Main news (Sinhala)

පෙබරවාරි මාසයේදී වාහන වෙළඳපළ යළි විවෘත කිරීමෙන් පසු වත්මන් වෙළඳපොලේ පවතින වාහන මිල සහ ආනයනික වාහන මිල අතර සැලකියයුතු පරතරයක් පවත්වාගැනීමට අදහස් කරන බව ජනාධිපති අනුර කුමාර දිසානායක මහතා ඊයේ සිරස සටන වැඩසටහනට එක්වෙමින් පැවසීය.

ඉන් අනතුරුව ක්‍රමිකව වෙළඳ වල හැසිරෙන ආකාරය නිරීක්ෂණය කරමින් බදු සංශෝධනය කිරීමට බලාපොරොත්තු වන බවද ඔහු සඳහන් කළේය.

එහි අරමුණ වනුයේ වසර ගනනාවකින් පසු විවරවන වාහන වෙළඳපොල හරහා පළමු මාසයේදීම ඩොලරය මත වැඩි තෙරපුමක් ඇති නොකිරීම බවද ඔහු පැවසීය.

එමෙන්ම මෙරට තුළ දැනට පවතින දෙවන පෙළ වාහන වෙළඳපළේ මිල විශාල ප්‍රමාණයකින් අඩු වුවහොත් එය බැංකු පද්ධතිය ඇතුළු මුල්‍ය ආයතන අර්බුදයකට පත්කරනු ඇති බවද ජනපතිවරයා පැවසීය.

ඉහත සියළු කරුණු සැළකිල්ලට භාජනය කරමින් ක්‍රමානුකූලව වාහන මිල ගණන් අඩු කිරීමට හැකි බව ජනපතිවරයා සිහිපත් කළේය.

අපරාධ පරීක්ෂණ දෙපාර්තමේන්තුව සතුව විවිධ අපරාධ සම්බන්ධයෙන් ලිපිගොනු 29,000ක් පවතින බවත් ඒවා අතුරින් මූල්‍ය අපරාධවලට සම්බන්ධ සියලු ගොනු මූල්‍ය අපරාධ කොට්ඨාසය වෙත භාර දී කඩිනම් විමර්ශන සිදු කරන බවත් මහජන ආරක්ෂක අමාත්‍ය ආනන්ද විජේපාල මහතා ඊයේ (21) පාර්ලිමේන්තුවේ දී ප්‍රකාශ කළේය.

එමෙන්ම මූල්‍ය අපරාධ කොට්ඨාසය ඉදිරි සති දෙකක කාලය තුළ යලි ආරම්භ කරන බවත් කාලයේ වැලි තලාවට යටවී තිබූ සියලු අපරාධ සම්බන්ධයෙන් විමර්ශන කඩිනමින් සිදුකරන බවත් ඇමැතිවරයා අවධාරණය ක්ළේය.

“අපි භාර ගත්තේ මොන වගේ පසුබිමක් යටතේ තිබුණු රටක් ද කියන එක අපි තේරුම් ගත යුතුයි. ඇති තරම් අපරාධවලින් මේ රට තෙත්වී තිබුණා. අපි භාරගත්ත රට අපි යථා තත්ත්වයට පත් කරමින් සිටිනවා. ඒ වගේම ක්ලීන් ශ්‍රී ලංකා යනු වත්මන් රජයේ ප්‍රධාන වැඩසටහනක්.

වැවක් පිරිසිදු කිරීම, මාර්ග අනතුරු අවම කර ගැනීම, කැළි කසළ පිරිසිදු කිරීම ආදියට පමණක් ලඝු කරමින් මෙම වැඩසටහන හෑල්ලුවට ලක්කළා.

ක්ලීන් ශ්‍රී ලංකා වැඩසටහන යනු ආර්ථික හා භෞතික සංවර්ධනයෙන් ඔබ්බට ගිහින් මහජනයාගේ ජන ජීවිත සුරක්ෂිත කිරීම සඳහා එක් පැත්තකින් සමාජීය හා පාරිසරික වශයෙනුත් නව වෙනස්කම් ඇති කරමින් ශ්‍රී ලාංකේය සමාජ ප්‍රමිතියක් සහිතව රට ගොඩගැනීම වෙනුවෙන් ආරම්භ කළ වැඩසටහනක්.”

මේ සඳහා සියලු අමාත්‍යාංශ, ආයතන, ප්‍රජා සංවිධාන, ව්‍යාපාරිකයින් රාජ්‍ය නොවන සංවිධාන, පොදු මහජනතාව ආදි වශයෙන් වූ සියලු දෙනාගේ සහභාගිත්වයෙන් සිදු කෙරෙන වැඩසටහනක්. පොහොසත් රටක්, ලස්සන ජීවිතයක් ලබාදීම වෙනුවෙන් සිදුකරන පුළුල් සමාජ පරිවර්තනයක් සහිත වැඩසටහනක්. සමස්ත සමාජ ක්‍රියාවලිය තුළම පරිවර්තනයක් ඇති කිරීම මෙහි අරමුණයි. මේ සඳහා වැඩපිළිවෙළක්, දැක්මක්, මාර්ග සිතියමක් ඇතිවයි ආරම්භ කළේ. මේ වැඩසටහනට දැක්මක් වැඩපිළිවෙළක් නැහැ කියලා කාටවත් කියන්න බැහැ.

