Why is this happening (Sinhala)

විද්‍යා හා තාක්ෂණ අමාත්‍ය ක්‍රිෂාන්ත අබේසේන මහතාගේ නම ඉදිරියෙන් සඳහන්ව තිබූ මහාචාර්ය පදවි නාමය පාර්ලිමේන්තු වෙබ් අඩවියෙන් ඊයේ (21) ඉවත් කර ඇත්තේ අමාත්‍යවරයා කළ ඉල්ලීමක් අනුව බ වාර්තා වේ.

ක්‍රිෂාන්ත අබේසේන මහතාගෙන් පවසන්නේ මහාචාර්ය තනතුරක් දැරුවද දැනට තමා විශ්ව විද්‍යාල සේවයේ නොමැති හෙයින් එම නාමය පාවිච්චි නොකිරීමට තීරණය කළ බවයි.

ඔහු වැඩිදුරටත් පැවසූවේ පාර්ලිමේන්තු හැන්සාඩ් වාර්තාවල හෝ කිසිදු නිල ලියකියවිල්ලක තමා මහාචාර්ය පදවිය සඳහන් නොකරන බවද අවධාරණය කළේය.

මේ අතර පාර්ලිමේන්තු වෙබ් අඩවියේ අධිකරණ අමාත්‍ය නීතිඥ හර්ෂණ නානායක්කාර මහතාගේ නම ඉදිරියෙන් ආචාර්ය පදවියක් සඳහන් වීම සම්බන්ධයෙන් රහස් පොලීසිය සිදුකරනු ලබන විමර්ශන තවදුරටත් අවසන් වී නොමැති බව වාර්තා වේ.

ටොයෝටා ලෑන්ඩ් කෲසර් මාදිලියේ ජීප් රථයක් එම රථය නිෂ්පාදිත කර්මාන්ත ශාලාවෙන් පරිබාහිරව කොටස් දෙකක් එකිනෙක පෑස්සීමෙන් එකලස් කළැයි කියන සිද්ධියකට අදාළව විභාග වන නඩුවක් සම්බන්ධයෙන් අපරාධ පරීක්ෂණ දෙපාර්තමේන්තුව මෝසමක් මඟින් පසුගිය දා (8) කළ ඉල්ලීමක් අනුව පාර්ලිමේන්තු මන්ත්‍රී හිටපු අධිකරණ ඇමැති සුජීව අර්ජුන සේනසිංහ මහතාට ලබන පෙබරවාරි 5 වැනිදා අධිකරණය හමුවේ පෙනී සිටින ලෙස කොටුව මහේස්ත්‍රාත් නිලුපුලී ලංකාපුර මෙණෙවිය නියෝග කළාය.

අදාල V8 වාහනය එකලස් කළ බවට චෝදනා එල්ල වන අතර එහි ලියාපදිංචි අයිතිකරු වන සුජීව සේනසිංහ රුපියල් මිලියන සියයක බැඳුම්කරයක් මත මුදා ඇති අතර එමෙන්ම වාහනය විකිණීම, වෙනස් කිරීම අන්සතු කිරීම තහනම් කරමින් නියෝගයක්ද නිකුත් කර ඇත.

මේ අතර E8 සහයෝගිතා වැඩසටහනට අදාළව හිටපු කම්කරු හා විදේශ රැකියා අමාත්‍ය මනූෂ නානායක්කාර මහතා අද (21) අපරාධ පරීක්ෂණ දෙපාර්තමේන්තුවේ පෙනී සිට ප්‍රකාශයක් ලබා දීමට සූදානම් බව ඔහු වෙනුවෙන් පෙනී සිටි ජනාධිපති නීතිඥ සාලිය පීරිස් මහතා කොළඹ ප්‍රධාන මහේස්ත්‍රාත් තනූජා ලක්මාලි මහත්මියට ඊයේ (20) දැනුම් දුන්නේය.

