික ජන බලවේගය පාර්ලිමේන්තු මන්ත්‍රී අසිත නිරෝෂන් මහහා පවසන්නේ, හිටපු ජනාධිපති මහින්ද රාජපක්ෂ සහ ශිරන්ති රාජපක්ෂ මේ වනවිට රැඳී සිටින කොළඹ 07 විජේරාම මාවතේ පිහිටි නිල නිවස පිහිටි ඉඩමේ වර්තමාන වටිනාකම රුපියල් මිලියන 3,178ක් බවයි.

ඊයේ (24) රාත්‍රියේ දේශපාලන වැඩසටහනය එක්වෙමින් මන්ත්‍රීවරයා මෙම කරුණු අනාවරණය කළේය.

පාපන්දු පිටියකට වඩා විශාල එම නිල නිවස පිහිටි ඉඩම අක්කර එකයි පර්චස් 13.7ක් බවත් නිල නිවසේ වර්ග අඩි ප්‍රමාණය වර්ග අඩි 30,534ක් බවත් මන්ත්‍රීවරයා පැවසීය.

අදාළ නිල නිවසේ වර්තමාන වටිනාකම රුපියල් මිලියන 229ක් බවත් මන්ත්‍රීවරයා පැවසීය.

මෙම නිවස පිහිටි ඉඩම සහ නිවස තක්සේරු කිරීමකින් ඔසු රුපියල් ලක්ෂ 46ක මුදලකට කුලියකට ලබාදිය හැකි බවත් ඔහු සඳහන් කළේය.