Main news (Sinhala)

අග්‍රාමාත්‍ය ලේකම් කාර්යාලය පවසන පරිදි, රජයේ වාණිජමය නොවන ආයතන 166 කට අයත් මහජන සේවා හා නියාමන කාර්යයන් ගුණාත්මක කිරීමට අදාළ ක්‍රියාමාර්ග සකස් කිරීම සඳහා අග්‍රාමාත්‍ය ලේකම්වරයාගේ සභාපතිත්වයෙන් යුතු විශේෂ කමිටුවක් පිහිටුවා ඇත.

මෙම කමිටුවේ මූලික ඉලක්කය වන්නේ මහජන සේවා හා නියාමන කටයුතු දියුණු කිරීම සඳහා මහජනතාවට ඉදිරියේදී පහසුකම් සහ ගුණාත්මක සේවාවන් සලසීමයි.

අමාත්‍ය මණ්ඩලය විසින් ලබාදුන් නවතම මාර්ගෝපදේශ අනුව, මෙම ආයතන 166 ක් සපයන සේවාවන් සම්බන්ධයෙන් මහජනතාව මුහුණ දෙන ගැටලු සහ අවශ්‍යතා විමසා එම ගුණාත්මකභාවය වැඩි දියුණු කිරීමට යෝජනා ලබා ගැනීමේ කටයුතු කමිටුව මගින් ක්‍රියාත්මක කරනු ඇත.

මෙම කටයුතු සඳහා අදහස් ලබාගැනීමේදී අදාළ ආයතනවල නම් ලැයිස්තුව https://pmoffice.gov.lk/soesuggestions.php වෙබ් පිටුවෙන් බාගත කළ හැකි අතර මහජනයාට තම අදහස් ඇතුළත් ආකෘති පත්‍රය පුරවා මෙම මස 31 වැනිදාට පෙර එම කමිටුවට ලබාදීමේථැකියාව පවතී.

ජනපතිවරයාගේ ඩිජිටල් ශ්‍රී ලංකා වැඩසටහනට සමගාමීව ආරම්භ වූ විශ්‍රාම වැටුප් දෙපාර්තමේන්තුවේ නව ඩිජිටල් පද්ධතිය ජනගත කිරීම අද (17) රාජ්‍ය පරිපාලන, පළාත් සභා සහ පළාත් පාලන අමාත්‍ය ආචාර්ය ඒ.එච්.එම්.එච් අබයරත්න මහතාගේ ප්‍රධානාත්වයෙන් කොළඹ දිස්ත්‍රික් ලේකම් කාර්යාල ශ්‍රවණාගාරයේදී සිදුවිය.

මෙම නව ඩිජිටල් වේදිකාව රාජ්‍ය දෙපාර්තමේන්තු සහ පෞද්ගලික ආයතන කිහිපයක් සමග එක්ව අංශ පහක් යටතේ ඒකාබද්ධිත ක්‍රියාත්මක වෙයි.

එම නව ඒකාබද්ධ කිරීම හරහා වැඩිදියුණු කරන ලද සේවා සහිත දෙපාර්තමේන්තු නිල වෙබ් අඩවිය, විශ්‍රාමිකයින් සඳහා දුම්රිය ගමන් බලපත්‍ර නිකුත් කිරීමේ පද්ධතිය, වැන්දඹු සහ අනත්දරු ක්‍රමයෙහි ලියාපදිංචි කිරීමේ තොරතුරු පද්ධතිය, ප්‍රතිනිර්මාණය කරන ලද රාජ්‍ය සේවක අර්ථ සාධක අරමුදල් ක්‍රියාවලිය, විශ්‍රාමික මරණ වාර්තා කිරීමේ තොරතුරු පද්ධතිය (රෙජිස්ට්‍රාර් දෙපාර්තමේන්තුව සමග ඒකාබද්ධිතය) යන අංශ පහ ක්‍රියාත්මක වේ.