කෘෂිකාර්මික හා ධීවර සේවය සඳහා ශ්‍රී ලාංකික ශ්‍රමිකයන් විදේශගත කිරීමට ශ්‍රී ලංකාව හා දකුණු කොරියාව අතර සිදු වූ සහයෝගිතා වැඩසටහනට අදාළව තමන්ව අත්අඩංගුවට ගැනීමට සූදානමක් පවතින බව සඳහන් කරමින් පෙර අපේක්ෂිත ඇපයක් මත මුදා හරින ලෙස ඉල්ලා මනූෂ නානායක්කාර මහතා විසින් ඉදිරිපත් කළ අපේක්ෂිත ඇප පෙත්සම කැඳවූ අවස්ථාවේ දී මේ දැනුම් දීම කළේය.

ප්‍රවාහන මහාමාර්ග වරාය හා සිවිල් ගුවන්සේවා අමාත්‍ය බිමල් රත්නායක මහතා අද (20) උදෑසන මොරටුව දුම්රිය ස්ථානයේ සිට කොළඹ කොටුව බලා ධාවනය වන කාර්‍යාල දුම්රියේ නැගී සේවයට වාර්තා කර තිබේ.

අමාත්‍යවරයා මෙලෙස පෙර දැනුම්දීමකින් තොරව දුම්රියට නැග ඇත්තේ දුම්රිය සේවයේ ඇති සැබෑ ගැටළු හඳුනාගැනීමේ අරමුණින්.

මෙහිදී දුම්රිය මගීන් අමාත්‍යවරයා සමඟ සුහද කතා බහක නිරතවෙමින් ගමන් ගන්නා අයුරු මගීන් විසින් ජංගම දුරකථන හරහා රූගත කර සමාජ මාධ්‍ය වෙත එක් කර තිබුනි.

ගමන අතරවාරයේ ඇතැම් දුම්රිය ස්ථාන වලින් බැස දුම්රිය ස්ථාන නිරීක්ෂණය කිරීමටද අමාත්‍යවරයා කටයුතු කර තිබූ අතර අමාත්‍යවරයා ගමන් ගත් දුම්රිය පැමිණ තිබුනේ මිනිත්තු 13ක් ප්‍රමාදවී බව සඳහන්.

ගමන අතරතුර දුම්රියේ අපිරිසිදු ස්ථාන සහ විදුලි පංකා ක්‍රියාත්මක නොවීම ආදී කරුණුද අමාත්‍යවරයාගේ අවධානයට ලක්ව තිබේ.

දේශපාලන පක්ෂ දෙකක් ලෙස පසුගිය ජනාධිපතිවරනයට සහ මහ මැතිවරනයට මුහුණ දුන් සමගි ජන බලවේගය සහ එක්සත් ජාතික පක්ෂය සිය ඉදිරි දේශපාලන කටයුතුවලදී එක්ව කටයුතු කිරීම සම්බන්ධයෙන් සිදුකරන පළමු සාකච්ඡාව අද (20) දිනයේ පැවැත්වීමට නියමිත බව වාර්තා වෙයි.

සමගි ජන බලවේගයේ මහ ලේකම් පාර්ලිමේන්තු මන්ත්‍රී රංජිත් මද්දුම බණ්ඩාර මහතා පැවසුවේ අදාල සාකච්ඡාව සම්බන්ධයෙන් දෙපාර්ශවයේ කමිටු සාමාජිකයින් අතර එම සාකච්ඡාව පැවැත්වීමට නියමිත බවයි.

එහිදී දෙපාර්ශවයේම යෝජනා සැලකිල්ලට ගනිමින් ඉදිරි නායකත්වය සම්බන්ධයෙන් තීරණයක් ගැනීමටද නියමිත බව මන්ත්‍රීවරයා වැඩිදුරටත් පැවසීය.

කත­ර­ගම මැණික් ගඟට යාබ­දව ඇති රජයේ රක්ෂි­ත­යට අයත් ඉඩම් කොට­සක නීති විරෝධී ලෙස ඉදි­කර ඇති කාමර 12ක පමණ වූ ගොඩ­නැ­ඟිල්ල සම්බ­න්ධ­යෙන් අප­රාධ පරී­ක්ෂණ දෙපා­ර්ත­මේ­න්තුව විසින් කරනු ලබන විම­ර්ශ­න­යට අදා­ළව ගෝඨා­භය රාජ­පක්ෂ මහ­තා­ගෙන් පසු­ගිය 17 වෙනි­දා ප්‍රශ්න කර ඇත.