මහජන ආරක්ෂක ඇමැතිවරයා ලෙස පිළිතුරු දිය යුතු කරුණු ගණනාවක් තිබෙනවා. අල්ලස දූෂණය, පාතාලය, මැරකම් ආදි බොහෝ දේවල් ගැන කතා කරනවා. කියන්න සතුටුයි මේ වෙනකොට පොලිසිය දේශපාලනීකරණයෙන් තොර ආයතනයක් බවට පත් කිරීම වෙනුවෙන් අපි කටයුතු කර තිබෙනවා. ඔවුන්ගේ හැකියාව, දැනුම ආදිය පදනම් කරගනිමින් අවස්ථාව ලබාදීමට අපි වැඩපිළිවෙළක් සකස් කර තිබෙනවා. මේ මාස දෙක තුන ඇතුළත අපි සුවිශේෂ කාර්ය භාරයක් ඉටුකර තිබුණා. එසේ තිබියදීත් නාමල් රාජපක්ෂ මහතා වැනි අය විවිධ මතවාද සමාජ ගතකිරීමට උත්සාහ කළා. මහජනයාගේ අනුමැතියෙන් තොරව කිසිවක් අපි සිදුකරන්නේ නැහැ. ජන සහභාගිත්වය ඇතිවයි අපි සියල්ල සිදු කරන්නේ. ඒ නිසා මේ වැඩසටහන ලඝු කරන්න එපා. සමස්ත වැඩපිළිවෙළ අගය කළ යුතුයි.

පොලීසිය ගත් යම් යම් ක්‍රියාමාර්ග නිසා මාර්ග අනතුරු යම් ප්‍රමාණයකින් අඩුවී තිබෙනවා. සමහර දවස්වල දිනකට හය හතක් මාර්ග අනතුරුවලින් මිය යනවා. ඒ වගේම මාර්ග අනතුරුවලින් මියයන පිරිස අඩුකර ගත යුතුයි. අපි අනුගමනය කළ විවිධ ක්‍රියාමාර්ග නිසා දිනකට මියයන ගණන දෙක තුනක් දක්වා අඩුකර ගැනීමට හැකිවී තිබෙනවා.

මේ රටේ ජනතාව හා ආයතන තම තමන්ට හැකි පමණින් මෙය අවබෝධ කර ගත යුතුයි. මේ රට අපරාධ දේශයක් බවටයි පත්ව තිබුණේ. අපරාධ මර්දනයට විශාල පිරිසක් සුවිශේෂි කාර්ය භාරයක් ඉටු කරනවා. නමුත් මේ අපරාධවලට සම්බන්ධ සුළු පිරිසක් නිසා ආරක්ෂක අංශවල කීර්තිනාමයත් විනාශ වෙනවා. යුද හමුදා මේජර්වරයෙක්, සෙසු නිලයන් හය දෙනෙක්, පොලීසියේ කෙනෙක්, සංවිධානාත්මක අපරාධ කල්ලි සාමාජිකයින් 15ක්, ඊට අනුබල දුන් තවත් 15ක් වශයෙන් අත් අඩංගුවට ගෙන තිබෙනවා. මේ දින කිහිපය තුළ ආයුධ ලෙස අපි ටී 56 අවි 07ක්, පිස්තෝල 10ක්, රිවොල්වර 17ක්, ඇතුළු ආයුධ බොහෝ ප්‍රමාණයක් ‌ සොයාගෙන තිබෙනවා. කේරල ගංජා, කොකේන්, අයිස් කිලෝ විශාල ප්‍රමාණයක් වශයෙන් මත්ද්‍රව්‍ය අති විශාල ප්‍රමාණයක් මේ මාස දෙක තුන තුළ සොයාගෙන තිබෙනවා. රජයක් ලෙස අපි පොරොන්දු වෙනවා, කාලයේ වැලිතලාවට යටවී තිබු සියලු අපරාධ සම්බන්ධයෙන් අපි විමර්ශන සිදු කරනවා. මෙතන කතා වුණා ෆයිල් හාරසිය, පන්සියය ගැන. නමුත් මම කිව යුතුයි අපරාධ පරීක්ෂණ දෙපාර්තමේන්තුව තුළ ෆයිල් 29000ක් තිබෙනවා. මූල්‍ය අපරාධ කොට්ඨාසය තව සති දෙකක් තුළ ආරම්භ කරලා මූල්‍ය අපරාධවලට සම්බන්ධ ෆයිල් එම අංශයට ලබා දෙනවා. මේ රටේ ජනතාව වෙනුවෙන් අපි සාධාරණය ඉටුකරනවා. මත්ද්‍රව්‍ය හා පාතාල ක්‍රියාකාරකම් මැඬලීම වෙනු‍ෙවන් අපි විශේෂ කාර්ය භාරයක් ඉටුකරනවා.