විශ්‍රාම වැටුප් දෙපාර්තමේන්තුවේ කාර්යයන් හා සේවාවන් වඩාත් කාර්යක්ෂම හා සුහදශීලිව විශ්‍රාමික පිරිස් වෙත ලබාදීම මෙම ඩිජිටල් පද්ධතීන් නිර්මාණය කිරීමේ අරමුණ වූ බව අමාත්‍යංශය පැවසීය.

මෙරට වතුකර පාසල් සඳහා ස්මාර්ට් පන්ති කාමර 60ක් ඉදිකිරීම වෙනුවෙන් ප්‍රජා යටිතල පහසුකම් අමාත්‍යංශයේ ලේකම් ප්‍රභාත් චන්ද්‍රකීර්ති මහතා සහ ඉන්දීය මහකොමසාරිස් සත්තෝෂ් ජා මහතා අතර අවබෝධතා ගිවිසුමක් අත්සන් කිරීම ඊයේ (16) සිදුවිය.

නුවරඑළිය, නුවර සහ බදුල්ල යන දිස්ත්‍රික්කවල වතුකර පාසල් සඳහා මෙම ස්මාර්ට් පන්ති කාමර ඉදිකිරීමට සැලසුම් කර ඇති අතර ඒ හරහා මෙරට වතුකර ප්‍රජාවන්හී ඩිජිටල් පරතරය පියවීම එහි අරමුණයි.

මෙම ව්‍යාපෘතිය සඳහා ඉන්දීය රජයෙන් ත්‍යාගශීලී මුදල් ආධාරයක් ලෙස රුපියල් මිලියන 508ක් ලබා දී ඇති අතර මෙම ස්මාර්ට් පන්ති කාමර වෙනුවෙන් ශ්‍රී ලංකා රජය රුපියල් මිලියන 115ක මුදලක්ද වෙන් කර තිබේ.

‘නව රජයේ වැඩපිළිවෙල සමග පොලීසියේ කාර්යභාරය’ යන තේමාව යටතේ රජයේ ප්‍රවෘත්ති දෙපාර්තමේන්තුවේ පැවැත්වෙන විශේෂ මාධ්‍ය හමවුකට එක්වෙමින් වැඩබලන පොලිස්පති ප්‍රියන්ත වීරසූරිය මහතා සඳහන් කළේ, Clean Sri Lanka වැඩසටහනට සමගාමීව පොලීසිය දියත් කරන රථවාහන මෙහෙයුම හරහා රථ වාහන අනතුරුවලින් දිනකට මියයන පුද්ගලයින් ගණන අඩුකර ගැනීමට හැකි වූ බවයි.

මාර්ග විනය පවත්වාගෙන යෑම අතිශය වැදගත් බවත් මෙය නොපෙනෙන ත්‍රස්තවාදයක් බවත් වැඩබලන පොලිස්පතිවරයා එහිදී සඳහන් කළේය.

එම වැඩසටහනට පෙර රිය අනතුරු හේතුවෙන් දිනකට පුද්ගලයින් 9කට ආසන්න සංඛ්‍යාවක් මිය ගිය බවත් එම ප්‍රමාණය 4 සිට 2ක දක්වා අඩු කරහැනීමට මේ වනවිට හැකියාව ලැබී ඇතැයි ප්‍රියන්ත වීරසූරිය මහතා පැවසීය.

පොලිස් සංක්‍යා දත්ත අනුව දිනකට පුද්ගලයින් 10 – 15ත් අතර පිරිසක් රිය අනතුරු හේතුවෙන් සදාකාලිකව ආබාධිත තත්ත්වයට පත්වෙන බවත්, යුද සමයේ දිනකට ආබාධිතවූ පිරිසට වඩා එය වැඩි ප්‍රමාණයක් බවත් ඔහු වැඩිදුරටත් පැවසීය.

එමෙන්ම ඉතිහාසයේ පළමු වතාවට පසුගිය දෙසැම්බර් 25 වන නත්තල් දිනයේ දී කිසිදු රිය අනතුරක් වාර්තා නොවූ අතර එය සුවිශේෂි අවස්ථාවක් බවද වැඩබලන පොලිස්පතිවරයා සිහිපත් කළේය.