එහිදී එම ගොඩනැගිල්ල සඳහා ජී. රාජ­පක්ෂ නමින් ලැබෙන විදුලි බිල සම්බ­න්ධ­යෙන් තමා කිසි­වක් නොදන්නා බවත් එම ගොඩ­නැ­ඟි­ල්ලට තමාගේ කිසිදු සම්බ­න්ධ­යක් නොමැති බවත් හිටපු ජනා­ධි­පති ගෝඨා­භය රාජ­පක්ෂ මහතා විසින් අප­රාධ පරී­ක්ෂණ දෙපා­ර්ත­මේ­න්තුව හමුවේ පවසා තිබේ.

අප­රාධ පරී­ක්ෂණ දෙපා­ර්ත­මේ­න්තුව විසින් කර ඇති විම­ර්ශ­න­ව­ලින් අනා­ව­ර­ණය වී ඇත්තේ මෙම ඉදි­කි­රීම සිදු­කර ඇත්තේ 2010 වස­රට පෙර­ බවත් එම ඉදි­කි­රීම් හමු­දාවේ කණ්ඩා­ය­ම­කගේ ශ්‍රම දාය­ක­ත්ව­යෙන් සිදු­කර ඇති බවත් ය.

කෙසේවෙතත් එම ඉදි­කි­රී­ම්ව­ලින් පසු එම ගොඩ­නැ­ඟිල්ල බලා කියා­ගෙන සිට ඇතැයි පැව­සෙන්නේ යෝෂිත රාජ­පක්ෂ මහ­තාගේ ආර­ක්ෂා­වට යොදවා සිට ඇතැයි පැව­සෙන්නේ එම නාවික හමුදා සාමා­ජි­ක­යෙකි.

ඒ සම්බ­න්ධ­යෙන් යෝෂිත රාජ­පක්ෂ මහ­තා­ගෙන්ද අප­රාධ පරී­ක්ෂණ දෙපා­ර්ත­මේ­න්තුව විසින් ඉකුත් 03 වෙනිදා ප්‍රශ්න­කර තිබූ අතර එහිදී ඔහු පවසා තිබුණේ එම ගොඩ­නැ­ඟිල්ල සම්බ­න්ධ­යෙන් තමා කිසි­වක් නොදන්නා බවයි.

ඉකුත් දෙසැ­ම්බර් 27 වැනි­දා යෝෂිත රාජ­පක්ෂ මහ­තා­ගෙන් ප්‍රශ්න කිරී­මට පෙර හිටපු ජනා­ධි­පති මහින්ද රාජ­පක්ෂ මහ­තාගේ පුද්ග­ලික ආර­ක්ෂක නිල­ධා­රියා වූ මේජර් නෙවිල් වන්නි­ආ­රච්චි මහ­තා­ගෙන්ද අප­රාධ පරී­ක්ෂණ දෙපා­ර්ත­මේ­න්තුව ප්‍රශ්න කළ අතර රජයේ රක්ෂි­ත­යක ඉදි­කර ඇති මෙම ගොඩ­නැ­ඟිල්ල සම්බ­න්ධ­යෙන් යහ­පා­ලන ආණ්ඩුව සමයේ දී ද විම­ර්ශ­න­යක් ආරම්භ කළත් ගෝඨා­භය රාජ­පක්ෂ ජනා­ධි­ප­ති­ව­රයා වීමෙන් අන­තු­රුව එම විම­ර්ශ­නය ඇන­හිට තිබුණි.

කෙසේවෙතත් එම ගොඩ­නැ­ඟි­ල්ලට ලබා­ගෙන ඇති විදු­ලි­යට බිල්පත් ලැබෙන්නේ ජී. රාජ­පක්ෂ නමැති අයෙ­කුගේ නමිනි.