පාර්ලිමේන්තු මන්ත්‍රී තිස්ස අත්තනායක මහතා විසින් ජාතික ජන බලවේගයේ රජ‍යක් බලයට පත් වුවහොත් ශ්‍රී දළදා මාලිගාවේ පෙරහර පැවැත්වීම නවත්වන බවට ප්‍ර‍කාශ කරමින් සිදුකළ අපහාසයට රුපියල් මිලියන 100ක වන්දියක් ඉල්ලා අගමැතිනි හරිනි අමරසූරිය මෙනෙවිය ගොනුකර ඇති නඩුවේ උත්තර බැඳීම ලබන ජුනි 03 වැනිදාට සිදු කරන ලෙස කොළඹ දිසා විනිසුරු මහේෂා ද සිල්වා මහත්මිය වගඋත්තරකාර පාර්ශ්වයට ඊයේ (21) නියම කළාය.

මෙම නඩුව ඊයේ (21) කොළඹ දිසා අධිකරණය හමුවේ කැඳවූ අවස්ථාවේදී වගඋත්තරකාර පාර්ශ්වයේ නීතිඥවරුන් තමන්ට උත්තර බැඳීමට අමතර කාලයක් ඉල්ලා සිටි අතර ඒ අනුව ලබන ජුනි මස 03 වැනිදාට පැමිණිල්ල සම්බන්ධයෙන් වන පිළිතුරු ගොනු කිරීමට අධිකරණයෙන් වගඋත්තරකරුවන්ට දින නියම කළේය.

පසුගිය ජනාධිපතිවරණයේදී සජිත් ප්‍රේමදාස මහතාට සහාය පළ කරමින් ඉකුත් අගෝස්තු 19දා මාවනැල්ලේ පැවැති රැස්වීමකදී හිටපු පාර්ලිමේන්තු මන්ත්‍රී තිස්ස අත්තනායක මහතා අසත්‍යය හා ද්වේශසහගත ප්‍රකාශයක් කිරීම සම්බන්ධයෙන් අගමැතිනි හරිනි අමරසූරිය මෙනෙවිය මෙම නඩුව ගොනු කර තිබිණි.

පැමිණිලිකාර පාර්ශ්වය අධිකරණයට ගොනුකර ඇති තොරතුරු අනුව මෙම නඩුවේ දෙවැනි වගඋත්තරකාර රූපවාහිනි සමාගම මෙම සිද්ධිය ප්‍රධාන ප්‍රවෘත්තිය ලෙස ප්‍රකාශ කර, අනතුරුව පසුදා උදෑසන පුවත්පත් සිරස්තල වැඩසටහන ඔස්සේ ද විකාශය කර ඇත.

විශ්වවිද්‍යාල ආචාර්යවරියක හා දේශපාලන ක්‍රියාධරයකු ලෙස ආචාර්ය හරිනි අමරසූරිය මෙනෙවිය ගොඩනඟාගෙන ඇති කීර්තිනාමයට හානි වන ආකාරයේ ද්වේශසහගත ප්‍රකාශයක් කිරීම සම්බන්ධයෙන් වගඋත්තරකරුගෙන් හා එය විකාශනය කළ පෞද්ගලික මාධ්‍ය නාළිකාවකින් රුපියල් මිලියන 100 බැගින් වන්දි ඉල්ලා මෙම නඩුව පවරා තිබේ.

විද්‍යා හා තාක්ෂණ අමාත්‍ය ක්‍රිෂාන්ත අබේසේන මහතාගේ නම ඉදිරියෙන් සඳහන්ව තිබූ මහාචාර්ය පදවි නාමය පාර්ලිමේන්තු වෙබ් අඩවියෙන් ඊයේ (21) ඉවත් කර ඇත්තේ අමාත්‍යවරයා කළ ඉල්ලීමක් අනුව බ වාර්තා වේ.

ක්‍රිෂාන්ත අබේසේන මහතාගෙන් පවසන්නේ මහාචාර්ය තනතුරක් දැරුවද දැනට තමා විශ්ව විද්‍යාල සේවයේ නොමැති හෙයින් එම නාමය පාවිච්චි නොකිරීමට තීරණය කළ බවයි.

ඔහු වැඩිදුරටත් පැවසූවේ පාර්ලිමේන්තු හැන්සාඩ් වාර්තාවල හෝ කිසිදු නිල ලියකියවිල්ලක තමා මහාචාර්ය පදවිය සඳහන් නොකරන බවද අවධාරණය කළේය.

මේ අතර පාර්ලිමේන්තු වෙබ් අඩවියේ අධිකරණ අමාත්‍ය නීතිඥ හර්ෂණ නානායක්කාර මහතාගේ නම ඉදිරියෙන් ආචාර්ය පදවියක් සඳහන් වීම සම්බන්ධයෙන් රහස් පොලීසිය සිදුකරනු ලබන විමර්ශන තවදුරටත් අවසන් වී නොමැති බව වාර්තා වේ.