By unusuma.lk on (LK time)
ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන මහතා පසුගියදා ඇල්ල බලා ධාවනය වන ඇල්ල ඔඩිසි දුම්රියේ ප්‍රවේශ පත්‍ර සියල්ල තත්ත්පර 42 ක් වැනි ඉතා කෙටි කාලයක් තුළ දී අලෙවි වීම සම්බන්ධයෙන් වූ ජාවාරමක තතු හෙළි කළ අතර ඒ සම්බන්ධයෙන් පොලීසියටද විමර්ශණ ආරම්භ කරනා ලෙස දැනුම්දුන්නේය.
ඒ සම්බන්ධයෙන් සිදු කරන ලද විමර්ශනයෙන්, මෙම දුම්රිය ප්‍රවේශ පත් වංචාවට සම්බන්ධ එක් ප්‍රධාන සැකකරුවකු හදුනා ගැනීමට දුම්රිය දෙපාර්තමේන්තුවට හැකි වී තිබේ.
අදාල සැකකරු මාකුඹුර දුම්රිය ස්ථානයේ නිළධාරියෙකු බව වාර්තා වේ.
ඔහුගේ ඥාතියෙකුගේ නමින් ඔන්ලයින් දුම්රිය ප්‍රවේශ පත්‍ර නිකුත් කරන පෞද්ගලික ආයතනයක් ආරම්භ කර තිබෙන මෙම දුම්රිය නිළධාරියා, ඒ මගින් ඔහු සියලු දුම්රිය ප්‍රවේශ පත්‍ර තාක්ෂණික ක්‍රමවේදයක් හරහා වෙන්කර ගැනීම සිදු කර ඇත.
පසුව එම දුම්රිය ප්‍රවේශ පත්‍ර ඔහුට සම්බන්ධ එම ආයතනය හරහා වැඩි මිලකට අලෙවි කිරීම ඔහුගේ ජාවාරම වන අතර එහිදී 1200 ප්‍රවේශ පත්‍රය රුපියල් 16000ක් වැනි අධික මිලකට විදේශිකයන්ට විකුණා ඇති බව දැනගන්නට තිබේ.
ප්‍රවාහන නියෝජ්‍ය අමාත්‍ය ප්‍රසන්න ගුණසේන මහතාගේ මූලිකත්වයෙන් මෙම වංචාව හසුකර ගැනීම සදහා කටයුතු කරන ලද අතර මේ වන විට අදාල නිළධාරියාගේ සේවය අත්හිටුවා ඇති බව වාර්තා වේ.