වත්මන් රජය බලයට පත්වීමත් සමඟ මුහුණදීමට සිදුවූ පළමු අභියෝගය වූයේ සහල් පිළිබඳ අර්බුදයයි. එම මොහොත දඩ මීමා කරගත් මෙරට මහාපරිමාන සහල් ව්‍යාපාරිකයන් ජනතාව කබලෙන් ලිපට ඇද දමා ඉන් අසීමිත ලාභ ඉපයූ බව නොරහසක්.

පසුව ගැටළුව නිරාකරණය කිරීම සඳහා ජනපතිවරයාට පවා කිහිප අවස්ථාවකදී මැදිහත්වීමට සිදුවූ අතර ඉන් තත්වය යම් පාලනයකට ගෙන ඒමට හැකිවූවත් ඇතැම් මහාපරිමාණ ව්‍යාපාරිකයින් රටේ නීතිය පවා ඉවත දමමින් සිට පටු ලාභ අරමුණු උදෙසා කටයුතු කළහ.

කෙසේවෙතත් ඉන්පසු සහල් ආනයනය කිරීම සම්බන්ධයෙන් තීරණයක් ගැනීමට ජනපතිවරයාට සිදුවූ අතර ඊට විපක්ෂ දේශපාලන පක්ෂ විසින් දැවැන්ත අවලාද නැඟීමටද අමතක නොකළහ.

කෙසේවෙතත් මෙම අර්බුද මැද ජනපතිවරයා අවධාරණය කර සිටියේ එළඹෙන කන්නයේ සිට නියත වශයෙන්ම මෙම සහල් අධිකාරිය බිඳ දැමීමට අවශ්‍ය සියළු තීරණ ගන්නා බවයි.

එමෙන්ම සහල් යනු මෙරට ජාතික ධනයක් මිස හුදු ව්‍යාපාරිකයන් කිහිපදෙනෙකුගේ පුද්ගලික බූදලයක් නොවන බවද ජනපතිවරයා සිහිපත් කළේය.

එහිදී වී අලෙවි මණ්ඩලය හරහා රජය විසින් සහල් වෙළඳපොලේ කොටසක් අත්පත් කරගැනීමේ වැදගත්කමද ඔහු පෙන්වා දුන්නේය.

ජනපතිවරයාගේ එම දැක්ම යථාවත් කරමින් මෙවර වී අස්වනු නෙලීම ආරම්භ වී ඇති පසුභිමක කෘෂිකර්ම නියෝජ්‍ය අමාත්‍ය නාමල් කරුණාරත්න මහතා ඇඹිලිපිටිය වී ගබඩා සංකීරණයේ නිරීක්ෂණ චාරිකාවකට එක් වෙමින් කියා සිටියේ, රජයේ ගබඩා සඳහා වී තොග ගෙනවිත් භාරදෙන ගොවීන්ට සහතික මිලට අමතරව වී කිලෝවක් සඳහා රුපියල් 2ක මුදලක් ලබාදෙන බවයි.

එමෙන්ම තම අස්වැන්නෙන් යම් වී ප්‍රමාණයක් රජයේ ගබඩා සඳහා ද ගෙනවිත් භාරදෙන ලෙස ඔහු ගොවීන්ගෙන් ඉල්ලා සිටියේය.

මේ වනවිටත් ඇතැම් දිස්ත්‍රික්කවල වී මිලදී ගැනීමේ කටයුතු ආරම්භ කර ඇති බවත් තවත් සති දෙකක් ඇතුලත සහල් ගැටලුව සම්පූර්ණයෙන්ම අවසන් කිරීමට බලාපොරොත්තු වන බවත් නියෝජ්‍ය අමාත්‍යවරයා වැඩිදුරටත් පැවසීය.

මෙම ක්‍රියාවලිය හරහා වී අස්වැන්නෙන් සැළකියයුතු කොටසක් රජය අත් පත් කරගනිමින් ඒ හරහා සහල් ඒකාධිකාරිය බිඳහෙලා ජනතාවට හිඟයකින් තොරව නිසි මිල ගනන් යටතේ සහල් ලබාදීම ‍රජයේ අරමුණ බව පැහැදිලි වේ.